కర్ణాటకలో భాజపా యువనేత ప్రవీణ్ హత్య మరువక ముందే ఆ పార్టీకి చెందిన మరో నేత దారుణ హత్యకు గురయ్యారు. విపిన్ కుమార్ సింగ్ అనే భాజపా నేతను దుండగులు కాల్చి చంపారు. ఈ ఘటన బిహార్లోని మాధేపుర జిల్లాలో శుక్రవారం రాత్రి జరిగింది. ఇందుకు సంబంధించి కేసు నమోదు చేసిన పోలీసులు దర్యాప్తు చేపడుతున్నారు.
ఇదీ జరిగింది..: షాపుర్ పంచాయత్లోని ఓ కోపరేటివ్ సొసైటీకి అధ్యక్షుడిగా ఉన్న విపిన్ కుమార్ (59).. శుక్రవారం సాయంత్రం కారులో ఒంటరిగా ప్రయాణిస్తున్నారు. అప్పటికే తిక్కర్ టోలామోర్ ప్రాంతంలో మాటు వేసిన ఐదుగురు దుండగులు బైక్లపై కారును వెంబడించి విపిన్పై కాల్పులు జరిపారు. అనంతరం అక్కడి నుంచి పరారయ్యారు. ఘటనాస్థలి నుంచి పోలీసులు ఆరు బుల్లెట్ షెల్స్ను స్వాధీనం చేసుకున్నారు. దీనిపై కేసు నమోదు చేసిన పోలీసులు.. త్వరలోనే నిందితులను పట్టుకుంటామని హామీ ఇచ్చారు.
ఇటీవల కర్ణాటకలో వరుస హత్యలు కలకలం రేపాయి. దక్షిణ కన్నడ జిల్లాలో భాజపా యువనేత ప్రవీణ్ నెట్టార్ ఈనెల 26న హత్యకు గురయ్యారు. దుండగులు మూకుమ్మడిగా దాడి చేయగా.. ప్రవీణ్కు తీవ్రగాయాలు అయ్యాయి. రక్తపు మడుగులో పడి ఉన్న అతడిని ఆస్పత్రికి తరలించేలోపే ప్రాణాలు కోల్పోయాడు. ఈ ఘటన మరువక ముందే మరో ఘటన జరిగింది. మంగళూరు నగరంలో గురువారం సాయంత్రం స్థానిక యువకుడు దారుణ హత్యకు గురయ్యాడు. బాధితుడ్ని మహ్మద్ ఫాజిల్గా పోలీసులు గుర్తించారు. సూరత్కల్ ప్రాంతంలో ఓ వస్త్రదుకాణం వద్ద ఉన్న ఫాజిల్పై నలుగురు దుండగులు దాడి చేశారు. కత్తితో పొడిచి పరారయ్యారు.
ఇదీ చూడండి : బలమైన ప్రభుత్వమంటే నియంత్రించడం కాదు: మోదీ
