చెత్తకుప్పలో నుంచి 100 గ్రాముల బంగారు ఆభరణాల ఓ ఎలుక సాయంతో స్వాధీనం చేసుకున్నారు పోలీసులు. ఈ సంఘటన మహారాష్ట్ర రాజధాని ముంబయిలోని దిండోశీ ప్రాంతంలో జరిగింది. చివరకు బంగారు ఆభరణాలను యజమానులకు అప్పగించారు. ఇంతకీ ఆ చెత్తకుప్పలోకి బంగారు ఆభరణాలు ఎలా వెళ్లాయి?
ఏం జరిగిందంటే?: దిండోశీ పోలీస్ స్టేషన్ పరిధిలోని ఆరే కాలనీకి చెందిన సుందరి అనే మహిళ.. తన కుమార్తె వివాహం కోసం రుణం తీసుకునేందుకు 100 గ్రాముల బంగారు ఆభరణాలతో బ్యాంకుకు వెళ్తున్నారు. ఈ క్రమంలోనే ఓ యాచకురాలు, ఆమె కుమారుడు కనిపించారు. ఓ కవర్లో ఉన్న వడాపావ్ను ఆ బాలుడికి ఇచ్చి అక్కడి నుంచి వెళ్లిపోయారు సుందరి. తీరా బ్యాంకుకు వెళ్లి చూసుకోగా.. వడాపావ్ ఇచ్చిన బ్యాగ్లోనే బంగారం ఉన్నట్లు గుర్తించారు. హుటాహుటిన ఆ యాచకురాలు కనిపించిన ప్రాంతానికి వెళ్లారు. కానీ, వారు అక్కడ లేకపోవటం వల్ల పోలీసులకు ఫిర్యాదు చేశారు.
కేసు నమోదు చేసుకున్న దిండోశీ పోలీస్ స్టేషన్ ఇంఛార్జ్ సూరజ్ రౌత్ తనిఖీలు చేపట్టారు. పరిసర ప్రాంతాల్లోని సీసీటీవీ కెమెరాలను పరిశీలించారు. ఆ యచకురాలు అక్కడి నుంచి వెళ్లిపోయినట్లు గుర్తించారు. ఆమెను పట్టుకుని విచారించగా.. వడాపావ్ ఎండిపోయిందనుకుని సుందరి ఇచ్చిన కవర్ను చెత్తకుప్పలో పడెసినట్లు తెలిపింది. అయితే.. చెత్తకుప్పలో వెతికినప్పటికీ ప్రయోజనం లేకపోయింది. బంగారం ఉన్న బ్యాగ్ కనిపించలేదు.
చెత్తకుప్ప సమీపంలోని సీసీటీవీ కెమెరాలను క్షణ్నంగా పరిశీలించారు పోలీసులు. ఓ ఎలుక ఆ బ్యాగ్ను పట్టుకుని ఉన్నట్లు గుర్తించారు. దానిని పట్టుకునేందుకు వెంబడించారు. బంగారం సంచిని తీసుకుని సమీపంలోని మురికి కాలువలోకి వెళ్లింది మూషికం. కాలువలోంచి బంగారం ఉన్న బ్యాగ్ను స్వాధీనం చేసుకుని స్టేషన్కు తీసుకెళ్లారు. అనంతరం సుందరి కుటుంబ సభ్యులకు అప్పగించారు.
ఇదీ చూడండి: CCTV Video: రోడ్డుపై నడుస్తూ వ్యక్తి మృతి.. అదేనా కారణం?
పెళ్లికి వెళ్లి వస్తుండగా విషాదం.. లోయలో పడిన కారు.. ఏడుగురు మృతి
