తప్పించుకుని తిరుగుతున్న పీఎఫ్‌ఐ నాయకుడు అరెస్ట్‌

PFI Leader Arrested in YSR District : తప్పించుకుని తిరుగుతున్న పీఎఫ్​ఐ (Popular Front Of India) నాయకుడు అబ్దుల్​ సలీం వైఎస్సార్​ జిల్లా పోలీసులకు పట్టుబడ్డాడు. మైదుకూరు మండలం చెర్లోపల్లి వద్ద ఎన్​ఐఏ (National Investigation Agency) పోలీసులు అతన్ని అదుపులోకి తీసుకున్నారు. తెలంగాణ రాష్ట్రం జగిత్యాల పోలీస్ స్టేషన్​లో నమోదైన కేసులో సలీం కోసం ఎన్​ఐఏ అధికారులు వెతుకుతున్నట్లు తెలిసింది. 20 రోజుల క్రితం మైదుకూరు ప్రాంతానికి సలీం చేరుకున్నట్లు పసిగట్టిన ఎన్​ఐఏ అధికారులు శనివారం (మార్చి 2న) చెర్లోపల్లి వద్ద అతన్ని అరెస్ట్​ చేశారు.

నిషేధిత పాపులర్​ ఫ్రంట్​ ఆఫ్​ ఇండియా కార్యకలాపాల దర్యాప్తులో భాగంగా గత సంవత్సరంలో ఎన్​ఐఏ పలువురిని అరెస్టు చేసిన విషయం తెలిసిందే. ఎన్ఐఏ మోస్ట్​ వాంటెడ్​ జాబితాలో తెలుగు రాష్ట్రాలకు చెందిన ముగ్గురు వ్యక్తుల్లో అబ్దుల్​ సలీం ఒకరు. గత కొంతకాలం నుంచి తప్పించుకుని తిరుగుతున్న అబ్దుల్​ సలీంను ఎట్టకేలకు ఎన్​ఐఏ అధికారులు పట్టుకున్నారు.