వామ్మో బంగారం ధర మరీ ఇంతనా? - ఇలా అయితే కొనడం గగనమే సుమీ!! - Gold Rates High In Telangana

Gold Rates in Telangana 2024 : అందమైన ఆభరణాలు మగువల అందానికి మెరుగులు దిద్దటమే కాదు, ఆపదలో ఆదుకుంటుంటాయి. అందుకే మధ్య తరగతి వారు ఎక్కువగా మనసుపెట్టేది పుత్తడిపైనే అని చెప్పాలి. పెళ్లిళ్లు, శుభకార్యాలు, పండుగలు అనేక సందర్భాల్లో ఆడవారు ఎక్కువగా బంగారాన్ని కొనుగోలు చేస్తుంటారు. అయితే గత వారం రోజులుగా బంగారం ధరలు భగ్గుమంటున్నాయి. జీవిత కాల గరిష్ఠానికి చేరి, అంతకంతకూ పరుగులు పెడుతున్నాయి.

పెరిగిన డాలర్‌ మారకపు విలువ : ప్రస్తుతం 24 క్యారెట్ల బంగారం ధర పన్నులతో కలిపి రూ.73,150 పలుకుతోంది. వెండి సైతం రూ.80 వేలకు పైగా చేరింది. ఫెడ్ వడ్డీ రేట్లు తగ్గిస్తుందన్న సంకేతాలు ఇవ్వటం, అంతర్జాతీయ మార్కెట్​లో బంగారానికి డిమాండ్ పెరగటం, డాలర్ బలపడటం వంటి కారణాలతో బంగారం ధరలు అంతకంతకూ పెరుగుతున్నాయని వ్యాపారులు అభిప్రాయపడుతున్నారు. కరోనా విపత్తుకు ముందు బంగారం ధర సుమారు రూ.40 వేలు ఉండేది. అప్పట్లోనే కొనాలంటే ధరలు భగ్గుమంటున్నాయని మధ్య తరగతి వారు ఆందోళన చెందిన పరిస్థితి. ఇక ఇటీవలి వరకు రూ.62 నుంచి రూ.65 వేల మధ్య పలికిన బంగారం ధర, ఉన్నట్టుండి రూ.70 వేల మార్కును దాటి, మరింత పైకి ఎగబాకుతోంది.

Gold Price Hike in Telangana : అయితే బంగారం ధరల్లో పెరుగుదల ప్రధానంగా 1990 నుంచి ఎక్కువగా కనిపిస్తుంది. గడచిన ఏడాది కాలంలోనే సుమారు రూ.10 వేల వరకు బంగారం ధరలు పెరగటం మధ్య తరగతి వారిని ఆందోళనకు గురి చేస్తోంది. ఒకప్పుడు బంగారం ధరలు తక్కువగా ఉన్నప్పటికీ, అనేక కారణాలతో కొనుగోలు చేయలేకపోయామని, ఇప్పుడు ఇంత పెద్ద మొత్తం పెట్టి బంగారం కొనాలంటే కష్టంగా ఉందని పలువురు మహిళలు అభిప్రాయపడుతున్నారు. పుత్తడి ధర ఆకాశన్నంటుతున్నప్పటికీ మరింత పిరం అవుతుందేమో అన్న ఆందోళనతో వినియోగదారులు నగలు కొంటున్నారని వ్యాపారులు చెబుతున్నారు. త్వరలో రూ.80 వేల మార్కును చేరవచ్చని అంచనా వేస్తున్నారు.

పడిపోయిన బంగారం కొనుగోళ్లు : ప్రపంచ వ్యాప్తంగా బంగారానికి ఉన్న అతిపెద్ద మార్కెట్లలో భారత్ కూడా ఒకటి. సాధారణంగా భారత్‌లో వార్షిక బంగారం డిమాండ్‌ సుమారు 50 శాతం పెళ్లిళ్ల నుంచే వస్తుంది. దీంతో ప్రస్తుతం పెళ్లిళ్ల సీజన్‌ కావడంతో బంగారం ధరలు వీటిపై ప్రభావం చూపే అవకాశం ఉంది. పెళ్లిళ్ల పేరుతో తులాల మేర కొనుగోలు చేసే బంగారాన్ని, ఇప్పుడు తక్కువ మోతాదులో కొనుగోలు చేసే అవకాశం ఉంది.