Wall Collapse One Person Died in Sangareddy : మేడపైన పిట్టగోడకు జారబడి ఓ వ్యక్తి ఫోన్లో మాట్లాడుతున్నాడు. అయితే అకస్మాత్తుగా ఆ పిట్టగోడ కూలడంతో పక్కనే ఉన్న రేకుల ఇంటిపై అతడు పడిపోయాడు. దీంతో ఆ రేకుల ఇంట్లో నిద్రిస్తున్న దంపతులు, కుమారుడికి తీవ్ర గాయాలు కాగా, భర్త ఆసుపత్రికి తరలించేలోపు మృతి చెందాడు. జారిపడిన వ్యక్తికి తీవ్రగాయాలు అయ్యాయి. ఈ ఘటన సంగారెడ్డి జిల్లా ఐడీఏ బొల్లారంలో జరిగింది. ఈ ఘటనపై సమాచారం అందుకున్న పోలీసులు ఘటనాస్థలికి చేరుకుని కేసు నమోదు చేసి దర్యాప్తు చేస్తున్నారు.
పోలీసులు తెలిపిన వివరాల ప్రకారం, సంగారెడ్డి జిల్లా ఐడీఏ బొల్లారం మున్సిపల్ పరిధిలోని లక్ష్మీనగర్లో దీపాకర్ దాస్ అనే వ్యక్తి నివాసం ఉంటున్నాడు. అతడు తన ఇంటిపై మూడో అంతస్థులో పిట్టగోడకు జారబడి ఫోన్లో మాట్లాడుతున్నాడు. అయితే అకస్మాత్తుగా పిట్టగోడ కూలడంతో దాంతో సహా దీపాకర్ దాస్ కింద ఉన్న రేకుల షెడ్ ఇంటిపై పడిపోయాడు. ఆ రేకుల ఇంటి లోపల ఒడిశా రాష్ట్రానికి చెందిన జయదేబ్ మహాకుద్, సబిత దంపతులు నివాసం ఉంటున్నారు.
పిట్టగోడ వారిపై పడడంతోనే : తెల్లవారుజాము కావడంతో వారంతా గాఢ నిద్రలో ఉన్నారు. ఒక్కసారిగా పిట్టగోడ మీద పడటంతో తీవ్ర గాయాలతో భార్యాభర్తలు అపస్మారక స్థితికి వెళ్లిపోయారు. వాళ్ల కుమారుడు రాకేశ్కు తీవ్రగాయాలు అయ్యాయి. వెంటనే స్థానికులు అప్రమత్తమై వారిని స్థానిక ప్రైవేట్ ఆసుపత్రికి తరలించారు. అయితే జయదేబ్ మాత్రం ఆసుపత్రికి తరలించేలోపే మృతి చెందినట్లు వైద్యులు తెలిపారు. మిగిలిన భార్య సబిత, వారి కుమారుడికి ఆసుపత్రిలో మెరుగైన వైద్యం అందిస్తున్నారు. అలాగే ఫోన్లో మాట్లాడుకుంటూ కిందపడిన దీపాకర్ దాస్ కాలుకు తీవ్ర గాయం అయింది. అతడిని కూడా ఆసుపత్రికి తరలించి మెరుగైన చికిత్స అందిస్తున్నారు. విషయం తెలుసుకున్న ఐడీఏ బొల్లారం పోలీసులు కేసు నమోదు చేసుకుని దర్యాప్తు చేస్తున్నారు. ఇంకా ఈ ఘటనకు సంబంధించిన పూర్తి వివరాలు తెలియాల్సి ఉంది.
వర్షం నింపిన విషాదం - బాచుపల్లిలో గోడ కూలి ఏడుగురు దుర్మరణం - Wall Collapse in Hyderabad
Rainfall in Telangana : రాష్ట్రంలో విస్తారంగా వర్షాలు.. హనుమకొండలో ఇంటి గోడ కూలి ముగ్గురి దుర్మరణం
