Ice Apple in Wedding Reception in Hyderabad : తెలంగాణల పెళ్లి అంటే మామూలుగా ఉండది. ఇక్కడ సావునే ధూంధాంగా జరుపుకుంటం. ఇక పెళ్లిని ఏ రేంజ్ల చేస్తరో మీ ఊహకే వదిలేస్తున్న. తెలంగాణోళ్ల పెళ్లంట అందరూ ముందుగ అడిగేది తిండి గురించే. దావత్ల ఏం పెడ్తుండ్రు. ముక్క ఉందా లేదా అనే యావనే ఉంటది ఈడ. మామూలుగానే తెలంగాణోళ్లకు ముక్క లేనిదే ముద్ద దిగదు. ఇగ ఇట్లాంటి దావత్లల్లా ముక్క పక్కా ఉండాల్సిందే. ముక్క లేదంటే ఇజ్జత్ తీస్తరు. తెలంగాణ పెళ్లి దావత్ల గురించి బొచ్చెడు కథలున్నయ్.
అందుకే రంగారెడ్డి మాడుగులకు చెందిన ఓ తండ్రి మాత్రం తన కొడుకు రిసెపన్ష్ మెనూ కోసం కొంచెం వెరైటీగా ఆలోచించాడు. సమ్మర్లో పెళ్లి చేస్తున్నాం కదా ఎలాగో నాన్వెజ్ తింటారు. ఇంకేమైనా ఇంట్రెస్టింగ్ ఐటెమ్స్ యాడ్ చేస్తే బాగుంటదనుకున్నాడు. అప్పుడొచ్చింది ఓ అద్భుతమైన ఐడియా. తెలంగాణలో సమ్మర్ స్పెషల్ ఏంటంటే ముందు గుర్తొచ్చేది కల్లు, ముంజలు, నీరా. ఇగ మామూలుగానే పెళ్లికాడ ఏదో విషయంల లొల్లిల్లు జరుగుతయ్. దానికి తోడు కల్లును కూడా పోస్తే ఇగ ఏం లేదని ఆ ఆలోచనకు అక్కణ్నే ఫుల్స్టాప్ పెట్టిండ్రు.
ఇంకేం చేయాలే అని బుర్రని మెలిపెట్టి చివరకు తాటి ముంజలు, నీరా, చెరకు రసానికి ఫిక్స్ అయిపోయిండ్రు. ఇక జూస్కోండ్రి పెళ్లికి వచ్చినొళ్లంత భలే ఖుష్ అయిండ్రు. పిల్లకాయలైతే అసలు తాటిముంజల కాన్నుండి కదులుడే లేదు. పెళ్లిల మంచి తిండి పెట్టుడే కాకుండా సల్లగ ఉండేటట్టు నీరా, ముంజలు పెట్టిన కొత్తజంటను సల్లంగ ఉండుండ్రి అని నిండు మనసుతో దీవించి ఎవరి ఇళ్లకు వాళ్లు పోయిండ్రు.