Dhruv Jurel England Series : టెస్ట్ జట్టులోకి అరంగేట్రం చేసి కొద్ది రోజులు కూడా కాలేదు అప్పుడే క్రికెట్ హిస్టరీలో పలు సంచలనాలు సృష్టిస్తున్నాడు ఓ యంగ్ క్రికెటర్ రాజ్‌కోట్‌ వేదికగా టెస్ట్ అరంగేట్రం చేసిన ఈ కుర్రాడు ఇప్పుడు రాంచీ మ్యాచ్లోనూ సత్తా చాటుతున్నాడు. అతడి ఆటతీరు చూసిన ప్రతి ఒక్కరూ తనను జట్టుకు కొత్త అని అస్సలు అనుకోరు. ఇంతకీ అతడెవరో కాదు ఇంగ్లాండ్ ప్లేయర్లను తన బ్యాటింగ్ స్టైల్తో హడలెత్తిస్తున్న యువ కెరటం ధ్రువ్ జురెల్.
మైదానంలోకి దిగి బౌండరీల వర్షం కురిపించే ఈ స్టార్, రాంచీ వేదికగా ఇంగ్లాండ్తో జరుగుతున్న నాలుగో టెస్ట్ తొలి ఇన్నింగ్ల్లో టీమ్ఇండియాకు భారీ స్కోర్ను అందించాడు. 149 బంతుల్లో 90 పరుగులు సాధించాడు. డెబ్యూ మ్యాచ్ల్లోనే తన అద్భుతమైన ఆట తీరును చూసి మాజీలు కొనియాడుతున్నారు. భారత జట్టుకు అతడు కీలకం అంటూ కితాబులిస్తున్నారు.
ఇలా ధ్రువ్ ఆటతీరును అందరూ కొనియాడుతున్న నేపథ్యంలో అతడి చిన్ననాటి కోచ్ ఫూల్చంద్ శర్మ కూడా జురెల్ గురించి పలు ఆసక్తికర విషయాలను చెప్పుకొచ్చారు. ఉత్తరప్రదేశ్‌లోని నోయిడాలో వండర్స్ క్రికెట్ క్లబ్‌ను నడుపుతున్న ఆయన, ఈటీవీ భారత్కు ఇచ్చిన స్పెషల్ ఇంటర్వ్యూలో పలు కీలక విషయాలను పంచుకున్నారు. తన అకాడమీలో జురెల్ శిక్షణ తీసుకున్న రోజులను గుర్తుచేసుకున్నారు.
"13 ఏళ్ల వయసులో ధృవ్ నా అకాడమీకి వచ్చాడు. నేను అతడ్ని చూని నువ్వు ఇంటి నుంచి పారిపోయావా? అని అడిగాను. ఆ తర్వాత తన తండ్రితో మాట్లాడి అసలు విషయాన్ని తెలుసుకున్నాను. దీంతో ఇక తనను ఓ హాస్టల్‌లో చేర్పించి తనకు కోచింగ్ ఇవ్వడం ప్రారంభించాను." అంటూ ధృవ్ తన అకాడమీకి ఎలా వచ్చాడో వివరించారు.
ఓ వైపు శిక్షణ ఇస్తూనే ధృవ్ను కొన్ని లోకల్ టోర్నమెంట్‌లలో ఆడించారు కోచ్. ఇలా పలు టోర్నీల్లో ఆడి ధృవ్ బ్యాటింగ్తో పాటు వికెట్ కీపింగ్ రెండింటిలోనూ రాణించాడు. క్రమక్రమంగా ఏజ్ గ్రూప్ టోర్నమెంట్‌లతో పాటు, రంజీ ట్రోఫీలోనూ ఆడాడు. పలు రికార్డులు సృష్టించాడు. అయితే నేషనల్ టీమ్లో తన స్థానం కోసం ఎదురుచూసిన జురెల్, అవకాశం రాగానే దాన్ని అందుకుని సద్వినియోగం చేసుకున్నాడంటూ కోచ్ ఫూల్చంద్ ధృవ్ కోచింగ్ రోజుల గురించి మాట్లాడారు.
అయితే రాంచీ వేదికగా నేడు ( ఫిబ్రవరీ 25)న జరిగిన మ్యాచ్లో తొలి అర్ధశతకాన్ని పూర్తి చేసుకొన్నాక ధ్రువ్ మైదనంలో 'సెల్యూట్' చేశాడు. అతడు ఇలా చేయడం అందర్ని ఆశ్చర్యపర్చింది. అయితే అతడు అలా ఎందుకు చేశాడో తెలిశాక మాత్రం నెటిజన్లు ' ధ్రువ్ నీకు హ్యాట్సాఫ్‌' అంటూ తన గెస్టర్కు పొంగిపోయారు.
మాజీ సైనికుడైన తన తండ్రి గౌరవార్థం అతడు అలా చేశాడు ధ్రువ్. 1999లో జరిగిన కార్గిల్‌ వార్లో ధ్రువ్ తండ్రి నేమ్‌ చంద్ జురెల్ దేశానికి విశిష్ట సేవలను అందించారు. హవాల్దార్‌ హోదాలో ఉన్న సమయంలో ఆయన సైన్యం నుంచి రిటైర్ అయ్యారు. అయితే ధ్రువ్‌ను కూడా తన తండ్రీ ఓ ఆర్మీ మ్యాన్లా చూడాలనుకున్నారు. కానీ, చిన్నతనం నుంచి క్రికెట్‌పై మక్కువ ఉండటం వల్ల ఆ దిశగా ప్రోత్సహించారు.
నాలుగో టెస్ట్ తొలి ఇన్నింగ్స్ - భారత్ ఆలౌట్ - ధ్రువ్ జురెల్ ధనాధన్ ఇన్నింగ్స్!
గోల్డ్ చైన్ అమ్మి క్రికెట్ కిట్ కొనిచ్చిన అమ్మ- తల్లి కలను బతికిస్తున్న క్రికెటర్
