Raghunandan Rao on Phone Tapping Case : రాష్ట్రంలో ఫోన్ ట్యాపింగ్ వ్యవహారం పెను దుమారం రేపుతోంది. పోలీసుల విచారణలో రోజుకో కొత్త పేరు తెరపైకి వస్తోంది. ప్రతిపక్ష పార్టీల ముఖ్య నేతలతో పాటు బడా వ్యాపారులు, ప్రముఖుల ఫోన్లు ట్యాప్ చేసినట్లు తేలడంతో ఎప్పుడు ఎవరి పేరు బయటకు వస్తుందో అన్న ఉత్కంఠ నెలకొంది. ఈ క్రమంలోనే బీజేపీ నేత, ఆ పార్టీ మెదక్ లోక్సభ అభ్యర్థి రఘునందన్ రావు ఈ కేసుపై స్పందించారు. ఈ వ్యవహారంలో హైకోర్టు సిట్టింగ్ జడ్జితో కానీ, సీబీఐతో గానీ విచారణ జరిపించాలని డిమాండ్ చేశారు.
గతంలో రేవంత్‌రెడ్డిని టెలిఫోన్‌ ట్యాపింగ్ ద్వారా అరెస్టు చేశారని రఘునందన్ రావు ఆరోపించారు. 2014 నుంచి టెలిఫోన్లు ట్యాపింగ్ జరిగినట్లు అర్థమవుతోందన్న ఆయన, ఈ కేసులో చిత్తశుద్ధితో విచారణ చేయాలని కోరారు. కొందరినే బాధ్యులను చేయడం సరికాదని, ఇద్దరు ఏఎస్పీలను అరెస్టు చేసి చేతులు దులుపుకోవద్దని పేర్కొన్నారు. మాజీ ముఖ్యమంత్రి కేసీఆర్‌ను మొదటి ముద్దాయిగా, హరీశ్రావును రెండో ముద్దాయిగా, సిద్దిపేట మాజీ కలెక్టర్‌ వెంకట్రామి రెడ్డిని మూడో ముద్దాయిగా చేర్చాలని డిమాండ్ చేశారు. అసలు నిందితులను ముద్దాయిలుగా చేర్చకపోతే, కేసు సంపూర్ణం కాదని వ్యాఖ్యానించారు.
ఫోన్ల ట్యాపింగ్‌కు కేసీఆర్ బాధ్యత వహించాలి: కిషన్‌రెడ్డి
కేసు నుంచి తప్పించుకునేందుకు డీల్స్ : ఫోన్లు ట్యాపింగ్ చేసే అధికారం ఎవరికీ లేదన్న రఘునందన్, గతంలో తన ఫోన్ కాల్స్నూ ట్యాప్ చేసే ప్రయత్నం చేశారన్నారు. కేసీఆర్ ఫోన్ ట్యాపింగ్ వల్లే గతంలో రాజగోపాల్‌ రెడ్డి ఓడిపోయారని ఆరోపించారు. ఈ క్రమంలోనే ప్రణీత్‌ రావు, భుజంగ రావు, తిరుపతన్నకు ట్యాపింగ్ పరికరాలు ఎవరు ఇచ్చారని ప్రశ్నించిన ఆయన, కేసు నుంచి తప్పించుకునేందుకు డీల్స్ జరుగుతున్నాయని తెలిపారు. ట్యాపింగ్‌పై రాజీ పడుతున్నారా అనే విషయానికి డీజీపీ సమాధానం చెప్పాలని రఘునందన్ రావు డిమాండ్ చేశారు.
ఫోన్ ట్యాపింగ్‌లో అప్పటి డీజీపీ, హోంమంత్రిపైనే అనుమానాలు : నిరంజన్ రెడ్డి
ఫోన్లు ట్యాపింగ్ జరిగినపుడు డీజీపీ, ఎస్‌ఐబీ చీఫ్‌ ఎవరున్నారు. ఫోన్ల ట్యాపింగ్‌లో ఉన్న అధికారులను ఎందుకు క్షమిస్తున్నారు. ట్యాపింగ్ పరికరాలు ఎవరు, ఎప్పుడు, ఎలా కొన్నారు. ఈ కేసులో కొందరినే బాధ్యులను చేయడం సరికాదు. ఇద్దరు ఏఎస్పీలను అరెస్టు చేసి చేతులు దులుపుకోవడం సరికాదు. కేసీఆర్, హరీశ్రావు, వెంకట్రామి రెడ్డిలను నిందితులుగా చేర్చాలి. అసలు నిందితులను ముద్దాయిలుగా చేర్చకపోతే కేసు సంపూర్ణం కాదు. - రఘునందన్ రావు, బీజేపీ నేత
ఫోన్ ట్యాపింగ్ కేసు - నిందితుల కస్టడీ పిటిషన్పై విచారణ రేపటికి వాయిదా
