ETV Bharat / international

15 రాష్ట్రాల ప్రైమరీల్లో బైడెన్, ట్రంప్ హవా - అమెరికా అధ్యక్ష ఎన్నికల్లో మళ్లీ 'ఢీ'!

author img

By ETV Bharat Telugu Team

Published : Mar 6, 2024, 1:14 PM IST

US Primary Elections Results
US Primary Elections Results

US Primary Elections Results : అమెరికాలో ఈ ఏడాది నవంబర్‌లో జరగనున్న అధ్యక్ష ఎన్నికల్లో డొనాల్డ్‌ ట్రంప్‌, జో బైడెన్‌ మధ్య పోరు దాదాపు ఖాయమైనట్లు కనిపిస్తోంది. మంగళవారం సూపర్‌ ట్యూస్‌డే పేరిట అమెరికాలో 15 రాష్ట్రాలు, ఒక టెరిటరీలో ప్రైమరీ లేదా కాకస్‌ ఎన్నికలు జరిగాయి. డెమోక్రటిక్‌, రిపబ్లికన్‌ పార్టీల తరఫు నుంచి అధ్యక్ష అభ్యర్థుల కోసం జరిగిన ఆ ఎన్నికల్లో ట్రంప్‌, బైడెన్‌ తమ ప్రత్యర్థులపై భారీ గెలుపును నమోదు చేశారు.

US Primary Elections Results :సూపర్‌ ట్యూస్‌డే పేరిట మంగళవారం అమెరికాలోని 15 రాష్ట్రాల్లో, ఒక టెర్రిటరీలో జరిగిన ప్రైమరీ ఎన్నికల్లో మాజీ అధ్యక్షుడు ట్రంప్‌ దూసుకుపోయారు. ఎక్కువ స్థానాల్లో గెలుపొందిన ట్రంప్‌ నవంబర్‌లో జరిగే అధ్యక్ష ఎన్నికల్లో ప్రెసిడెంట్‌ జో బైడెన్‌తో అమీతుమీ తేల్చుకునేందుకు సిద్ధమయ్యారు. రిపబ్లికన్‌ పార్టీలో ట్రంప్‌ ఒక్క వెర్మొంట్‌ మినహా మిగిలిన రాష్ట్రాల్లో గెలుపొందారు. వెర్మొంట్‌లో ఆయన ప్రత్యర్థి నిక్కీ హేలీ విజయం సాధించారు. తాజా ఫలితాల నేపథ్యంలో ఆమె పోటీ నుంచి వైదొలగాల్సిన పరిస్థితి ఏర్పడింది. మరోవైపు డెమోక్రాటిక్‌ పార్టీలో జో బైడెన్ మంగళవారం జరిగిన దాదాపు అన్ని ప్రైమరీల్లో గెలుపొందినట్లు CNN వెల్లడించింది. ఒక్క సమోవా టెరిటరీలో మాత్రం జేసన్‌పామర్‌ చేతిలో ఆయన ఓడిపోయారు. లాంఛనంగా పార్టీ తరఫున నామినేషన్‌ పొందడానికి ట్రంప్‌ ఈ నెల 12 వరకు, బైడెన్‌ 19 వరకు నిరీక్షించాల్సి ఉంది.

రిపబ్లికన్‌ పార్టీలో అధ్యక్ష అభ్యర్థిత్వానికి ఎంపిక కావడానికి 1,215 మంది ప్రతినిధుల మద్దతు కావాల్సి ఉంటుంది. సూపర్‌ ట్యూస్‌డే వరకు హేలీ ఖాతాలో 86
మంది, ట్రంప్‌ ఖాతాలో 956 మంది ఉన్నారు. అటు డెమోక్రటిక్‌ పార్టీలో బైడెన్‌కు 1968 ప్రతినిధుల మద్దతు అవసరం కాగా 994 మంది బైడెన్‌కు అనుకూలంగా ఉన్నారు.

సూపర్‌ ట్యూస్‌డే ఫలితాల తర్వాత తన మద్దతుదారులను ఉద్దేశించి ట్రంప్‌ మాట్లాడారు. తాను అధ్యక్షుడిగా ఉన్న సమయంలో దేశ సరిహద్దులు భద్రంగా ఉన్నాయని వ్యాఖ్యానించారు. పరోక్షంగా అక్రమ వలసలపై విరుచుకుపడ్డారు. తాను మళ్లీ గెలిస్తే ఇంధన రంగంలో దేశాన్ని స్వయంసమృద్ధిగా మారుస్తానని హామీ ఇచ్చారు. అమెరికా గ్రేట్‌ అగేన్‌ నినాదంతో ఆయన పౌరులను ఆకట్టుకునే యత్నం చేస్తున్నారు.

ఇటు బైడెన్‌ తన హయాంలో జరిగిన అభివృద్ధిని మద్దతుదారులకు వివరించారు. ఉద్యోగాల కల్పన, ద్రవ్యోల్బణం, మాదక ద్రవ్యాల నియంత్రణ, తుపాకీ విష సంస్కృతిని అరికట్టడం వంటి అంశాల్లో గణనీయ పురోగతి సాధించామని చెప్పారు. ట్రంప్‌ అధికారంలోకి వస్తే దేశం తిరిగి చీకటి రోజుల్లోకి జారుకుంటుందని పేర్కొన్నారు. ఆయన వల్ల అమెరికా ఉనికికి ముప్పు వాటిల్లినందునే నాలుగేళ్ల క్రితం తాను పోటీకి దిగాల్సి వచ్చిందని తెలిపారు.

'సివిల్​ డ్రస్సుల్లోనూ ఉండొద్దు'- భారత సైనికులపై మయిజ్జు మరోసారి అక్కసు

ఇజ్రాయెల్‌పై క్షిపణి దాడి- భారతీయుడు మృతి, మరో ఇద్దరికి గాయాలు

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.