భద్రతా వలయంలో షారుక్- రోజంతా హోటల్ గదిలోనే!- సల్మాన్ ఇంటి వద్ద కాల్పులతో పోలీసులు అలర్ట్ - firing at salman house

Shahrukh Khan Security : ముంబయిలో సల్మాన్ ఖాన్ ఇంటి వద్ద కాల్పులు నేపథ్యంలో బాలీవుడ్ బాద్ షా షారుక్ ఖాన్​కు మరింత భద్రత పెంచారు కోల్​కతా పోలీసులు. డాగ్ స్క్వాడ్​తో షారుక్ ఉంటున్న హోటల్ సమీపంలో తనిఖీలు చేపట్టారు. ఏప్రిల్ 14న సల్మాన్ ఇంటిపై కాల్పుల ఘటన తర్వాత పెరిగిన భద్రతా చర్యల కారణంగా షారుక్ తన హోటల్ గదికే పరిమితమయ్యారట.

మంగళవారం సాయంత్రం ఈడెన్ గార్డెన్స్‌లో రాజస్థాన్ రాయల్స్​తో కోల్​కతా నైట్ రైడర్స్ తలపడనుంది. ఈ మ్యాచ్​ను చూసేందుకు షారుక్ కోల్​కతాలోని హోటల్​లోనే బస చేస్తున్నారు. ఈ నేపథ్యంలో సల్మాన్​ ఖాన్​ ఇంటి వద్ద కాల్పులు జరగడం వల్ల కోల్​కతా పోలీసులు అప్రమత్తమయ్యారు. షారుక్ నివాసం ఉంటున్న హోటల్​తో పాటు ఈడెన్ గార్డెన్స్ పరిసరాల్లో భద్రతను మరింత కట్టుదిట్టం చేశారు. కింగ్ ఖాన్ తన ఐపీఎల్ జట్టు కేకేఆర్, లఖ్​నవూ సూపర్ జెయింట్స్​​తో తలపడే మ్యాచ్​ను చూసేందుకు వెళ్లి కోల్​కతాలోని ఓ హోటల్​లో ఉన్నారు. ఆ మ్యాచ్​కు షారుక్​తో పాటు ఆయన కూతురు సుహానా, కుమారుడు అబ్‌రామ్ ఖాన్ హాజరయ్యారు.

సోమవారం షారుక్ ఖాన్ తన హోటల్ గదిని విడిచిపెట్టి బయటకు రాలేదని ఆయన సన్నిహితుడు ఒకరు తెలిపారు. 'ముంబయిలో సల్మాన్ ఖాన్ నివాసం వద్ద కాల్పులు జరిగినప్పటి నుంచి కోల్​కతాలో షారుక్ భద్రతా వలయంలో కొన్ని మార్పులు జరిగాయి. షారుక్ ఖాన్ ఇంటర్నేషనల్ స్టార్. ఆయన కోల్​కతాకు వచ్చినప్పుడు ప్రత్యేక భద్రతా ఏర్పాట్లు ఉంటాయి. అయితే ఇటీవలే సల్మాన్ ఖాన్ ఇంటి వద్ద కాల్పుల ఘటనతో భద్రత మరింత కట్టుదిట్టమైంది.' అని షారుక్ సన్నిహితుడు ఒకరు ఈటీవీ భారత్​కు తెలిపారు.

అయితే, షారుక్ భద్రతా ఏర్పాట్లపై కోల్​కతా పోలీసులు అధికారికంగా ఎటువంటి ప్రకటన చేయలేదు. సల్మాన్ ఇంటి వెలుపల కాల్పుల ఘటన తర్వాత షారుక్​ ఖాన్​కు భద్రత పెంచినట్లు సంబంధిత వర్గాలు తెలిపాయి. డెల్లీ, డైసీ, పాయల్, కోరల్, షేరాతో కూడిన డాగ్ స్క్వాడ్​ను షారుక్ ఉంటున్న హోటల్ వెలుపల కాపలాగా ఉంచారు కోల్​కతా పోలీసులు. షారుక్ ఈడెన్ గార్డెన్స్​కు వెళ్లే సమయంలో కూడా భద్రతా ఏర్పాట్లు చేసినట్లు సంబంధిత వర్గాలు పేర్కొన్నాయి.

ఇంటికి వెళ్లి సల్మాన్​ను పరామర్శించిన సీఎం శిందే
మరోవైపు సల్మాన్ ఖాన్ ఇంటి వద్ద రెండు రోజుల క్రితం కాల్పుల జరిగిన నేపథ్యంలో మహారాష్ట్ర సీఎం ఏక్‌నాథ్ శిందే కండలవీరుడిని పరామర్శించారు. సల్మాన్ ఇంటికి వెళ్లి సీఎం ఏక్ నాథ్ శిందే కాల్పులపై పరామర్శించారు.

• #WATCH | Mumbai | Maharashtra CM Eknath Shinde met actor Salman Khan at his residence.
  
  Inside visuals from the residence.
  
  (Source: Eknath Shinde office) pic.twitter.com/lbMmfCOBNm

  — ANI (@ANI) April 16, 2024

కాల్పుల సమయంలో ఇంట్లోనే సల్మాన్​ - విచారణలో అనూహ్య నిజాలు! - Salman Khans House Firing Case