Road Accident In Jaipur : రాజస్థాన్, జైపుర్‌లోని మనోహర్‌పుర్-దౌసా హైవేపై ఘోర రోడ్డు ప్రమాదం జరిగింది. కారు, జీపు ఢీకొనడం వల్ల నలుగురు వ్యక్తులు మృతి చెందారు. ఆరుగురు తీవ్రంగా గాయపడ్డారు. క్షతగాత్రులను హుటాహుటిన ఆసుపత్రికి తరలించారు.
మనోహర్‌పుర్ దౌసా హైవేపై దంగర్వాడ మలుపు వద్ద, వేగంగా వచ్చిన ఓ జీపు, బొలెరోను ఢీకొట్టింది. ఈ ప్రమాదంలో రెండు వాహనాలు తీవ్రంగా దెబ్బతిన్నాయి. బొలెరో ఉన్న నలుగురు వ్యక్తులు అక్కడికక్కడే మరణించారు. వీరు దౌసా ప్రాంతానికి చెందినవారిగా పోలీసులు గుర్తించారు. ఈ ప్రమాదంలో జీపులో ప్రయాణిస్తున్న ఆరుగురు వ్యక్తులు కూడా తీవ్రంగా గాయపడ్డారు. వీరు ఉత్తరప్రదేశ్కు చెందినవారిగా చెబుతున్నారు. వీరిని సమీపంలోని ఎస్ఎంఎస్ ఆసుపత్రికి తరలించారు. స్థానికులు ఇచ్చిన సమాచారంతో పోలీసులు, వచ్చి మృతదేహాలను, క్షతగాత్రులను ఆసుపత్రికి తరలించారు. పోస్టుమార్టం అనంతరం మృతదేహాలను బంధువులకు అప్పగించనున్నట్లు వైద్యులు తెలిపారు.
టైర్ పేలి ట్రక్కును ఢీకొన్న కారు- 8మంది మృతి
మధ్యప్రదేశ్లో ఘోర రోడ్డు ప్రమాదం జరిగింది. వేగంగా వస్తున్న కారు ఓ ట్రక్కును ఢీ కొనడం వల్ల 8మంది మరణించారు. ఒకరు గాయపడ్డారు. ఈ ఘటన ఇందౌర్- అహ్మదాబాద్ జాతీయ రహదారిపై బుధవారం రాత్రి జరిగింది. సమాచారం అందుకున్న పోలీసులు ఘటనాస్థలికి చేరుకుని సహాయక చర్యలు చేపట్టారు. హుటాహుటిన క్షతగాత్రుడిని ఆస్పత్రికి తరలించారు. కారు టైర్ పేలడం వల్లే ప్రమాదం జరిగినట్లు భావిస్తున్నారు.
పోలీసులు తెలిపిన వివరాల ప్రకారం, ధార్ జిల్లాకు చెందిన కొందరు ఇందౌర్-అహ్మదాబాద్ జాతీయ రహదారిపై కారులో వెళ్తుండగా ఘటాబిలోడ్ బైపాస్ వద్ద ఈ ప్రమాదం జరిగింది. ఈ ప్రమాదంలో ఒక మహిళతో పాటు గుణ జిల్లాలో విధులు నిర్వర్తిస్తున్న ఓ పోలీసు కానిస్టేబుల్ సైతం ప్రాణాలు విడిచారు. 'మృతదేహాలు కారులో చిక్కుకున్నాయి. గ్రామస్థుల సాయంతో వాటిని అతి కష్టం మీద కారులో నుంచి తీశాం. క్షతగాత్రుడ్ని ఇందౌర్లోని ఎంవై ఆస్పత్రికి తరలించాం. అతడి పరిస్థితి విషమంగా ఉంది. మృతదేహాలకు శవ పరీక్షలు నిర్వహించి వారి కుటుంబాలకు అప్పగిస్తాం' అని పోలీసులు తెలిపారు.
ఒడిశాలో ఘోర ప్రమాదం- ఆరుగురు మృతి
Road Accident In Odisha : ఒడిశాలోని కియోంజర్ జిల్లాలో జరిగిన రోడ్డు ప్రమాదంలో నలుగురు మహిళలు సహా ఆరుగురు ప్రాణాలు విడిచారు. బుధవారం రెండు ట్రక్కుల మధ్య ఓ కారు ఇరుక్కోవడం వల్ల జరిగిందీ దుర్ఘటన. ఈ ప్రమాదంలో కారు నుజ్జునుజ్జైంది. సమాచారం అందుకున్న పోలీసులు ఘటనాస్థలికి చేరుకుని సహాయక చర్యలు చేపట్టారు. మృతదేహాలను స్వాధీనం చేసుకుని పోస్ట్ మార్టం పరీక్షలకు తరలించారు. ఈ ప్రమాదంపై కేసు నమోదు చేసుకుని దర్యాప్తు చేపట్టారు.
'జూన్ 4 తరువాత కూటమి విచ్ఛిన్నం ఖాయం' - మోదీ - PM Modi Slams Opposition
