காதல் திருமணம் செய்த ஒரே மாதத்தில் தூக்கில் தொங்கிய இளம்பெண்!

திருப்பத்தூர் மாவட்டம், வாணியம்பாடி அடுத்த திம்மாம்பேட்டை சிமிக்கம்பட்டு பகுதியைச் சேர்ந்தவர் குமார். கூலித்தொழிலாளியான இவர் சில ஆண்டுகளுக்கு முன் இறந்துவிட்டார். இவரது மகன் சிலம்பரசன் (23 ). சிலம்பரசன் சென்னையில் கார் ஓட்டுநராகப் பணியாற்றி வருகின்றார். சிலம்பரசன் ஆந்திர மாநிலம் குண்டலம் மடுவு பகுதியைச் சேர்ந்த விவசாயி ஆனந்தனின் இரண்டாவது மகள் அகல்யாவை (19) காதலித்து திருமணம் செய்து கொண்டார்.

இருவரும் பெற்றோர் எதிர்ப்பை மீறி யாருக்கும் தெரியாமல் வீட்டை விட்டு, ஓடிச் சென்று கோயிலில் திருமணம் செய்துகொண்டனர். ஒரு மாத காலமாக பூந்தென்றலாய் வாழ்ந்து வந்த அகல்யாவின் திருமண வாழ்க்கையில், மாமியார் என்ற போர்வையில் வரதட்சணை புயல் அடிக்க ஆரம்பித்தது. அகல்யா மாமியார் வசந்தாவுக்கும் (பெயர் மாற்றப்பட்டுள்ளது ) அதே பகுதியைச் சேர்ந்த வேறு ஒருவருக்கும் திருமணத்தைத் தாண்டிய உறவு இருந்து வந்ததாகத் தெரிகிறது.

இந்தச் சம்பவம் அகல்யாவிற்கு தெரிய வரவே, அவரது மாமியார் வசந்தா, அகல்யாவை வரதட்சணை என்ற போர்வையில் கொடுமை செய்து வந்துள்ளார். அதனோடு காதலித்து திருமணம் செய்துகொண்ட கணவனும் அகல்யாவை கொடுமைப்படுத்தியதால், பெற்றோர் வீட்டிற்கும் செல்ல முடியாமல் ஒவ்வொரு நாளும் கொடுமையை அனுபவித்து வந்துள்ளார் அகல்யா.

இந்நிலையில், நேற்று முன்தினம் திடீரென ஏற்பட்ட குடும்பச் சண்டையில் வாக்குவாதம் முற்றி போகவே, அகல்யாவை அவருடைய மாமியாரும், கணவரும் தாக்கியதில் சம்பவ இடத்திலேயே உயிரிழந்துள்ளார்.

இந்நிகழ்வை யாருக்கும் தெரியாதவாறு அகல்யாவின் சடலத்தை அவருடைய வீட்டில் கயிற்றில் கட்டித் தொங்க விட்டு சிலம்பரசனும், அவரது தாயாரும் தலைமறைவாகியுள்ளனர். அகல்யா இறந்து கிடந்ததைக் கண்டு அதிர்ச்சியடைந்த அப்பகுதி மக்கள் திம்மாம்பேட்டை காவல் நிலையத்தில் புகாரளித்தனர்.

புகாரின் பேரில் சம்பவ இடத்திற்கு வந்த காவல்துறையினர், அகல்யாவின் உடலைக் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதனையடுத்து அகல்யாவின் பெற்றோருக்குத் தகவல் கொடுக்கப்பட்டது. மேலும், இச்சம்பவம் குறித்து வழக்குப் பதிவு செய்த காவல் துறையினர், தலைமறைவாகியுள்ள சிலம்பரசன் மற்றும் அவரது தாயாரையும் தேடி வருகின்றனர்.

காதலித்து திருமணம் செய்துகொண்ட ஒரே மாதத்தில் மாமியாரின் திருமணத்தைத் தாண்டிய உறவுக்கு இடையூறாக இருந்த மருமகள், வரதட்சணை எனும் கொடுமைக்கு ஆளாக்கப்பட்டு, கொன்று தூக்கில் தொங்கவிடப்பட்டதாகவும், அகல்யாவை கொன்று நாடகமாடிய கணவன் சிலம்பரசன் மற்றும் அவரது தாயாருக்கும் கடுமையான தண்டனை வழங்க வேண்டும் என்றும் அகல்யாவின் உறவினர்கள் கண்ணீர் மல்க தெரிவித்தனர்.

அகல்யாவின் சடலம் ஆந்திரா மாநிலம் குண்டலம் மடுவு பகுதிக்கு எடுத்துச் சென்று உடல் தகனம் செய்யப்பட்டது.

இதையும் படிங்க: திருவள்ளூரில் பயங்கரம்: பைக் மீது வெடிகுண்டு தாக்குதல் - உடல் சிதறி உயிரிழந்த 2 இளைஞர்கள்!