சேலம் டவுன் பகுதியில் உள்ளது முள்ளுவாடி கேட் ரயில்வே பாதை. இந்தப் பகுதியில் ரயில்வே மேம்பாலம் கட்டப்பட்டு வருகிறது. ரயில்வே மேம்பாலம் கட்டத் தொடங்கி இரண்டு வருடத்திற்கு மேலாகியும் இன்னும் பாலப் பணிகள் நிறைவடையவில்லை. இதனால் முள்ளுவாடி கேட் பகுதியில் உள்ள மற்றொரு பாதையில் வாகனங்கள் சென்று வருகிறது.
ஒருவழிப்பாதையாக இருந்ததில் பாலம் கட்டப்பட்டு வருவதால், வாகன ஓட்டிகள் இந்த வழியே சென்று மீண்டும் இதே வழியில் திரும்பிச் செல்கின்றனர். இதனால் முள்ளுவாடி கேட் பகுதியில் எப்போதும் இல்லாத அளவிற்கு போக்குவரத்து நெரிசல் ஏற்படுகிறது. வாகன ஓட்டிகளும் மிகுந்த சிரமத்திற்குள்ளாகி வருகின்றனர்.
காலை 8.30 மணி, பகல் 1.30 மணி, இரவு 9.30 மணி ஆகிய நேரங்களில் ரயில்கள் இந்த வழியே சென்று வருவதால் ரயில்வே கேட் அடைக்கப்படுகிறது. முள்ளுவாடி கேட் பகுதியை ஒரு வழிப்பாதையாக மாற்ற வேண்டும் என்று பொதுமக்களும், சமூக ஆர்வலர்களும் அறிவுறுத்தி வருகின்றனர்.
மாவட்ட ஆட்சித் தலைவர் அலுவலகம் அருகேயுள்ள பெரியார் மேம்பாலம் வழியே வாகனங்கள் சென்று அண்ணா பூங்கா, சுந்தர் லாட்ஜ் வழியே வாகனங்கள் செல்லவும், சுந்தரி லாட்ஜ் பகுதியிலிருந்து முள்ளுவாடி கேட் வழியே வாகனங்கள் டவுனுக்கு வரவும் வழிவகை செய்ய வேண்டும் எனவும் கோரிக்கை விடுத்தனர்.
முள்ளுவாடி ரயில் பாதையை ஒரு வழிப்பாதையாக மாற்றினால் போக்குவரத்து நெரிசல் குறைய வாய்ப்புள்ளது. இதனைக் கருத்தில் கொண்டு ஈடிவி பாரத் செய்தி வெளியிட்டிருந்தது. இதையடுத்து ஈடிவி பாரத் செய்தியின் எதிரொலியாக சில நாட்களில் சேலம் மாநகர காவல்துறை முள்ளுவாடி கேட் பாதையை ஒரு வழிப்பாதையாக மாற்றம் செய்துள்ளது குறிப்பிடத்தக்கது.
