சென்னை: இயக்குனர் வெற்றிமாறன் தமிழ் சினிமாவில் முன்னணி இயக்குனராக அறியப்படுகிறார். இவரது இயக்கத்தில் வெளிவந்த ஆடுகளம், விசாரணை, வட சென்னை, அசுரன் போன்ற படங்கள் ரசிகர்கள் மத்தியில் மிகுந்த வரவேற்பைப் பெற்றது. அதுமட்டுமின்றி ஆடுகளம், விசாரணை ஆகிய படங்கள் தேசிய விருதும் பெற்றன. வழக்கமாக சிறுகதைகள் மற்றும் நாவல்களை வைத்து திரைப்படங்கள் எடுப்பவர் வெற்றி மாறன். தற்போது ஜெயமோகனின் துணைவன் என்ற சிறுகதையை மையமாக கொண்டு "விடுதலை" என்ற தலைப்பில் படமாக எடுத்து வருகிறார்.
காவல் துறையை கதைக்களமாக கொண்ட இந்தப் படத்தில் பிரமாண்ட சண்டைக் காட்சிகள் இடம்பெற்றுள்ளன. ஆர்எஸ் இன்ஃபோடெயின்மென்ட் & ரெட் ஜெயண்ட் மூவிஸ் சார்பில் எல்ரெட் குமார் & உதயநிதி ஸ்டாலின் இணைந்து இந்த படத்தை தயாரித்துள்ளனர். இந்த படத்தில் விஜய்சேதுபதி, சூரி ஆகியோர் நடித்துள்ளனர். இரண்டு பாகங்களாக இப்படம் தயாராகிறது. இளையராஜா இசை அமைத்துள்ளார்.
இப்படத்தின் படப்பிடிப்பு சிறுமலை, கொடைக்கானல், ஈரோடு, சத்தியமங்கலம் உள்ளிட்ட வனப்பகுதிகளில் நடைபெற்றது. சூரி கதையின் நாயகனாக நடிப்பதாலும் வெற்றிமாறன் இயக்குநர் என்பதாலும் இப்படத்திற்கு மிகப் பெரிய எதிர்பார்ப்பு ஏற்பட்டுள்ளது. இளையராஜா இசையில் சமீபத்தில் இசை வெளியீட்டு விழா நடைபெற்றது. இதில் காட்டுமல்லி என்ற பாடல் தற்போது ரசிகர்களின் ஃபேவரைட் பாடலாக உள்ளது.
மேலும் பவானி ஸ்ரீ, பிரகாஷ் ராஜ், கவுதம் வாசுதேவ் மேனன், ராஜீவ் மேனன், சேத்தன் உள்ளிட்ட முன்னணி நடிகர்கள் இப்படத்தில் நடித்துள்ளனர். வேல்ராஜ் ஒளிப்பதிவு செய்துள்ளார். கடந்த ஒரு வருடத்திற்கு மேல் இப்படத்தின் படப்பிடிப்பு நடைபெற்றது.
விஜய் சேதுபதி வாத்தியார் என்ற கதாபாத்திரத்தில் நடித்துள்ளார். இப்படம் எப்போது வெளியாகும் என்று எதிர்பார்ப்பு ஏற்பட்டிருந்த நிலையில் தற்போது இதன் வெளியீட்டு தேதி அறிவிக்கப்பட்டுள்ளது. அதன்படி இந்த மாதம் 31ம் தேதி விடுதலை பாகம் ஒன்று திரையரங்குகளில் வெளியாக உள்ளதாக அறிவிக்கப்பட்டுள்ளது. இதனால் இப்படத்துக்கு எதிர்பார்ப்பு அதிகரித்துள்ளது. படத்தின் இசை வெளியீட்டு விழாவும் ரசிகர்களை மகிழ்ச்சியில் ஆழ்த்தியது.
ஒரு வழியாக விடுதலையின் ரிலீஸ் நெருங்கியுள்ள நிலையில், அடுத்தடுத்து ஆர்வத்தை தூண்டும் அறிவிப்புகளை வெற்றிமாறன் வெளியிட்டுள்ளார். நடிகர் சூர்யா நடிப்பில் வாடிவாசல் என்ற படத்தை வெற்றி மாறன் இயக்குகிறார். அதனை தொடர்ந்து வட சென்னை படத்தின் இரண்டாம் பாதியை இயக்க உள்ளதாக சமீபத்தில் நடந்த விடுதலை படத்தின் இசை வெளியீட்டு விழாவில் வெற்றி மாறன் தெரிவித்து இருந்தார். இந்த செய்தி நடிகர் தனுஷ் ரசிகர்களை உற்சாகத்தில் ஆழ்த்தியுள்ளது.
இதையும் படிங்க: PS 2: பொன்னியின் செல்வன் இரண்டாம் பாகத்தின் 'அக நக' பாடல் வெளியீடு
