ETV Bharat / புறம்போக்கு நாயே

புறம்போக்கு நாயே

கடுத்துக் கிடந்த பாதம் நகரமெங்கும் ஓடி அலைந்தான் ஓர் முழுக்கைச் சட்டையணிந்த நவீன நாடோடி அவன் திரிந்த நகரம் அது நவீனத்தார்களின் காடு தன் பசியெனும் பெருங்கனலை ஆற்ற ஓர் சோலைவனம் தேடியலைந்தான் அந்தச் சோலைவனப் பாதையின் வழிவிட்டு அவன் விழி நீங்கவில்லை வழியெங்கும் இவன் கண்டதெல்லாம் கால்கள் மட்டுமே தேய்ந்துத் கிழிந்தக் கால்கள், பாதம் கடுத்த கால்கள், நிலவாய் மிளிர்ந்த கால்கள், பிளவாய் முதிர்ந்த கால்கள் என அத்தனை வகை கால்களை அக்கணம் வரைக் கண்டதில்லையவன் இவன் கண்ட கால்கள் எதுவும், எதற்கும் நிற்கவில்லை ரயில் சத்தம் கேட்டால் ஓர் ஓட்டம், மணி சத்தம் கேட்டால் ஓர் ஒட்டம், தடி சட்டம் கேட்டால் ஓர் ஓட்டம் என ஓட்டங்களிலும் அன்று அவன் வேற்றுமைகள் கண்டான் அத்தனை சத்தங்களுக்கும் ஓர் மைய சத்தம் பசி எனும் ரீங்காரம் தான் அச்சத்தம் செவியில் ஓயாது ஒலிப்பது இந்த நவீனத்தார்களின் அன்றாடம் அச்சத்தம் நவீனத்தார்களின் செவிகளில் சமமாக ஒளிக்கும் ஓர் பொதுவுடமைவாதி, அச்சத்தம் எவர் செவிக்கும் இரக்கம் காண்பிக்காததோர் சர்வாதிகாரி இத்தனை ஓலங்களுக்கு மத்தியிலும் தன் கனல் சூட்டில் வெந்து நடந்தான் நாடோடி நகரமெங்கும் அவன் கனலை அணைக்க ஓர் சொட்டு நீருமில்லை அந்நகரத்து நவீனத்தாருக்கு எவர் கனல் அணைக்கவும் வழிதெரியாது தினப் பகலில் வெந்து வாடிய உடல்களை இரவுக் காற்றாடிகளில் ஆற்றுவர் அந்த நவீன நாடோடியின் பலகாலங்கள் நொடிப்பொழுதென இந்நகரத்தில் கழிய என்றோ ஓர் நாள் ஓர் தனிப்பட்ட இடுகாட்டில், அந்நாடோடி பாதம் மட்டும் வெந்திதாது இருந்ததாய் இரு வெட்டியான்கள் பேசிக்கொண்டனர் அவனின் பெருங்கனலில் அவன் பாதம் மட்டும் எப்படி எரியாதிருந்ததோ...?

அரசு அதிகாரியை மிரட்டும் திமுக பிரமுகர்....

Sep 28, 2022

Copyright © 2024 Ushodaya Enterprises Pvt. Ltd., All Rights Reserved.