ସୁନ୍ଦରଗଡ: ବଣାଇଁ ବନଖଣ୍ଡ ଟିକାୟତପାଲି ଥାନା ସାନଦଲକି ଗ୍ରାମରେ ହାତୀ ଆକ୍ରମଣରେ ମାଆର ମୃତ୍ୟୁ(Elephant Attack In Sundragarh) ଘଟିଥିବାବେଳେ ଅଳ୍ପକେ ବର୍ତ୍ତି ଯାଇଛି ଝିଅ । ଗାଁର ସମ୍ବାରି ଜାରିକା ନାମକ ଜଣେ ମହିଳାଙ୍କ ମୃତ୍ୟୁ ଘଟିଥିବା ଜଣାପଡିଛି ।
ଗତକାଲି(ଶନିବାର) ବିଳମ୍ବିତ ରାତିରେ ଘଟିଛି ଏହି ଅଘଟଣ । ଗ୍ରାମରେ ହାତୀ ଉପଦ୍ରବ ଜାରି ରହିଥିବାବେଳେ ମଧ୍ୟରାତ୍ରରେ ସମ୍ବାରୀଙ୍କ ଘର ଭାଙ୍ଗି ଥିଲା ହାତୀପଲ । ଘର ଭଙ୍ଗାରୁଜା ଶବ୍ଦ ଶୁଣି ସମ୍ବାରୀ ଏବଂ ତାଙ୍କ ଝିଅ ଜୀବନ ବିକଳରେ ଦୌଡି ପଳାଇବାକୁ ଚେଷ୍ଟା କରିଥିଲେ ମଧ୍ୟ ହାତୀ ହାବୁଡରେ ପଡିଯାଇଥିଲେ ସମ୍ବାରୀ । ଫଳରେ ଘଟଣାସ୍ଥଳରେ ହାତୀ ସମ୍ବାରୀଙ୍କୁ ଦଳି ଚକଟି ଦେଇ ଥିବାବେଳେ ଅଳ୍ପକେ ବର୍ତ୍ତି ଯାଇଛି ତାଙ୍କ କୁନି ଝିଅ ।
ଅନ୍ୟପଟେ ସମ୍ବାରୀଙ୍କ ସ୍ୱାମୀ ଅନ୍ୟତ୍ର କାମ କରୁଥିବାରୁ ସେ ଘରେ ଅନୁପସ୍ଥିତ ଥିଲେ । ହାତୀ ଅଘଟଣ ଖବର ପାଇ ବଣାଇଁ ବନାଞ୍ଚଳ ସରସରା ସେକ୍ସନର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିବା ଜଣାପଡିଛି l
ସୁନ୍ଦରଗଡରୁ ହରିହର ଦାସମହାପାତ୍ର, ଇଟିଭି ଭାରତ
