ରାଉରକେଲା: ମୋବାଇଲ ସାଜିଲା କାଳ, ଘରେ ମୋବାଇଲ ନଦେବାରୁ ଜୀବନ ହାରିଲେ ନାବାଳିକା ଛାତ୍ରୀ । ରାଉରକେଲା ସହର ଛେଣ୍ଡ ଅଞ୍ଚଳରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ପରିବାର ଲୋକେ ମୋବାଇଲ ଫୋନ ପାଇଁ ବାରଣ କରିବାରୁ ଛାତ୍ରୀ ଜଣକ ଏଭଳି ଚରମ ନିଷ୍ପତ୍ତି ନେଇଛନ୍ତି । ଘରୁ ଝୁଲନ୍ତା ଅବସ୍ଥାରେ ନାବାଳିକାଙ୍କ ମୃତଦେହ ଉଦ୍ଧାର ହୋଇଛି । ଏହି ଘଟଣା ନେଇ ପୋଲିସ ତଦନ୍ତ ଜାରି ରଖିଛି ।
ସୂଚନା ଅନୁଯାୟୀ, ରାଉରକେଲା ସହର ଛେଣ୍ଡ ଅଞ୍ଚଳର ଜଣେ ପଞ୍ଚମ ଶ୍ରେଣୀ ଛାତ୍ରୀ ମୋବାଇଲ ଚଲାଇବା ପାଇଁ ଘରେ ଜିଦ କରିଥିଲେ । କିନ୍ତୁ ପରିବାର ଲୋକେ ଫୋନ ଦେବାକୁ ବାରଣ କରିଥିଲେ । ଯାହାକୁ ନେଇ ଘରେ ପାଟିତୁଣ୍ଡ ମଧ୍ୟ ହୋଇଥିଲା । ରବିବାର ନାବାଳିକାଙ୍କ ବାପା ତାଙ୍କ ମାମୁ ଘରେ ଛାଡ଼ି ଆସିଥିଲେ । ସେଠାରେ ତାଙ୍କୁ ବୁଝାସୁଝା କରି ବାପା ଘରକୁ ଫେରି ଆସିଥିଲେ । କିନ୍ତୁ ଏହାର କିଛି ଘଣ୍ଟା ବିତିବା ପରେ ଝୁଲନ୍ତା ଅବସ୍ଥାରେ ଛାତ୍ରୀଙ୍କ ମୃତଦେହ ଦେଖିବାକୁ ପାଇଥିଲେ ମାମୁ ଘର ଲୋକେ । ଏହାପରେ ତାଙ୍କୁ ଡାକ୍ତରଖାନା ନିଆଯାଇଥିଲା । ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି । ଅନ୍ୟପଟେ ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି । ତେବେ ସାମାନ୍ୟ ମୋବାଇଲ ପାଇଁ ପଞ୍ଚମ ଶ୍ରେଣୀ ଛାତ୍ରୀଙ୍କ ଏଭଳି ଚରମ ନିଷ୍ପତ୍ତି ବର୍ତ୍ତମାନ ରାଉରକେଲା ସହରରେ ଚର୍ଚ୍ଚାର ବିଷୟ ପାଲଟିଛି ।
ତେବେ ଏ ସମ୍ପର୍କରେ ଚିନ୍ତା ପ୍ରକଟ କରିଛନ୍ତି ଶିଶୁ କଲ୍ୟାଣ ବିଶେଷଜ୍ଞ । ଏନେଇ ସେ କହିଛନ୍ତି, ବର୍ତ୍ତମାନ ସମୟରେ ଶିଶୁମାନେ ମୋବାଇଲ ପ୍ରତି ଅଧିକ ଆକୃଷ୍ଟ ହୋଉଛନ୍ତି। ବାପା,ମାଆ ଏହା ପ୍ରତି ଅଧିକ ଯତ୍ନବାନ ହେବା ଜରୁରୀ । କୋରୋନା ସମୟଠାରୁ ପିଲାମାନେ ମୋବାଇଲ ପ୍ରତି ଆକୃଷ୍ଟ ହେଲେ । ମାତ୍ର ଏଥିପ୍ରତି ଅଭିଭାବକ ଯତ୍ନବାନ ହେବାର ଆବଶ୍ୟକତା ରହିଛି । ପିଲାଙ୍କୁ ଘରେ ବାନ୍ଧି ନରଖି ଅନ୍ୟ କାମରେ ବ୍ୟସ୍ତ ରଖିବା ଉଚିତ । ଏଥି ପ୍ରତି ସାବଧାନ ହେବା ସହ ପିଲାଙ୍କ ନଜରରୁ କିଭଳି ମୋବାଇଲକୁ ଦୂରେଇ ରଖାଯିବ ସେନେଇ ଚେଷ୍ଟା କରିବା କଥା । ବର୍ତ୍ତମାନ ଯୁଗରେ ମୋବାଇଲ ବିନା କିଛି କାମ କରିବା ଅସମ୍ଭବ । ମୋବାଇଲ ଫୋନ ମଣିଷର ଏକ ଅତ୍ୟାବଶ୍ୟକୀୟ ସାମଗ୍ରୀ ଭାବେ ପରିଗଣିତ ହୋଇଛି ।" ତେଣୁ ଏଥି ପ୍ରତି ଉଭୟ ପିଲା ଓ ଅଭିଭାବକ ସତର୍କ ରହିବାର ଆବଶ୍ୟକତା ଅଛି ବୋଲି ଶିଶୁ କଲ୍ୟାଣ ବିଶେଷଜ୍ଞ କହିଛନ୍ତି ।
ଇଟିଭି ଭାରତ, ରାଉରକେଲା
