ସୁନ୍ଦରଗଡ: ବଡଗାଁ ପୋଲିସ ଓ ତହସିଲଦାର ମିଳିତ ଭାବେ ଏକ ନକଲି କ୍ଲିନିକ ଉପରେ ଚଢାଉ କରି କ୍ଲିନିକକୁ ସିଲ କରିବା ସହ କ୍ଲିନିକକୁ ଚଳାଉଥିବା ଜଣେ କ୍ୱାକ ନକଲି ଡାକ୍ତରକୁ ଗିରଫ କରିଛନ୍ତି । ବଡଗାଁର କରୁଣାମୟୀ ମେଡିକାଲ କ୍ଲିନିକ ନାମକ ଏକ ବେଆଇନ ମେଡିକାଲ ଷ୍ଟୋର ଉପରେ ଆଜି ଚଢାଉ ପରେ ଏପରି କାର୍ଯ୍ୟାନୁଷ୍ଠାନ ହୋଇଥିବା ଦେଖିବାକୁ ମିଳିଛି ।
ଚଢାଉ ସମୟରେ କ୍ୱାକ ନାରଦ ବିଶ୍ୱାଳ କୌଶଳ କରି ପଳାଇବାକୁ ଚେଷ୍ଟା କରୁଥିଲା । ତେବେ ପୋଲିସ ବଳ ତାକୁ କାବୁ କରିବା ସହ ସମସ୍ତ ଘଟଣା ପଦାକୁ ଆସିଥିଲା । ସେହି ନକଲି ଡାକ୍ତରଙ୍କର ଡାକ୍ତର ହେବାର କୌଣସି ଯୋଗ୍ୟତା ପ୍ରମାଣ ପତ୍ର ନଥିଲା କିମ୍ବା ସେହି କ୍ଲିନିକ ଚଳାଇବାର କୌଣସି ଅନୁମତି ମଧ୍ୟ ନଥିବା ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ପୋଲିସ । କୋରୋନା ମାହାମରୀ ସମୟରେ ସଂପୃକ୍ତ ନକଲି ଡାକ୍ତର ଲୋକଙ୍କୁ ଭୁଆଁ ବୁଲାଇ ଶୋଷଣ କରି ଚାଲୁଥିବା ଅଭିଯୋଗ ଏସପିଙ୍କ ନଜରକୁ ଆସିଥିଲା ।
ଯୋଜନା ମୁତାବକ ଉକ୍ତ କ୍ଲିନିକ ଉପରେ ଚଢାଉ ହେବା ସହ ସେହି କ୍ଲିନିକକୁ ସିଲ କରାଯାଇଛି । ତେବେ ଗିରଫ ନକଲି ଡାକ୍ତରର ଘର ବଡଗାଁ ଥାନା ଅନ୍ତର୍ଗତ ପଞ୍ଚରା ବୋଲି ଜଣାପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
