ରାଉରକେଲା: ସୁନ୍ଦରଗଡ଼ ଜିଲ୍ଲାକୁ ୫ଟି ସଚିବଙ୍କ ମାରାଥନ ଗସ୍ତ । ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ପାଣ୍ଡିଆନ ସୁନ୍ଦରଗଡ ଗସ୍ତର ଦ୍ବିତୀୟ ଦିନରେ ସବ ଡିଭିଜନର ବିଭିନ୍ନ ବ୍ଲକ ତଥା ବିଭିନ୍ନ ଅଞ୍ଚଳ ପରିଦର୍ଶନ କରିଥିଲେ । ରାଜଗାଙ୍ଗପୁର ସ୍ଥିତ ଘୋଘର ମନ୍ଦିର ପରିଦର୍ଶନ କରିବା ସହ ମନ୍ଦିର ପୂଜକ ତଥା ମନ୍ଦିର କମିଟି ସହ ମନ୍ଦିରର ବିକାଶ ସମ୍ପର୍କରେ ଆଲୋଚନା କରିଥିଲେ ।
ମନ୍ଦିର ପରିସର ଉନ୍ନତିକରଣ ତଥା ପାର୍କିଂ ବ୍ୟବସ୍ଥା, ମନ୍ଦିରରେ ବାର୍ଷିକ ମେଳା ନିମନ୍ତେ ଆନୁସାଙ୍ଗୀକ ବ୍ୟବସ୍ଥା କରିବା ସହିତ ଅଞ୍ଚଳବାସୀଙ୍କର ଥିବା ରହିଥିବା ଦାବିକୁ ନେଇ ଏକ ବିସ୍ତୃତ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ । ପରେ ପରେ ଆମ ହସ୍ପିଟାଲ ଯୋଜନା ଅନ୍ତର୍ଗତରେ ରୂପାନ୍ତରଣ ହେବାକୁ ଥିବା ରାଜଗାଙ୍ଗପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିଦର୍ଶନ କରିଥିଲେ । ଏହାସହ ଡାକ୍ତର, କର୍ମଚାରୀ ଏବଂ ରୋଗୀଙ୍କ ସହ ଆଲୋଚନା କରିଥିଲେ ଏବଂ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚାଲିଥିବା ଅନ୍ୟାନ୍ୟ ବିକାଶମୂଳକ କାର୍ଯ୍ୟର ପରିଦର୍ଶନ କରିଥିଲେ । ଜାରି ରହିଥିବା କାର୍ଯ୍ୟକୁ ତ୍ବରାନ୍ବିତ କରି ଶୀଘ୍ର ସମାପ୍ତ କରିବା ପାଇଁ ନିର୍ଦ୍ଦେଶ ଦେଇଥିଲେ ।
ସେହିପରି ରାଜଗାଙ୍ଗପୁର ରେଲୱେ ଓଭର ବ୍ରିଜ କାର୍ଯ୍ୟ ପରିଦର୍ଶନ କରିବା ସହ ସମସ୍ତ ହିତାଧିକାରୀମାନଙ୍କ ସହ ଉପଯୁକ୍ତ ସମନ୍ଵୟ ରକ୍ଷା କରି ଜମି ଅଧିଗ୍ରହଣ କାର୍ଯ୍ୟକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଥିଲେ । ପରେ ପରେ 5T ସଚିବ ଟାଙ୍ଗରପାଲି ବ୍ଲକ ସ୍ଥିତ ବେଲସରା ଶିବ ମନ୍ଦିର ପରିଦର୍ଶନ କରିଥିଲେ । ମନ୍ଦିରର ନବୀକରଣ, ଶିଶୁମାନଙ୍କ ନିମନ୍ତେ ପାର୍କ, ପାଚେରୀ ନିର୍ମାଣ, ଗେଟୱେ, ପାହାଚ, 5ଟି ପୋଖରୀକୁ ମିଶାଇ ଏକ ଜଳ ଭଣ୍ଡାର, ନୌକା ବିହାର ବ୍ୟବସ୍ଥା, ଦୁଇଟି ପାହାଡ଼ରେ ରୋପୱେ ବ୍ୟବସ୍ଥା ଆଦି ବିସ୍ତୃତ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ ।
ହେମଗିର ବ୍ଲକ ପରିଦର୍ଶନ ସମୟରେ 5T ସଚିବ ମିଶନ ଶକ୍ତି କାଫେକୁ ଯାଇଥିଲେ ଏବଂ ମିଶନ ଶକ୍ତିର ସଦସ୍ୟମାନଙ୍କ ସହ ଆଲୋଚନା କରିଥିଲେ । ଏହାପରେ ସେ ହେମଗିର ସ୍ଥିତ ପଞ୍ଚାୟତ ସମିତି କନିଷ୍ଠ ମହାବିଦ୍ୟାଳୟ ପରିଦର୍ଶନରେ ଯାଇଥିଲେ ଏବଂ ଅଧ୍ୟକ୍ଷ, ଅଧ୍ୟାପକଙ୍କ ସହ ଆଲୋଚନା କରିଥିଲେ । ସେହି ସମୟରେ ନୂତନ କଲେଜ ବିଲଡ଼ିଂ, ବାଳକ ଓ ବାଳିକାଙ୍କ ନିମନ୍ତେ ଛାତ୍ରାବାସ ବ୍ୟବସ୍ଥା, 2 ସ୍ତରରେ ବିଜ୍ଞାନ ଓ ବାଣିଜ୍ୟ ଷ୍ଟ୍ରିମ୍, ଡିଗ୍ରୀ କଲେଜ, ଖେଳ ପଡିଆର ବିକାଶ, ସ୍ମାର୍ଟ କ୍ଲାସ ରୁମ, ଅଡିଟୋରିଆମ, ଲାଇବ୍ରେରୀ ଆଦିକୁ ନେଇ ଏକ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ ।
ପରେ ପରେ କନିକା କଟା ଟ୍ୟାଙ୍କର ସୌନ୍ଦର୍ଯ୍ୟକରଣ କାର୍ଯ୍ୟ ନିରୀକ୍ଷଣ କରିଥିଲେ ଏବଂ ସମସ୍ତ ଆନୁସଙ୍ଗିକ ବ୍ୟବସ୍ଥା ସହ ରୁରାଲ ପାର୍କର ବିକାଶ, ଜଳାଶୟର ଉନ୍ନତିକରଣ ତଥା ସୌନ୍ଦର୍ଯ୍ୟକରଣ, ବୃକ୍ଷ ରୋପଣ ଆଦି ପାଇଁ ନିର୍ଦ୍ଦେଶ ଦେଇଥିଲେ । ବଲିଶଙ୍କରା ବ୍ଲକ ଅନ୍ତର୍ଗତ ଦେଓଭୁବନପୁର ସ୍ଥିତ କୁକୁଡ଼ା ନାଲା ଡ୍ୟାମ୍ ପରିଦର୍ଶନ କରିଥିଲେ ଏବଂ ହିତାଧିକାରୀମାନଙ୍କ ସହ ଆଲୋଚନା କରିଥିଲେ । ତିଲେଇକାଣୀଏସ୍.ଏସ୍. ଡି. ବାଳିକା ଉଚ୍ଚ ବିଦ୍ୟାଳୟ ପରିଦର୍ଶନ କରି ଶିକ୍ଷକ/ ଶିକ୍ଷୟତ୍ରୀମାନଙ୍କ ସହିତ ଆଲୋଚନା କରିଥିଲେ ।
ପରେ ପରେ 5T ସଚିବ ସୁନ୍ଦରଗଡ଼ ସହର ସ୍ଥିତ ସମଲେଇ ମନ୍ଦିର ପରିଦର୍ଶନ କରି ମନ୍ଦିର ପୂଜକ ତଥା ଅନ୍ୟାନ୍ୟ ହିତାଧିକାରୀମାନଙ୍କ ସହ ମନ୍ଦିରର ବିଭିନ୍ନ ଉନ୍ନୟନ ଦିଗରେ ଆଲୋଚନା କରିଥିଲେ ଏବଂ ମନ୍ଦିରର ବିକାଶ ଓ ନଦୀ କୂଳର ବିକାଶ ଦିଗରେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ । ସରକାରୀ ମହିଳା ମହାବିଦ୍ୟାଳୟ ପରିଦର୍ଶନରେ ଯାଇ ଅଧ୍ୟକ୍ଷ, ଅଧ୍ୟାପକ, ଷ୍ଟାଫ ଓ ଛାତ୍ରୀମାନେମାନଙ୍କ ସହ ଆଲୋଚନା କରିଥିଲେ ଏବଂ 5T ଶୈଳୀରେ ତୁରନ୍ତ ସ୍ମାର୍ଟ କ୍ଲାସ, ଇ-ଲାଇବ୍ରେରୀ, ଲାବୋରଟୋରୀ ଆଦି ବ୍ୟବସ୍ଥା କରିବାକୁ କହିଥିଲେ । କ୍ଷୁଦ୍ର ଜଳସେଚନ ପ୍ରକଳ୍ପ ଗୁରୁଲିଜୋର ନାଳ ପରିଦର୍ଶନରେ ଯାଇ ପ୍ରକଳ୍ପର ଉଦ୍ଦେଶ୍ୟ ଓ ଉପକାରିତା ସମ୍ପର୍କରେ ପଚାରିଲେ ବୁଝିଥିଲେ ଏବଂ ଉତ୍ତମ ଜଳସେଚନ ନିମନ୍ତେ ଶୀଘ୍ର କେନାଲ ଓ ଡ୍ୟାମର ମରାମତି, ନବୀକରଣ ତଥା ପୁନରୁଦ୍ଧାର ପାଇଁ ନିର୍ଦେଶ ଦେଇଥିଲେ ।
5T ସଚିବଙ୍କ ସୁନ୍ଦରଗଡ ଗସ୍ତ ସମୟରେ କ୍ରୀଡ଼ା ଓ ଯୁବ ବ୍ୟାପାର ସଚିବ ଆର୍. ଭିନିଲ କ୍ରିଷ୍ଣା, ଜିଲ୍ଲାପାଳ ପରାଗ ଗାଭାଲି, ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ମନୋଜ ମହାଜନ, ଅତିରିକ୍ତ ଜିଲ୍ଲାପାଳ ଅଭିମନ୍ୟୁ ବେହେରା ଓ ରବି ନାରାୟଣ ସାହୁ, ସଦର ଉପ ଜିଲ୍ଲାପାଳ ଦାସରଥି ସରାବୁ, ସମ୍ପୃକ୍ତ ବ୍ଲକର ଗୋଷ୍ଠୀ ଉନ୍ନୟନ ଅଧିକାରୀ, ତହସିଲଦାର, ବିଭାଗୀୟ ଅଧିକାରୀ ଆଦି ଉପସ୍ଥିତ ଥିଲେ ।
ଇଟିଭି ଭାରତ, ରାଉରକେଲା
