ସୁବର୍ଣ୍ଣପୁର: ଜିଲ୍ଲା କୋଟସମଲାଇର ପାତାଳୀ ଶ୍ରୀକ୍ଷେତ୍ରରେ ପାରିପାର୍ଶ୍ବିକ ବିକାଶ କାର୍ଯ୍ୟର ଅଗ୍ରଗତି ହୋଇ ପାରୁ ନଥିବା ଅଭିଯୋଗ ହେଉଛି । ପର୍ଯ୍ୟଟକ ଓ ଶ୍ରଦ୍ଧାଳୁମାନଙ୍କୁ ଆକର୍ଷିତ କରିବା ପରି ପ୍ରକଳ୍ପ କାର୍ଯ୍ୟ ଆରମ୍ଭ ହୋଇ ପାରୁନାହିଁ । ଗତ ପ୍ରାୟ ଚାରି ବର୍ଷ ତଳେ ପାତାଳୀ ଶ୍ରୀକ୍ଷେତ୍ରରେ ରୋପ ୱେ ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା ।
2019 ଫେବୃଆରୀ 11ତାରିଖରେ ତତ୍କାଳୀନ ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ କିଶୋର ମହାନ୍ତି, ପରିବହନ ମନ୍ତ୍ରୀ ପଦ୍ମନାଭ ବେହେରା, ଜିଲ୍ଲାପାଳ ମଧୁସୂଦନ ମିଶ୍ର ପ୍ରମୁଖ ଅତିଥି ଭାବେ ଯୋଗଦେଇ ଏହି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ । ସେହି ସମୟରେ ଏହି ପ୍ରକଳ୍ପ ପାଇଁ ପ୍ରାୟ 10 କୋଟି ଟଙ୍କା ବ୍ୟୟ ଅଟକଳ କରାଯାଇଥିଲା । ପାତାଳୀ ଶ୍ରୀକ୍ଷେତ୍ରର ଦୁଇଟି ପାହାଡ଼ ମଝିରେ ରୋପ ୱେ ନିର୍ମାଣ କରିବା ସହିତ ପର୍ଯ୍ୟଟକ ଓ ଶ୍ରଦ୍ଧାଳୁଙ୍କ ସୁବିଧା ପାଇଁ ଆବଶ୍ୟକ ବ୍ୟବସ୍ଥା କରିବା ପାଇଁ ନିଷ୍ପତ୍ତି ନିଆଯାଇଥିଲା । ତେବେ ବର୍ତ୍ତମାନ ସୁଦ୍ଧା ନା ରୋପ ୱେ ନିର୍ମାଣ କାର୍ଯ୍ୟ ଆରମ୍ଭ ହୋଇଛି ନା ପାରିପାର୍ଶ୍ବିକ ଅବସ୍ଥାରେ ଉନ୍ନତି କରାଯାଇପାରିଛି । ବାରମ୍ବାର ଦାବି ଆପତ୍ତି ସତ୍ତ୍ବେ ରୋପ ୱେ ପ୍ରକଳ୍ପ ଆରମ୍ଭ କରାଯାଇପାରୁନାହିଁ ।
ଏହା ମଧ୍ୟ ପଢନ୍ତୁ: ଅଧା ରହିଲା ଜଗା ଦର୍ଶନ, ସଡକ ଦୁର୍ଘଟଣାରେ ୪ ମୃତ
ତେବେ ଏହି ପ୍ରକଳ୍ପ ହେଲେ ଏହି ପାବନ ପୀଠର ବିକାଶ ହେବା ସହିତ ଏହି ଅଞ୍ଚଳର ଅର୍ଥନୈତିକ ବିକାଶ ହୋଇ ପାରିବ ବୋଲି ଆଶା କରାଯାଉଛି । କେବଳ ଭିତ୍ତିପ୍ରସ୍ତରରେ ପ୍ରକଳ୍ପ କାର୍ଯ୍ୟ ସୀମିତ ହୋଇ ରହି ଯାଇଥିବାରୁ ଜିଲ୍ଲାରେ ବୁଦ୍ଧିଜୀବୀ ମହଲରେ ଅସନ୍ତୋଷ ଦେଖାଦେଇଛି । ତେବେ ବେସରକାରୀ ରୋପ ୱେ ନିର୍ମାଣ ପାଇଁ ପଶ୍ଚିମ ଓଡିଶା ବିକାଶ ପରିଷଦରୁ ମିଳିଥିବା 10 କୋଟି ଟଙ୍କାର ଅନୁଦାନକୁ ବିକାଶ ପରିଷଦ କର୍ତ୍ତୃପକ୍ଷ ଫେରେଇ ନେଇଥିବା ଜଣାପଡିଛି । ପୂର୍ବରୁ ଏହି ପ୍ରକଳ୍ପ ନିର୍ମାଣ ପାଇଁ ଭୁବନେଶ୍ବରର ଏକ କମ୍ପାନୀକୁ ଦାୟିତ୍ବ ଦିଆଯାଇଥିବା କୁହାଯାଉଥିବା ବେଳେ କୁଆଡେ ତାଙ୍କ କାର୍ଯ୍ୟାଦେଶ ପ୍ରତ୍ୟାହାର କରି ନିଆଯାଇଥିବା ଚର୍ଚ୍ଚା ହେଉଛି । ଫଳରେ ଜିଲ୍ଲାବାସୀଙ୍କ ଭିତରେ ତୀବ୍ର ଅସନ୍ତୋଷ ଦେଖାଦେଇଛି ।
ଇଟିଭି ଭାରତ, ସୁବର୍ଣ୍ଣପୁର
