ସୁବର୍ଣ୍ଣପୁର: ସୋନପୁର ଗଡଜାତର ଇଷ୍ଟଦେବୀ ମା’ ସୁରେଶ୍ବରୀ ଆଜି ଆଶ୍ବିନ ଶୁକ୍ଲପକ୍ଷ ପ୍ରତିପଦ ତିଥିରେ କାଳୀ ବେଶ ଧାରଣ କରି ଶ୍ରଦ୍ଧାଳୁମାନଙ୍କୁ ଦର୍ଶନ ଦେଇଛନ୍ତି । ଆସନ୍ତାକାଲି ଦେବୀ ମା’ ତାରା ବେଶ ଧାରଣ କରିବେ । ତେବେ ଦେବୀ ମା’ ସୁରେଶ୍ବରୀ ଆଶ୍ବିନ ମହାଳୟାଠାରୁ ଆରମ୍ଭ କରି ଦଶମୀ ତିଥି ଯାଏଁ ଭିନ୍ନଭିନ୍ନ ବେଶ ଧାରଣ କରିଥାନ୍ତି । ମହାଳୟାରେ ଦେବୀ ମା ଧବଳମୁଖୀ ବେଶ ଧାରଣ କରିବାର ପରମ୍ପରା ରହିଛି ।
ବର୍ଷ ତମାମ ରକ୍ତମୁଖା ଦେବୀଙ୍କ ଶରୀର ସିନ୍ଦୁର ପ୍ରଲେପ କରାଯିବା ସହିତ ଗାଢ ନାଲି ରଙ୍ଗର ବସ୍ତ୍ର ପରିଧାନ କରାଯାଉଥିବାବେଳେ ଏବେ କିନ୍ତୁ ଦେବୀ ମା’ ଭିନ୍ନଭିନ୍ନ ପାଟ ବସ୍ତ୍ର ପରିଧାନ କରିଥାନ୍ତି । ମହାଳୟାରେ ସେବାୟତମାନେ ଗଙ୍ଗାଜଳ,ଅଗୁର,ଚନ୍ଦନ,କର୍ପୁର ଆଦି ପ୍ରଲେପ କରି ଶ୍ବେତ ବସ୍ତ୍ର ପ୍ରଦାନ କରିଥିବାବେଳେ ଆଜି ପ୍ରତିପଦ ତିଥିରେ ଦେବୀ ମା‘ କଳାବସ୍ତ୍ର ଧାରଣ କରିଛନ୍ତି । ତେବେ ସୁବର୍ଣ୍ଣପୁରର ଐତିହାସିକ ବଳୀଯାତ୍ରା ଆରମ୍ଭ ହୋଇ ଯାଇଥିବାବେଳେ ଶ୍ରଦ୍ଧାଳୁମାନେ ବଳୀଯାତ୍ରାରେ ସାମିଲ ହୋଇ ଦେବୀ ମାଙ୍କ କୃପା ଭିକ୍ଷା ସାଉଁଟିବାକୁ ଏହି ଶାକ୍ତ ପୀଠକୁ ଛୁଟି ଆସୁଛନ୍ତି । ଦେବୀଙ୍କ ସନ୍ଧ୍ୟା ଆରତୀ ଦର୍ଶନ କରି ଦେବୀ କୃପା ଲାଭ କରିବାକୁ ଏହି ଶକ୍ତି ପୀଠରେ ଶ୍ରଦ୍ଧାଳୁଙ୍କ ବେଶ ସମାଗମ ହେଉଛି । ତେବେ ଦେବୋତ୍ତର ବିଭାଗ ପକ୍ଷରୁ କୋଭିଡ ନିୟମ ପାଳନ କରିବାକୁ ସେବାୟତ ଓ ମନ୍ଦିର କମିଟିକୁ ନିର୍ଦ୍ଦେଶ ଦିଆଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
