ସମ୍ବଲପୁର: ଜିଲ୍ଲାରେ ବୃଦ୍ଧି ପାଉଥିବା ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି କେନ୍ଦ୍ର ସରକାର ଭାରତମାଲା ପ୍ରୋଜେକ୍ଟ ଅଧିନରେ ସମ୍ବଲପୁର ସହରର ଚାରିପାଖ ଦେଇ ଏକ ବାଇପାସ ରିଂ ରୋଡ଼ ନିର୍ମାଣ ହେଉଛି । ଏହାକୁ ନେକଲେସ ରୋଡ଼ ମଧ୍ୟ କୁହାଯାଇଛି । ନ୍ୟାସନାଲ ହାଇୱେ ଅଥରିଟି ଅଫ ଇଣ୍ଡିଆ(NHAI) ଦ୍ୱାରା ଏହି ରୋଡ଼ ନିର୍ମାଣ ହେବ । ଏହି ରୋଡ଼ ହେଲେ ସହରର ଟ୍ରାଫିକ ସମସ୍ୟା ଦୂରୀକରଣ ହେବା ସହ ଏହାର ସୌନ୍ଦର୍ଯ୍ୟକରଣ ମଧ୍ୟ ହେବ ବୋଲି ସ୍ଥାନୀୟ ଲୋକ କହିଛନ୍ତି ।
ଏହି ପ୍ରକଳ୍ପର ଡିପିଆର ପ୍ରସ୍ତୁତ କରିବାକୁ ଏକ ସଂସ୍ଥାକୁ NHAI ପକ୍ଷରୁ ଦାୟିତ୍ୱ ଦିଆଯାଇଛି । ମିଳିଥିବା ସୂଚନା ଅନୁସାରେ ଏହି ପ୍ରକଳ୍ପ ପାଇଁ ପାଖାପାଖି 466 କୋଟି ବ୍ୟୟ ଅଟକଳ ହୋଇଛି । ରୋଡ଼ର ଦୀର୍ଘତା 37.820 କିମି ରହିବା ସହ ଏଥିପାଇଁ 579.761 ଏକର ଜମି ଅଧିଗ୍ରହଣ କରାଯିବ । ଏଥିରେ 367.841 ଏକର ଘରୋଇ ଜମି ଓ 178.449 ଏକର ସରକାରୀ ଜମି ଅନ୍ତର୍ଭୁକ୍ତ ରହିଛି । ଏହା ଦ୍ୱାରା 1669ଟି ପ୍ଲଟ ପ୍ରଭାବିତ ହେବ ବୋଲି ସୂଚନା ମିଳିଛି । ସେହିପରି ଏହି ନେକଲେସ ରୋଡ଼ର ବିଭିନ୍ନ ସ୍ଥାନରେ ଟ୍ରକ ଓ ବସ ରହଣି ପାଇଁ ଟର୍ମିନାଲର ବ୍ୟବସ୍ଥା କରାଯିବ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
