ସମ୍ବଲପୁର: ଜିଲ୍ଲା କଂଗ୍ରେସ ପକ୍ଷରୁ ହିଣ୍ଡନବର୍ଗ ରିସର୍ଚ୍ଚ ରିପୋର୍ଟ ପ୍ରସଙ୍ଗ ନେଇ କେନ୍ଦ୍ର ସରକାରଙ୍କ ବିରୁଦ୍ଧରେ ବିକ୍ଷୋଭ ପ୍ରଦର୍ଶନ କରାଯାଇଛି । ମୋଦି ସରକାର ଆଦାନୀ ଗ୍ରୁପ ଭଳି କେତେକ ଅନୁଗତ ଓ ନିର୍ଦ୍ଧିଷ୍ଟ ପୁଞ୍ଜିପତିଙ୍କୁ ଲାଭବାନ କରିବା ପାଇଁ ଯେଉଁ ନୀତି ଅଵଲମ୍ବନ କରିଛନ୍ତି, ସେଥିପାଇଁ ସାରା ଦେଶ ତଥା ମଧ୍ୟବିତ୍ତ ଶ୍ରେଣୀର ଲୋକ ବ୍ୟଥୀତ ଅଛନ୍ତି ବୋଲି କଂଗ୍ରେସ ଅଭିଯୋଗ ଆଣି ଏହି ଆନ୍ଦୋଳନ କରିଛି । କେନ୍ଦ୍ର ସରକାରଙ୍କ ଏହି ନୀତି ଯୋଗୁଁ LICର 29 କୋଟି ଓ SBIର 45 କୋଟି ଗ୍ରାହକଙ୍କ ଜମା ଅର୍ଥ ସଙ୍କଟ ଭିତରକୁ ଠେଲି ହୋଇଯାଇଛି ବୋଲି କଂଗ୍ରେସ ଅଭିଯୋଗ କରିଛି । LIC ଓ SBI ଭଳି ରାଷ୍ଟ୍ରାୟତ ଉଦ୍ୟୋଗ ଭାରତର ଗର୍ବ ଓ ଗୌରବ । ଏହି ଉଦ୍ୟୋଗ ଭାରତର କୋଟି କୋଟି ଜନତାଙ୍କ କଷ୍ଟ ଅର୍ଜିତ ଧନରେ ପ୍ରତିଷ୍ଠିତ । ତେବେ ମୋଦି ସରକାର ନିଜର ଘନିଷ୍ଠ ବନ୍ଧୁ ଆଦାନୀ ଗ୍ରୁପ ସହ ଅନୁକମ୍ପା ଦେଖାଇ LIC, SBI ଓ ଅନ୍ୟ କେତେକ ବ୍ୟାଙ୍କକୁ ଆଦାନୀ ଗ୍ରୁପ ସହ ନିବେଶ କରିବାକୁ ବାଧ୍ୟ କରୁଥିବା କଂଗ୍ରେସ ଅଭିଯୋଗ କରିଛି ।
ଏହା ଦ୍ଵାରା LIC ଆଦାନୀ ଗ୍ରୁପରେ ପ୍ରଚୁର ଅର୍ଥ ବିନିଯୋଗ କରିବାରୁ, ଗତ କିଛି ଦିନ ଭିତରେ ଏହାର 39 କୋଟି ଜମାକାରୀ 33,060 କୋଟି ଅର୍ଥ କ୍ଷତି ସହିଥିବା କଂଗ୍ରେସ ଅଭିଯୋଗ ଆଣିଛି । SBI ଓ ଅନ୍ୟାନ୍ୟ ବ୍ୟାଙ୍କ ଆଦାନୀ ଗ୍ରୁପକୁ ପ୍ରଚୁର ପରିମାଣର ଅର୍ଥ ଯୋଗାଇଥିବା ମଧ୍ୟ ଅଭିଯୋଗ ହୋଇଛି । କଂଗ୍ରେସ ଦଳ କୌଣସି ଶିଳ୍ପର ବିରୋଧୀ ନୁହେଁ କିନ୍ତୁ ନିଷ୍ଠୁର ଓ ଲାଭଖୋର ପୁଞ୍ଜିବାଦର ପରିପନ୍ଥୀ ବୋଲି କହିଛି କଂଗ୍ରେସ । କେତେକ ନିର୍ଦ୍ଧିଷ୍ଟ ଶିଳ୍ପପତିଙ୍କୁ ଲାଭବାନ କରେଇବା ପରିବର୍ତ୍ତିତ ନିଷ୍ପତ୍ତିକୁ କଂଗ୍ରେସ ବରଦାସ୍ତ କରିବନି ବୋଲି ଚେତାବନୀ ଦେଇଛି ।
ଏସମ୍ପର୍କରେ ସୁପ୍ରିମକୋର୍ଟର ମୁଖ୍ୟ ବିଚାରପତି କିମ୍ବା ଯୁଗ୍ମ ସଂସଦୀୟ କମିଟି ଦ୍ବାରା ହିଣ୍ଡନବର୍ଗ ରିସର୍ଚ୍ଚ ରିପୋର୍ଟର ନିରପେକ୍ଷ ତଦନ୍ତ ଓ ବାଧ୍ୟତାମୂଳକ ଭାବେ LIC, SBI ଓ ଅନ୍ୟାନ୍ୟ ବ୍ୟାଙ୍କର ନିବେଶ ହୋଇଥିବା ଅର୍ଥ ତାହା ସାଂସଦରେ ଆଲୋଚନା କରାଯିବା ସହ ଜମାକାରୀଙ୍କ ଅର୍ଥକୁ ସୁରକ୍ଷିତ ରଖିବା ପାଇଁ ପଦକ୍ଷେପ ନିଆଯାଉ ବୋଲି କଂଗ୍ରେସ ଦାବି କରିଛି । ଏହି ଅଭିଯୋଗ ନେଇ ଆଜି ଜିଲ୍ଲା କଂଗ୍ରେସ କମିଟି ସଭାପତି ଅଶ୍ବିନୀ ଗୁରୁଙ୍କ ନେତୃତ୍ବରେ ସମ୍ବଲପୁର କଚେରୀ ଛକ ନିକଟରେ ଥିବା SBI ବ୍ୟାଙ୍କ ସମ୍ମୁଖରେରେ ବିକ୍ଷୋଭ ପ୍ରଦର୍ଶନ କରାଯାଇଛି ।
ଇଟିଭି ଭାରତ, ସମ୍ବଲପୁର
