ସମ୍ବଲପୁର: ଚଳିତ ବର୍ଷ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ମଙ୍ଗ ଧରିଛନ୍ତି ଅନେକ ହେଭିୱେଟ । ଗାଁଠୁ ସହର ଏବେ ଚାରିଆଡ଼େ ନିର୍ବାଚନୀ ଆଲୋଚନା । ଜିଲ୍ଲା ପରିଷଦ ଆସନକୁ ନିଜ ଅକ୍ତିଆରରେ ନେବା ପାଇଁ ତିନି ପ୍ରମୁଖ ରାଜନୈତିକ ଦଳ ଅଣ୍ଟା ଭିଡ଼ିଛନ୍ତି । ସମ୍ବଲପୁର ଜିଲ୍ଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରଚାର ଜୋର ଧରିଥିବା ବେଳେ ଗ୍ରାମାଞ୍ଚଳକୁ ଛୁଟୁଛି ନେତାମନ୍ତ୍ରୀଙ୍କ ସୁଅ ।
୨୦୧୯ ବିଧାନସଭା ନିର୍ବାଚନରେ ପଶ୍ଚିମ ଓଡିଶାର ୩୫ଟି ବିଧାନସଭା ସିଟରୁ ୨୩ଟି ଆସନ ହାତେଇଥିଲା ବିଜେଡି । ତେଣୁ ଏହାର ସଫଳତା ଏହି ପଞ୍ଚାୟତ ନିର୍ବାଚନରେ ବିଜେଡି ପୁଣି ଦୋହରାଇବ ବୋଲି ମନ୍ତ୍ରୀ ସୁଶାନ୍ତ ସିଂ କହିଛନ୍ତି । ଏହାସହ ଗତ ୨୦୧୭ ପଂଚାୟତ ନିର୍ବାଚନରେ କଂଗ୍ରେସ ସୁପ୍ତ ଅବସ୍ଥାରେ ଥିବାରୁ କଂଗ୍ରେସ ଭୋଟ ବିଜେପି ପାଖକୁ ଚାଲି ଯାଇଥିବାରୁ ବିଜେପି ଅଧିକ ସିଟ ଜିତିଥିଲା ।
ସମ୍ବଲପୁରର ଗୋଶାଳା ଅଞ୍ଚଳରେ ଏକ ଦଳୀୟ କାର୍ଯ୍ୟକ୍ରମରେ ଯୋଗ ଦେବା ସମୟରେ ମନ୍ତ୍ରୀ ସୁଶାନ୍ତ ସିଂ କହିଛନ୍ତି ଯେ ଚଳିତ ପଞ୍ଚାୟତ ନିର୍ବାଚନରେ ପଶ୍ଚିମ ଓଡିଶାର ୧୦ଟି ଜିଲ୍ଲାରେ ବିଜେଡି ଜିଲ୍ଲା ପରିଷଦ ଅଧ୍ୟକ୍ଷ ପଦ ଅକ୍ତିଆର କରିବ । ନବୀନ ସରକାରଙ୍କ ଜନାଭିମୁଖୀ ଯୋଜନାରେ ଲୋକଙ୍କ ବିଶ୍ୱାସ ବଢିଛି ତେଣୁ ୨୦୧୭ ପଞ୍ଚାୟତ ନିର୍ବାଚନ ଅପେକ୍ଷା ବିଜେଡି ଏଥର ଅଧିକ ସଫଳତା ପାଇବ । ତେବେ ଏଥର ସ୍ଥିତି ବଦଳିଛି । ତେଣୁ ବିଜେଡି ଭଲ ପ୍ରଦର୍ଶନ କରିବ । ମନ୍ତ୍ରୀଙ୍କ ଏଭଳି ବୟାନକୁ ନେଇ ଏବେ ଚର୍ଚ୍ଚା ଜୋର ଧରିଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ