ସମ୍ବଲପୁର: ରେଢାଖୋଲ ଅନ୍ତର୍ଗତ ଚାଟୁଣି ପ୍ରାଥମିକ ବିଦ୍ୟାଳୟରେ ଚାଞ୍ଚଲ୍ୟ । ସ୍କୁଲ ପରିସରରୁ ଏକ ମୃତଦେହ ଉଦ୍ଧାର ହୋଇଛି । ମୃତକ ହେଲେ ରାଜୁ ଜାନି । ତାଙ୍କ ଘର ଅନୁଗୋଳ ଜିଲ୍ଲା କନ୍ଧଳ ଗାଁରେ । ସେ ଜଣେ କଂସା ବାସନ ବ୍ୟବସାୟୀ ବୋଲି ଜଣାପଡିଛି। ଅନ୍ୟପଟେ ପାରପାର୍ଶ୍ବିକ ସ୍ଥିତିରୁ ଏହା ହତ୍ୟାକାଣ୍ଡ ବୋଲି ସନ୍ଦେହ କରୁଛି ପୋଲିସ ।
ସୂଚନା ଅନୁସାରେ, ମୃତ ରାଜୁ ଗାଁକୁ ଗାଁ ବୁଲି କଂସାବାସନ ବିକ୍ରି କରି ଚଳୁଥିଲେ। ତାଙ୍କ ମୃତଦେହର କିଛି ଦୂରରେ ତାଙ୍କ ସାଇକେଲ ଏବଂ କିଛି ବାସନକୁସନ ପଡିଥିବାର ଦେଖିବାକୁ ମିଳିଛି। ରାଜୁ ଗତ ସନ୍ଧ୍ୟାରେ ଏହି ସ୍କୁଲରେ ବିଶ୍ରାମ ନେଇଥିବା ସମୟରେ ତାଙ୍କୁ କେହି ଦୁର୍ବୃତ୍ତ ଲୁଟ ଉଦ୍ୟମ କରିଥାଇପାରନ୍ତି ଆଉ ଏଥିରେ ସଫଳ ନହେବାରୁ ତାଙ୍କୁ ହତ୍ୟା କରାଯାଇପାରିଥାଏ ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିପାରିଛି।
ସେପଟେ ଏହି ଘଟଣା ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି। ପୋଲିସ ଏହାର ତଦନ୍ତ ଆରମ୍ଭ କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ ରେଢାଖୋଲ ହସ୍ପିଟାଲକୁ ପଠାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
