ରାୟଗଡା: ଅରକ୍ଷିତକୁ ଦଇବ ସାହା । ଯାହାର ନିଛକ ଚିତ୍ର ଦେଖିବାକୁ ମିଳିଛି ରାୟଗଡା ଜିଲ୍ଲାରେ । ପିଲାବେଳୁ ବାପା ମା’ଙ୍କୁ ହରାଇ ଓଳିଏ ଖାଇ ଓଳିଏ ଉପାସ ରହି ସ୍କୁଲ ବାରଣ୍ଡାରେ ଶୋଉଥିବା ୧୧ ବର୍ଷର ଦିବ୍ୟାଙ୍ଗ ନାବାଳକର ଶେଷରେ ଥଇଥାନର ଦାୟିତ୍ବ ନେଇଛି ରାୟଗଡା ଜିଲ୍ଲା ପ୍ରଶାସନ ।
ବିଷମକଟକ ବ୍ଲକ ଅନ୍ତର୍ଗତ କଣାପାଇ ପଞ୍ଚାୟତର କୁସୁମପଦର ଗାଁର ଦିବ୍ୟାଙ୍ଗ ନାବାଳକ ଅନୁଭବ କୁଲସିକା । ବର୍ଷକର ହୋଇଥିବାବେଳେ ବାପା ଛେଉଣ୍ଡ ହୋଇଥିଲା ଅନୁଭବ । ହେଲେ ଦଇବ ସେତିକିରେ ସନ୍ତୁଷ୍ଟ ହୋଇନଥିଲା । ବାପା ଦୁନିଆ ଛାଡି ଚାଲିଯିବାର ବର୍ଷେ ପରେ ମା’ ଆରପାରିକୁ ଚାଲିଯାଇଥିଲା । ଅନାଥ ହୋଇଥିଲା ଅନୁଭବ ।
ସେବେଠୁ ବାପା ମା’ ଛେଉଣ୍ଡ ଅନୁଭବର ଦାୟିତ୍ବ ନେଇଥିଲେ ଗ୍ରାମବାସୀ । ପରେ ସେ ବଡ ହେବା ସହ 500 ଟଙ୍କା ଦିବ୍ୟାଙ୍ଗ ଭତ୍ତା ପାଉଥିଲା । ହେଲେ ଏହି ଟଙ୍କାକୁ ତାକୁ ଘରେ ରଖିବା ବାହାନାରେ ନେଇଯାଆନ୍ତି ଗାଁରେ ଥିବା ଦୂରସମ୍ପର୍କୀୟ ।
ତେବେ ଗାଁ ସ୍କୁଲରେ ପାଠପଢିବା ପରେ ସ୍କୁଲ ହିଁ ପାଲଟିଥିଲା ତାର ଘର । ମଧ୍ୟାହ୍ନ ଭୋଜନ ଖାଇ ରାତିରେ ଉପବାସରେ ରହି ସେହିଠାରେ ହିଁ ସେ ଶୋଇଯାଉଥିଲା । ଛୁଟି ଦିନରେ ଖାଡା ଉପବାସରେ ତାକୁ ବଞ୍ଚିବାକୁ ପଡୁଥିଲା । ଶେଷରେ 5ମ ଶ୍ରେଣୀରେ ପଢୁଥିବା ଅନୁଭବକୁ ଦଇବ ସାହା ହୋଇଛନ୍ତି ।
ଗାଁକୁ ଆସିଥିବା କିଛି ସ୍ବେଚ୍ଛାସେବୀ ସ୍କୁଲ ବାରଣ୍ଡାରେ ଅଖା ପାରି ଶୋଇଥିବା ଅବସ୍ଥାରେ ଅନୁଭବକୁ ଉଦ୍ଧାର କରି ଜିଲ୍ଲା ପ୍ରଶାସନକୁ ଜଣାଇଥିଲେ । ପରେ ଶିଶୁ ସୁରକ୍ଷା ବିଭାଗ ତାର ଦାୟିତ୍ବ ନେବା ସହ ସ୍ବାସ୍ଥ୍ୟ ପରୀକ୍ଷା କରି କନ୍ଧମାଳ ଜିଲ୍ଲାର ବାଲିଗୁଡାରେ ଥିବା ବନବାସୀ ସେବା ସମିତିରେ ରଖିବାକୁ ନିଷ୍ପତି ନେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
