ପୁରୀ: ନୂଆବର୍ଷ ପୂର୍ବରୁ ବଡ ଦାଣ୍ଡରେ ଥିବା କୋଠାଘର ହେବ ଫିକା ଗୋଲାପୀ ରଙ୍ଗ । ବଡଦାଣ୍ଡରେ ରହୁଥିବା ଘର ମାଲିକଙ୍କ ସହ ଆଲୋଚନା କରାଯାଇ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି ବୁଦ୍ଧିଜୀବୀ । ଜାନୁଆରୀ ୧୭ ତାରିଖରେ ମୁଖ୍ୟମନ୍ତ୍ରୀ ଲୋକାର୍ପଣ କରିବେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ । ଏହା ପୂର୍ବରୁ ନୂଆରୂପ ପାଇବ ପବିତ୍ର ବଡ଼ଦାଣ୍ଡ । ବଡ଼ଦାଣ୍ଡର ଉଭୟ ପାର୍ଶ୍ଵରେ ଥିବା ସମସ୍ତ କୋଠା ଗୁଡ଼ିକରେ ଫିକା ଗୋଲାପୀ ରଙ୍ଗ ଲଗାଯିବ । ଏହାଦ୍ବାରା ବଡ଼ଦାଣ୍ଡ ଆହୁରି ଆକର୍ଷଣୀୟ ଦେଖାଯିବ ।
ଗତ ଶନିବାର ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିର୍ମାଣ କାର୍ଯ୍ୟର ସମୀକ୍ଷା କରିବାକୁ ଆସିଥିବା 5ଟି ତଥା ନବୀନ ଓଡ଼ିଶା ଅଧ୍ୟକ୍ଷ ଭି.କେ.ପାଣ୍ଡିଆନଙ୍କ ନିର୍ଦ୍ଦେଶ କ୍ରମେ ବଡ଼ଦାଣ୍ଡରେ ଥିବା ଉଭୟ ପାର୍ଶ୍ଵର କୋଠାକୁ ଫିକା ଗୋଲାପୀ ରଙ୍ଗ ଦିଆଯିବ ବୋଲି ନିଷ୍ପତ୍ତି ହୋଇଛି । ଏହାଦ୍ବାରା ବଡ଼ଦାଣ୍ଡର ସୌନ୍ଦର୍ଯ୍ୟ ବୃଦ୍ଧି ପାଇବା ସହ ଭକ୍ତ ଏକ ନୂଆ ଅନୁଭୂତି ପାଇବେ ଆଶା କରାଯାଉଛି । ପୂର୍ବରୁ ତତ୍କାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କ କାର୍ଯ୍ୟକାଳ ସମୟରେ ବଡ଼ଦାଣ୍ଡର ଉଭୟ ପାର୍ଶ୍ଵରେ ଥିବା ସମସ୍ତ କୋଠାଗୁଡ଼ିକୁ ଫିକା ହଳଦିଆ ରଙ୍ଗ କରାଯାଇଥିଲା । ଫଳରେ ଏହି ରଙ୍ଗ ବଡ଼ଦାଣ୍ଡର ଶୋଭା ବର୍ଦ୍ଧନ କରିଥିଲା ।
କିନ୍ତୁ ପରବର୍ତ୍ତୀ ସମୟରେ କିଛି ବ୍ୟବସାୟୀକ ଅନୁଷ୍ଠାନ ଏବଂ କିଛି ଲୋକ ତାଙ୍କ ଆବାସକୁ ନିଜ ଇଛା ଅନୁସାରେ ରଙ୍ଗ ବଦଳାଇଥିଲେ । ତେବେ 5ଟି ଅଧ୍ୟକ୍ଷଙ୍କ ନିର୍ଦ୍ଦେଶ ପରେ ବଡ଼ଦାଣ୍ଡରେ ଥିବା କୋଠା ଗୁଡ଼ିକୁ ଫିକା ଗୋଲାପୀ ରଙ୍ଗ ଦିଆଯିବ ବୋଲି ନିଷ୍ପତ୍ତି କରାଯାଇଛି । ଏନେଇ ପୁରୀର ଅତିରିକ୍ତ ଜିଲ୍ଲାପାଳ ପ୍ରଦୀପ କୁମାର ସାହୁ କହିଛନ୍ତି, "ଚୂଡ଼ାନ୍ତ ନିଷ୍ପତ୍ତି ଆସିବା ପରେ ଏନେଇ ପଦକ୍ଷେପ ନିଆଯିବ । ସେପଟେ ବଡ଼ଦାଣ୍ଡରେ ଥିବା କୋଠା ଘର ଗୋଲାପୀ ରଙ୍ଗ ପ୍ରସଙ୍ଗକୁ ନେଇ ବୁଦ୍ଧିଜୀବୀଙ୍କ ପ୍ରତିକ୍ରିୟା ପ୍ରକାଶ ପାଇଛି ।"
ବୁଦ୍ଧିଜୀବୀ କହିଛନ୍ତି, "ଏହି କାର୍ଯ୍ୟ ପୂର୍ବରୁ ଲୋକଙ୍କ ସହ ଆଲୋଚନା କରାଯାଉ । ଲୋକଙ୍କ ମତ ନିଆଯିବା ପରେ କାର୍ଯ୍ୟକ୍ରମ ଆଗକୁ ବଢ଼ାଯାଉ । ଏହା ପ୍ରଶାସନ କରିବ କି ଲୋକମାନେ ନିଜେ କରିବେ ସେନେଇ ସ୍ପଷ୍ଟ କରାଯାଉ । ଅନେକ ବ୍ୟକ୍ତିଙ୍କ ଆର୍ଥିକ ସ୍ଥିତି ଠିକ୍ ନାହିଁ । ସେହିପରି ଅନେକ ଲୋକ ନିଜ ଘର ବାସ୍ତୁ ଅନୁଯାୟୀ କରିଛନ୍ତି । ଏଣୁ ପ୍ରଶାସନ ବଡ଼ଦାଣ୍ଡରେ ଥିବା ଘର ମାଲିକଙ୍କ ସହ କଥା ହୋଇ କାର୍ଯ୍ୟ ଆରମ୍ଭ କଲେ କୌଣସି ସମସ୍ୟା ହେବ ନାହିଁ ।" ତେବେ ଶ୍ରୀକ୍ଷେତ୍ରର ସୌନ୍ଦର୍ଯ୍ୟ କରଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ଅନେକ ଗୁଡ଼ିଏ କାର୍ଯ୍ୟ ଜାରି ରହିଛି । ବଡ଼ଦାଣ୍ଡରେ ଥିବା ସମସ୍ତ କୋଠା ଗୁଡିକୁ ଗୋଟିଏ ପ୍ରକାର ରଙ୍ଗ ତଥା ଫିକା ଗୋଲାପୀ ରଙ୍ଗ ଦିଆଗଲେ ବଡ଼ ଦାଣ୍ଡର ସୌନ୍ଦର୍ଯ୍ୟ ଦ୍ଵିଗୁଣିତ ହେବ ବୋଲି ଆଶା କରାଯାଉଛି ।
ଇଟିଭି ଭାରତ, ପୁରୀ
