ପୁରୀ: ଶନିବାର ସମସ୍ତ ଦେବୀ ପୀଠ ଗୁଡିକରେ ଅନୁଷ୍ଠିତ ହୋଇଛି ମହାନବମୀ । ଶ୍ରୀକ୍ଷେତ୍ରର ଅଧିଷ୍ଠାତ୍ରୀ ଦେବୀ ମା' ବିମଳାଙ୍କର ମହାନବମୀ ପୂଜା ଶ୍ରୀମନ୍ଦିରରେ ଅନୁଷ୍ଠିତ ହୋଇଛି । ସେହିପରି ମା' ବିମଳାଙ୍କର ଚଳନ୍ତି ପ୍ରତିମା ଦେବୀ କାକୁଡି ଖାଇଙ୍କ ପୀଠରେ ବିମଳାଙ୍କ ରୀତିନୀତି ଅନୁଯାୟୀ ମହାନବମୀ ଅନୁଷ୍ଠିତ ହୋଇଛି ।
ଶନିବାର ମା କାକୁଡି ଖାଇଙ୍କ ନିକଟରେ ପରମ୍ପରା ଅନୁଯାୟୀ ମହାନବମୀ ଅବସରରେ ଶାନ୍ତି ବଳିଥାଏ । ମା' ବିମଳାଙ୍କ ପୀଠରୁ ସ୍ୱତନ୍ତ୍ର ଖଡ୍ଗ ଆସିଥାଏ । ଏହି ଖଡ୍ଗରେ ଶାନ୍ତି ବଳି ପଡିଥାଏ । ସେହିପରି ରବିବାର ବିଶ୍ରାମ ଦିବସ ଥିବାବେଳେ ସୋମବାର ମା କାକୁଡି ଖାଇଙ୍କ ବିଜୟା ଦଶମୀ ଅନୁଷ୍ଠିତ ହେବ।
ସେହିପରି ଆଜି ଶ୍ରୀମନ୍ଦିରରେ ସନ୍ଧ୍ୟା ଧୂପ ପରେ ମା' ବିମଳାଙ୍କ ସ୍ୱତନ୍ତ୍ର ମହା ନବମୀ ପୂଜା ହେବ । ତେବେ ସରକାରଙ୍କ କୋଭିଡ କଟକଣା ଓ ଗାଇଡ଼ଲାଇନ ଯୋଗୁ ସବୁ ପୂଜା ମଣ୍ଡପ ଖାଁ ଖାଁ । କୌଣସି ପୂଜା ମଣ୍ଡପ ଏବଂ ପୀଠରେ ଭକ୍ତଙ୍କ ଦର୍ଶନ ପାଇଁ ବ୍ୟବସ୍ଥା ହୋଇ ନାହିଁ । ତେବେ ଅଳ୍ପ କିଛି ଲୋକ ମା'ଙ୍କୁ ପୂଜା ମଣ୍ଡପ ଏବଂ ପୀଠ ଗୁଡିକରେ ବାହାରେ ଠିଆ ହୋଇ ଅଳ୍ପ କିଛି ସମୟ ଆରାଧନା କରୁଥିବାର ଦେଖିବାକୁ ମିଳିଥିଲା ।
ସମସ୍ତେ କୋଭିଡ ମହାମାରୀ କିଭଳି ବିନାଶ ହେଉ ସେ ନେଇ ଦେବୀଙ୍କୁ ପ୍ରାର୍ଥନା କରୁଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
