ପୁରୀ: କୋଭିଡ ସଂକ୍ରମଣ ଧୀରେ ଧୀରେ ବଢ଼ି ଚାଲିଥିବା ବେଳେ ଶ୍ରୀମନ୍ଦିର କର୍ମଚାରୀ ଓ ସେବାୟତ ବି କିଛି କୋଭିଡ ସଂକ୍ରମିତ ହେଲେଣି । ଫଳରେ ପୁରୀ ଜିଲ୍ଲା ପ୍ରଶାସନର ଚିନ୍ତା ବଢ଼ିଯାଇଛି । ସେବାୟତ ଓ ଶ୍ରୀମନ୍ଦିର କର୍ମଚାରୀ କୋଭିଡ ସଂକ୍ରମିତ ଅଧିକ ହେଲେ ଶ୍ରୀମନ୍ଦିରରେ ମହାପ୍ରଭୁଙ୍କ ନୀତିକାନ୍ତି ପ୍ରଭାବିତ ହେବାର ଆଶଙ୍କା ରହିଛି ।
ଏଣୁ, କିଭଳି ଶ୍ରୀମନ୍ଦିର ଭିତରେ କୋଭିଡ ଗାଇଡ଼ଲାଇନ କଡାକଡି କରିହେବ, କ’ଣ ବିକଳ୍ପ ବ୍ୟବସ୍ଥା ରହିଛି, ଶ୍ରୀମନ୍ଦିର ପୂର୍ବ ଭଳି ଭକ୍ତଙ୍କ ପାଇଁ ବନ୍ଦ କରିବା ଉଚିତ ହେବ କି ସେନେଇ ଆଜି(ଶୁକ୍ରବାର) ସନ୍ଧ୍ୟାରେ ଶ୍ରୀମନ୍ଦିର ଛତିସା ନିଯୋଗ ବୈଠକରେ ନିଷ୍ପତ୍ତି ହେବ ।
ଭର୍ଚୁଆଲ ମୋଡ଼ରେ ଏହି ବୈଠକ ହେବ । ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଛତିଶା ନିଯୋଗ ସଦସ୍ୟ, ପୁରୀ ଜିଲ୍ଲାପାଳ ଏହି ବୈଠକରେ ଉପସ୍ଥିତ ରହିବେ । ସେପଟେ ଆଜିଠାରୁ ସବୁ ସହରାଞ୍ଚଳରେ ରାତି 9ଟାରୁ ସକାଳ 5ଟା ଯାଏଁ ନାଇଟ କର୍ଫ୍ୟୁ ଲାଗୁ ହେଉଥିବା ଦୃଷ୍ଟିରୁ ଶ୍ରୀମନ୍ଦିରରେ ମଧ୍ୟ ଦର୍ଶନ ନେଇଥିବା ସମୟ ସାରଣୀରେ ପରିବର୍ତ୍ତନ କରାଯାଇଛି ।
ଏଣିକି ଭକ୍ତ ମନେ ରାତି 8ଟା 30 ପର୍ଯ୍ୟନ୍ତ ଶ୍ରୀମନ୍ଦିରରେ ପ୍ରବେଶ କରିବେ । ରାତି 9ଟା ପୂର୍ବରୁ ଶ୍ରୀମନ୍ଦିରରୁ ପ୍ରତ୍ୟାବର୍ତ୍ତନ କରିବେ । ରାତି 8ଟା 30 ପରେ କୌଣସି ଭକ୍ତଙ୍କୁ ଶ୍ରୀମନ୍ଦିର ପ୍ରବେଶ ଅନୁମତି ଦିଆଯିବ ନାହିଁ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
