ନୂଆପଡ଼ା: ପରକୀୟା ପ୍ରୀତି ସନ୍ଦେହରେ ସ୍ତ୍ରୀକୁ ନିର୍ମମ ଭାବରେ ହତ୍ୟା କଲା ସୈତାନ ସ୍ୱାମୀ । ନୂଆପଡା ଜିଲ୍ଲା କୋମନା ଥାନା ଛତାଗାଁରେ ଘଟିଛି ଏଭଳି ଅଭାବନୀୟ ଘଟଣା । ଅଭିଯୁକ୍ତ ସ୍ୱାମୀ ଜଗବନ୍ଧୁ ତାଣ୍ଡି ହୋଇଥିବାବେଳେ ମୃତକ ଜଣକ ସୁନେତାଣ୍ଡି ବୋଲି ଜଣାପଡିଛି । ସ୍ତ୍ରୀକୁ ହତ୍ୟା କରିବା ପରେ ଅଭିଯୁକ୍ତ ସ୍ୱାମୀ ଜଗବନ୍ଧୁ ତାଣ୍ଡି ଫେରାର ହୋଇ ଯାଇଥିବାବେଳେ, ହତ୍ୟାକାଣ୍ଡର 12ଘଣ୍ଟା ଭିତରେ କୋମନା ଓ ସିନାପାଲି ପୋଲିସ ମିଳିତ ଚଢ଼ାଉ କରିଥିଲେ। ଚଢାଉରେ ସିନାପାଲି ଥାନା ଅନ୍ତର୍ଗତ ସରଧାପୁର ଗାଁରୁ ହତ୍ୟାକାରୀ ଜଗବନ୍ଧୁକୁ ଗିରଫ କରିବାରେ ସଫଳ ହୋଇଛି ପୋଲିସ ।
ଘଟଣା ସମ୍ପର୍କରେ ସୋମବାର ନୂଆପଡ଼ା ଆରକ୍ଷୀ ଅଧିକ୍ଷକ ଜି.ରାଘବେନ୍ଦ୍ର ରେଡ୍ଡି ଗଣମାଧ୍ୟମକୁ ସୂଚନା ଦେଇଛନ୍ତି । କୋମନା ଥାନା ଅନ୍ତର୍ଗତ ଢୋର୍ଲା ଗ୍ରାମପଞ୍ଚାୟତ ସ୍ଥିତ ଛତା ଗାଁରେ ବାସ କରନ୍ତି ଜଗବନ୍ଧୁ ତାଣ୍ଡି ସ୍ତ୍ରୀ ଓ ଦୁଇ ପୁଅଙ୍କ ସହ ବାସ କରୁଥିଲେ । ସୁନେତାଣ୍ଡିଙ୍କର ଅନ୍ୟ ପୁରୁଷ ସହ ସମ୍ପର୍କ ଥିବା ବାରମ୍ବାର ଶୁଣିବାକୁ ପାଉଥିଲେ ସ୍ବାମୀ ଜଗବନ୍ଧୁ । ଯାହା ଫଳରେ ସେ ସ୍ତ୍ରୀଙ୍କ ଚରିତ୍ରକୁ ସନ୍ଦେହ କରୁଥିଲେ ଏବଂ ବାରମ୍ବାର ଉଭୟଙ୍କ ମଧ୍ୟରେ ଝଗଡା ଲାଗି ରହିଥିଲା ।
ଶେଷରେ ସ୍ୱାମୀ ଜଗବନ୍ଧୁ ପ୍ରତିଶୋଧ ପରାୟଣ ହୋଇ ସ୍ତ୍ରୀକୁ ହତ୍ୟା କରିବା ପାଇଁ ଯୋଜନା କରୁଥିଲା । ଯୋଜନା ମୁତାବକ ଗତ 24 ତାରିଖ ଦିନ ନିଜ ଶ୍ୱଶୁର ଘର ବୋଡେ଼ନ ଥାନା ଅନ୍ତର୍ଗତ ନାଗପଡା ଗ୍ରାମପଞ୍ଚାୟତ ସିର୍ଲି ଗାଁକୁ ଯିବାପାଇଁ ସ୍ତ୍ରୀକୁ ପ୍ରସ୍ତାବ ଦେଇଥିଲା ଜଗବନ୍ଧୁ । ସ୍ୱାମୀ ପ୍ରସ୍ତାବରେ ଏକମତ ହୋଇ ଉଭୟେ 24 ତାରିଖ ଦିନ ସାଇକଲ ଯୋଗେ ବାହାରିଥିଲେ । ସଂଧ୍ୟା ପର୍ଯ୍ୟନ୍ତ ଉଭୟେ ସ୍ୱାମୀ ସ୍ତ୍ରୀ ଶ୍ୱଶୁର ଘର ସିର୍ଲି କିମ୍ବା ନିଜଘର ଛତାଗାଁକୁ ଯାଇନଥିଲେ ।
ଫଳରେ ବାପା ମାଆ ନିଖୋଜ ଥିବା ନେଇ ଜଗବନ୍ଧୁଙ୍କ ପୁଅ ସୁରେନ୍ଦ୍ର ତାଣ୍ଡି କୋମନା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି କୋମନା ପୋଲିସ ତଦନ୍ତ ଜାରି ରଖିଥିଲା । ଏହାପରେ ଗତ 27 ତାରିଖ ଦିନ ଛତାଗାଁ ନିକଟସ୍ଥ ଦେଓଦରା ଜଙ୍ଗଲରେ ଜଣେ ମହିଳାଙ୍କ ମୃତଦେହ ପଡିଥିବା କୋମନା ପୋଲିସ ଜାଣିବାକୁ ପାଇଥିଲା । ତେବେ ମୃତ ମହିଳା ଜଣଙ୍କ ଜଗବନ୍ଧୁଙ୍କ ସ୍ତ୍ରୀ ସୁନେ ତାଣ୍ଡି ବୋଲି ଚିହ୍ନଟ କରିଥିଲା ପୋଲିସ ।
ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ଜଗବନ୍ଧୁ ଫେରାର ହୋଇଯାଇଥିଲା । ପରେ ନୂଆପଡା SP ଜି. ରାଘବେନ୍ଦ୍ର ରେଡ୍ଡିଙ୍କ ନିର୍ଦ୍ଦେଶରେ SDPO ପ୍ରଶାନ୍ତ କୁମାର ପଟ୍ଟନାୟକଙ୍କ ନେତୃତ୍ୱରେ କୋମନା IIC ଜ୍ୟୋତିରଞ୍ଜନ ଗୌଡ, ସିନାପାଲି IIC ଡମ୍ବରୁଧର ପ୍ରଧାନଙ୍କୁ ନେଇ ଅଭିଯୁକ୍ତକୁ କାବୁ କରିବାକୁ ଏକ ସ୍ବତନ୍ତ୍ର ଟିମ୍ ଗଠନ ହେଲା । ଘଟଣାର ମାତ୍ର 12 ଘଣ୍ଟା ଭିତରେ ଅଭିଯୁକ୍ତ ଜଗବନ୍ଧୁକୁ ସିନାପାଲି ଥାନା ସରଧାପୁର ଗାଁରୁ ଗିରଫ କରିବାରେ ସଫଳ ହୋଇଛି ପୋଲିସ ।
ଅଭିଯୁକ୍ତ ହତ୍ୟା କରିଥିବା ସ୍ୱୀକାର କରିଥିବାବେଳେ, ତାଠାରୁ ଗୋଟିଏ ସାଇକଲ,ଗୋଟିଏ ମୋବାଇଲ ଫୋନ, ଉଭୟ ସ୍ୱାମୀ ସ୍ତ୍ରୀଙ୍କ ବ୍ୟବହୃତ କପଡା ଓ ହତ୍ୟାରେ ବ୍ୟବହୃତ ଠେଙ୍ଗା ଜବତ କରିଛି ପୋଲିସ । ସୋମବାର ଅଭିଯୁକ୍ତ ଜଗବନ୍ଧୁକୁ କୋର୍ଟ ଚାଲାଣ କରାଯାଇଥିବା ନୂଆପଡା ଆରକ୍ଷୀ ଅଧିକ୍ଷକ ସୂଚନା ଦେଇଛନ୍ତି ।
ଇଟିଭି ଭାରତ, ନୂଆପଡ଼ା
