ନୂଆପଡ଼ା: ଭିଜିଲାନ୍ସ ଜାଲରେ ଜିଲ୍ଲା ମୁଖ୍ୟ ଚିକିତ୍ସାଳୟର ସହକାରୀ କିରାଣୀ ପ୍ରତିମା ଦାସ । ଚାକିରୀ ରେଗୁଲାର କରାଇଦେବା ନାଁରେ ନେଉଥିଲେ 1୦ ହଜାର ଟଙ୍କା ଲାଞ୍ଚ । ଅତର୍କିତ ଭାବରେ ରେଡ କରି କିରାଣୀଙ୍କୁ କାବୁ କରିଛି ଭିଜିଲାନ୍ସ ।
ସ୍ବାସ୍ଥ୍ୟକର୍ମୀଙ୍କୁ ଚାକିରୀ ରେଗୁଲାର କରାଇଦେବା ନାଁରେ ସହକାରୀ କିରାଣୀ ପ୍ରତିମା 10 ହଜାର ଟଙ୍କା ଲାଞ୍ଚ ଦାବି କରିଥିଲେ । ଏହାପରେ ସ୍ବାସ୍ଥ୍ୟକର୍ମୀ ଜଣକ ଅସହମତ ପ୍ରକାଶ କରି ଭିଜଲାନ୍ସର ଦ୍ବାରସ୍ଥ ହୋଇଥିଲେ । ପୂର୍ବ ଯୋଜନା ମୁତାବକ ଆଜି(ଶନିବାର) ସ୍ବାସ୍ଥ୍ୟକର୍ମୀଙ୍କ ସ୍ବାମୀ ଶ୍ରୀମନ୍ତ କୁମାର ନାଏକ ନଗଦ 10 ହଜାର ଟଙ୍କା କିରାଣୀଙ୍କୁ ଲାଞ୍ଚ ଦେଉଥିବାବେଳେ ଚଢାଉ କରିଥିଲା ଭିଜିଲାନ୍ସ ।
ନବରଙ୍ଗପୁର ଭିଜିଲାନ୍ସ ଇନସ୍ପେକ୍ଟର ପ୍ରମିଳା ସୁନାନୀଙ୍କ ନେତୃତ୍ବରେ ଭିଜିଲାନ୍ସ ଚଢାଉ କରି ସହକାରୀ କିରାଣୀଙ୍କୁ କାବୁ କରି ଟଙ୍କା ଜବତ କରିଛି । ଭିଜିଲାନ୍ସ ଇନସ୍ପେକ୍ଟର ପ୍ରମିଳାଙ୍କ ସମେତ ମାଲକାନଗିରି DSP ସୁଶାନ୍ତ କୁମାର ବିଶ୍ବାଳ, କଳାହାଣ୍ଡି DSP ସତ୍ୟବାନ ମହାନନ୍ଦ ଏବଂ ନୂଆପଡା ଭିଜିଲାନ୍ସ ଇନସ୍ପେକ୍ଟର ଦୀନବନ୍ଧୁ ବେହେରା ଏହି ଚଢାଉ ସମୟରେ ଉପସ୍ଥିତ ଥିଲେ ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
