ନୟାଗଡ: ଦିନକୁ ଦିନ ଆହୁରି ଜଟିଳ ହେବାରେ ଲାଗିଛି ବହୁଚର୍ଚ୍ଚିତ ପରୀ ହତ୍ୟା ମାମଲା । ଗତକାଲି ପରୀ ହତ୍ୟା ମାମଲାର ଅଭିଯୁକ୍ତକୁ ଗିରଫ କରିଛି ଏସଆଇଟି । ଏପଟେ ପ୍ରମାଣ ଯୋଗାଡ ପାଇଁ ଆକ୍ସନ ମୁଡରେ ଏସଆଇଟି । ମାମଲାରେ ଗାଁ ପୋଖରୀକୁ ନେଇ ବଢ଼ିଛି ସନ୍ଦେହ ।
ଆଉ ସେହି ପ୍ରମାଣ ପାଇଁ ଏସଆଇଟି ପକ୍ଷରୁ ନୟାଗଡର ଯଦୁପୁର ଗାଁରେ ଥିବା ଏକ ପୋଖରୀକୁ ପୂରା ଶୁଖାଇବ । ଗତ ଜୁଲାଇ 23 ତାରିଖରେ ପରୀର କଙ୍କାଳ ପୋଖରୀ କୂଳରୁ ମିଳିଥିଲା l ତେବେ ଅବଶିଷ୍ଟାଂଶ ହାଡ଼ମାଂସ ପୋଖରୀରେ ପଡ଼ିଥିବା ସନ୍ଦେହ କରି ପୋଖରୀକୁ ଶୁଖାଯିବ ବୋଲି ଚର୍ଚ୍ଚା ହେଉଛି l
ତେବେ ପୋଖରୀ ଶୁଖାଯିବା କଥାଟା ଏସଆଇଟି ପକ୍ଷରୁ କୁହାଯାଇ ନଥିବାବେଳେ, ଉକ୍ତ ପୋଖରୀ ପାଖକୁ ସ୍ଥାନୀୟ ପୋଲିସ ଯିବା ଓ କେଉଁ ପାର୍ଶ୍ବରେ ପାଣି ଛଡାଯାଇ ପାରିବ, ସେନେଇ ବିଚାରବିମର୍ଶ କରିବା କଥାରୁ ଏମିତି ପୋଖରୀ ଶୁଖାଇବା ପାଇଁ ଏସଆଇଟି ପ୍ରସ୍ତୁତ ହେଉଥିବା ଜଣାପଡିଛି ।
ତେବେ ଆଜି (ସୋମବାର) ସକାଳେ 2 ଜଣ ଅଧିକାରୀ ଯଦୁପୁର ଯାଇ ସ୍ଥିତି ପରଖିଛନ୍ତି । ଗାଁରେ ଚାପା ଉତ୍ତେଜନା ଲାଗି ରହିଛି କି ନାହିଁ ସେନେଇ ଗ୍ରାମ ସଭାପତିଙ୍କ ଠାରୁ ପଚାରି ବୁଝିଥିଲେ ଅଧିକାରୀ ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
