ନୟାଗଡ଼: ଟାଉନଥାନା ପୋଲିସକୁ ସଫଳତା । ନୟାଗଡ଼ ଜିଲ୍ଲା ସମେତ ପଡ଼ୋଶୀ ଜିଲ୍ଲାରେ ଲୁଟ କରି ଆତଙ୍କ ସୃଷ୍ଟି କରିଥିବା ୪ ଜଣିଆ ଲୁଟେରା ଗ୍ୟାଙ୍ଗର ଦୁଇ ସଦସ୍ୟଙ୍କୁ ଗିରଫ କରିବାରେ ସଫଳ ହୋଇଛି ନୟାଗଡ଼ ଟାଉନ ଥାନା ପୋଲିସ l ଏନେଇ ସୂଚନା ଦେଇଛନ୍ତି ନୟାଗଡ଼ ଅତିରିକ୍ତ SP । ଗିରଫ ହୋଇଥିବା ଲୁଟେରା ଦୁଇ ଭାଇ ହୋଇଥିବା ବେଳେ ସେମାନଙ୍କର ଘର ଗଞ୍ଜାମ ଜିଲ୍ଲା ଗଣ୍ଡପାଲି ଗାଁରେ ହୋଇଥିବା ନେଇ ପୋଲିସ ପକ୍ଷରୁ ସୂଚନା ଦିଆଯାଇଛି l ଗିରଫ ଅଭିଯୁକ୍ତ ହେଲେ ଏ ସନ୍ତୋଷ ଏବଂ ଏ ଅର୍ଜୁନ । ଏମାନଙ୍କ ଠାରୁ ୧୦ଟି ଦାମୀ ମୋବାଇଲ ଫୋନ ସହ ଦୁଇଟି ସୁନା ଚେନ ଏବଂ ଦୁଇଟି ମଟର ସାଇକେଲ ଜବତ କରିଛି ଟାଉନ ଥାନା ପୋଲିସ l ତେବେ ଏହି ଦୁଇଭାଇଙ୍କ ନାମରେ ରାଜ୍ୟର ବିଭିନ୍ନ ଥାନାରେ ଚୋରି, ଲୁଟ, ରାହାଜାନୀ ଭଳି ସଙ୍ଗୀନ ମାମଲା ରହିଛି l
ନୟାଗଡ଼ ଟାଉନ ଥାନା ଅଧୀନ ନାରାୟଣୀ ମନ୍ଦିର ଏବଂ ଦିଆନବନ୍ଧ ନିକଟରୁ ଦୁଇ ଜଣ ମହିଳାଙ୍କ ଠାରୁ ସୁନା ଚେନ ଲୁଟ ଘଟଣାରେ ସନ୍ତୋଷ ଏବଂ ଅର୍ଜୁନଙ୍କ ସମ୍ପୃକ୍ତି ରହିଥିବା ପୋଲିସ ତଦନ୍ତ ବେଳେ CCTV ଫୁଟେଜରୁ ଜାଣିବାକୁ ପାଇଛି l ଅନ୍ୟ ଦୁଇ ଜଣ ଲୁଟେରା ଫେରାର ଥିବାରୁ ସେମାନଙ୍କୁ ଧରିବା ପାଇଁ ସ୍ଵତନ୍ତ୍ର ଟିମ ଗଠନ କରାଯାଇଥିବା ନୟାଗଡ଼ ଅତିରିକ୍ତ SP ସୂଚନା ଦେଇଛନ୍ତି l ଲୁଟେରା ମାନେ ପରିବା ମାର୍କେଟରେ ଲୋକଙ୍କ ଠାରୁ ମୋବାଇ ଫୋନ ଲୁଟ କରିବାର ଦୃଶ୍ୟ ଜବତ ହୋଇଥିବା ମୋବାଇଲ ଫୋନରୁ ଜଣା ପଡିଥିବା ପୋଲିସ ସୂଚନା ଦେଇଛି l ଲୁଟ ବେଳର ଦୃଶ୍ୟକୁ ଲୁଟେରାମାନେ ନିଜ ମୋବାଇଲ ଫୋନରେ ସୁଟିଂ କରିଥିବା ପୋଲିସର ତଦନ୍ତରୁ ଜଣାପଡିଛି l ଏହାଛଡା ସେମାନେ ରାସ୍ତାରେ ମହିଳାଙ୍କ ବେକରୁ ସୁନା ଚେନ ଲୁଟ କରିବାର ଦୃଶ୍ୟ CCTV ଫୁଟେଜରୁ ଜଣାପଡ଼ିଥିବା ନୟାଗଡ଼ ଅତିରିକ୍ତ SP କହିଛନ୍ତି ।
ନୟାଗଡ଼ ଅତିରିକ୍ତ SP ଉମାକାନ୍ତ ମଲ୍ଲିକ କହିଛନ୍ତି, "ଗତ ୧୮ ତାରିଖରେ ଅନୁସୟା ଦୋରା ନାରାୟଣୀ ମନ୍ଦିରରୁ ପୂଜାସାରି ଫେରୁଥିବାବେଳେ ଦୁଇଜଣ ଦୁର୍ବୃତ୍ତ ଆସି ତାଙ୍କ ବେକରୁ ସୁନା ଚେନ ଛଡାଇ ନେଇଯାଇଥିଲେ । ଏହି ଘଟଣାର କିଛି ଦିନ ପୂର୍ବରୁ ଦିଆନବନ୍ଧ ନିକଟରୁ ଦୁଇ ଜଣ ମହିଳାଙ୍କ ଠାରୁ ସୁନା ଚେନ୍ ଲୁଟ କରିଥିଲେ । ସିସିଟିଭ ଫୁଟେଜକୁ ଆଧାରକରି ଗଞ୍ଜାମ ଜିଲ୍ଲାର ଆସ୍କା ଅଞ୍ଚଳରେ ରେଡ କରି ଦୁଇଜଣଙ୍କୁ ଗିରଫ କରିଥିଲେ । ଏହି ଘଟଣାରେ ଦୁଇଟି ମକଦମା ରୁଜୁ କରାଯାଇଛି । ଆଜି କୋର୍ଟ ଚାଲାଣ କରାଯିବ ।"
ଇଟିଭି ଭାରତ, ନୟାଗଡ
