ନୟାଗଡ଼: ନାବାଳିକା ଅପହରଣ ଓ ଦୁଷ୍କର୍ମ ମାମଲାରେ ଅଭିଯୁକ୍ତକୁ ୫ ବର୍ଷ ସଶ୍ରମ କାରାଦଣ୍ଡ । ୨୦୧୮ ମସିହାରେ ନୟାଗଡ଼ ଜିଲ୍ଲା ଫତେଗଡ଼ ଥାନା ଅଞ୍ଚଳରେ ଘଟିଥିବା ନାବାଳିକା ଅପହରଣ ଓ ଦୁଷ୍କର୍ମ ମାମଲାର ବିଚାର କରି ନୟାଗଡ଼ ଫାଷ୍ଟଟ୍ରାକ କୋର୍ଟ ଅଭିଯୁକ୍ତକୁ ଦଣ୍ଡାଦେଶ ଶୁଣାଇଛନ୍ତି । ସୂଚନା ଅନୁସାରେ ୨୦୧୮ ମସିହା ଏପ୍ରିଲ ୨୪ ତାରିଖରେ ନୟାଗଡ଼ ଜିଲ୍ଲା ଫତେଗଡ ଥାନା ଭାପୁର ଅଞ୍ଚଳର ୫ ବର୍ଷର ନାବାଳିକା ଘର ପାଖରେ ଖେଳୁଥିବା ସମୟରେ ଅଭିଯୁକ୍ତ ଝିଅଟିକୁ ଉଠାଇନେଇଥିଲା ।
ଏକା ଖେଳୁଥିବାର ସୁଯୋଗ ନେଇ ସେହି ଅଞ୍ଚଳର ଅଭିଯୁକ୍ତ ପ୍ରମୋଦ ଦେହୁରୀ ନାବାଳିକାଙ୍କୁ ଅପହରଣ କରି ଦୁଷ୍କର୍ମ କରିଥିଲା । ତେବେ ଘର ଭିତରୁ ଝିଅର ପାଟି ଶୁଣି ସ୍ଥାନୀୟ ଲୋକେ ଝିଅଟିକୁ ଉଦ୍ଧାର କରିଥିଲେ । ଏନେଇ ଗ୍ରାମ କମିଟିରେ ସମାଧାନ ପାଇଁ ଉଦ୍ୟମ କରାଯାଇଥିଲା । କିନ୍ତୁ ପରେ ନାବାଳିକାଙ୍କ ବାପା ଫତେଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ କୁ ଆଧାର କରି ଫତେଗଡ ପୋଲିସ ମାମଲା ରୁଜୁ କରି ତଦନ୍ତ କରିଥିଲା ।
ଅଭିଯୁକ୍ତକୁ ଗିରଫ ପରେ ଆଜି(ଶନିବାର) ନୟାଗଡ଼ ଫାଷ୍ଟଟ୍ରାକ କୋର୍ଟରେ ଏହାର ଶୁଣାଣି କରିଥିଲେ ବିଚାରପତି ବିରଞ୍ଚି କୁମାର ରଥ । ଅଭିଯୁକ୍ତକୁ ୫ ବର୍ଷ ସଶ୍ରମ କାରାଦଣ୍ଡ ସହ ୧୦ ହଜାର ଟଙ୍କା ଜୋରିମାନା ଦଣ୍ଡରେ ଦଣ୍ଡିତ କରିଯାଇଛି । ୧୮ ଜଣ ସାକ୍ଷୀଙ୍କ ବୟାନ, ଡାକ୍ତରୀ ରିପୋର୍ଟ, ସରକାରୀ ଓକିଲ ଅମିୟ ପଟ୍ଟନାୟକ ଯୁକ୍ତିକୁ ତର୍ଜମା କରି ବିଚାରପତି ଏହି ରାୟ ଶୁଣାଇଛନ୍ତି ।
ଇଟିଭି ଭାରତ, ନୟାଗଡ଼
