ନବରଙ୍ଗପୁର: ବଡ ବଡ ନାରାବାଜି ପରେ ବି ଆଜି ଯାଏଁ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରୁ ବଞ୍ଚିତ ଅନେକ ଚାଷୀ । ଖରିଫ ଋତୁରେ ଚାଷୀମାନେ ଧାନ ଚାଷ କରିଥିଲେ ଏବଂ ଭାବିଥିଲେ ଚାଷ ଭଲ ହେଲେ ପରିବାର ପ୍ରତିପୋଷଣରେ ସହାୟକ ହେବ । ହେଲେ ମରୁଡି ଆସି ସବୁ ଫସଲ ନଷ୍ଟ ହୋଇଥିଲା । ସରକାର ଏନେଇ ଝରିଗାଁକୁ ମରୁଡି ଘୋଷଣା ମଧ୍ୟ କରିଥିଲେ । ହେଲେ ଘଟଣାର 8 ମାସ ବିତିବା ପରେ ମଧ୍ୟ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅନୁଯାୟୀ କ୍ଷତିଗ୍ରସ୍ତଙ୍କୁ ମିଳିପାରି ନାହିଁ ବୀମା ରାଶି ।
ଏନେଇ ଝରିଗାଁ ବ୍ଲକ ଚାଷୀମାନେ ଜିଲ୍ଲାପାଳଙ୍କ ଦ୍ବାରସ୍ଥ ହୋଇ ନିଜର ଅସୁବିଧା ଜଣାଇଛନ୍ତି । ତେବେ କେନ୍ଦ୍ର ସରକାର ଓ ରାଜ୍ୟ ସରକାର ଚାଷୀମାନଙ୍କ ସୁବିଧା ପାଇଁ ଅନେକ ପ୍ରକାର ଯୋଜନା କରୁଛନ୍ତି । କିନ୍ତୁ ତାହା କେତେ କାର୍ଯ୍ୟକାରୀ ହେଉଛି ସେନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ।
ତେଣେ ଖୁବଶୀଘ୍ର ଝରିଗାଁ ବ୍ଲକର ସମସ୍ତ ଚାଷୀମାନଙ୍କୁ କେନ୍ଦ୍ର ସରକାରଙ୍କ ଫସଲ ବୀମା ଯୋଜନା ଟଙ୍କା ଦିଆଯାଉ ନ ହେଲେ ଆଗାମୀ ଦିନରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବୁ ବୋଲି ଚେତାବନୀ ଦେଇଛନ୍ତି ଚାଷୀ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
