ନବରଙ୍ଗପୁର: ଜିଲ୍ଲାର ପାପଡାହାଣ୍ଡିଠାରେ ଥିବା ମୃଗବିହାର ବା ମିନି ଚିଡିଆଖାନା ବର୍ତ୍ତମାନ କୋରୋନା କାଳରେ ସମ୍ପୂର୍ଣ୍ଣ ଶୂନଶାନ୍ ହୋଇ ପଡ଼ିଛି । ମୃଗବିହାର ପରିବେଶକୁ ଅଧିକ ସୌନ୍ଦର୍ଯ୍ୟକରଣ କରିବା ପାଇଁ ପରିସରରେ ଥିବା ପାଚେରୀ କାନ୍ଥରେ ସୁନ୍ଦର ସୁନ୍ଦର ଚିତ୍ରମାନ ଅଙ୍କାଯାଇ ରଙ୍ଗବେରଙ୍ଗ କରାଯାଉଛି । ଏହି ଚିତ୍ରଗୁଡିକ ଦେଖିଲେ ଯେମିତି ଲାଗୁଛି ନିରବତା ମଧ୍ୟରେ ଚିତ୍ର ଗୁଡିକ କଥା କହୁଛନ୍ତି ।
ପାପଡାହାଣ୍ଡି ଅଞ୍ଚଳ ଏକ ପର୍ଯ୍ୟଟନ ସ୍ଥଳୀର ସ୍ଥାନ ହୋଇଥିବାବେଳେ ଏଠାରେ ସହିଦସ୍ମୃତି ସ୍ତମ୍ଭ, ଐତିହାସିକ ଶୈବ ପୀଠ ଏବଂ ମୃଗବିହାର ମିନି ଚିଡିଆଖାନା ଆଦିର ସୌନ୍ଦର୍ଯ୍ୟକୁ ଉପଭୋଗ କରିବା ପାଇଁ ଜିଲ୍ଲା ଓ ଜିଲ୍ଲା ବାହାରର ପର୍ଯ୍ୟଟକ ଏଠାକୁ ଆସିଥାନ୍ତି । ଏବଂ ପ୍ରତିଦିନ ହଜାର ହଜାର ସଂଖ୍ୟାରେ ପର୍ଯ୍ୟଟକମାନେ ମୃଗବିହାର ଥିବା ହରିଣ ଏବଂ ଚିଡିଆଖାନାରେ ଥିବା ପଶୁ, ପକ୍ଷୀ ଦେଖିବାସହ ପରିସର ମଧ୍ୟରେ ଥିବା ପାର୍କରେ ବୁଲି ଆନନ୍ଦର ମଜା ଉଠାଇଥାନ୍ତି ।
ଚଳିତ ବର୍ଷ କୋରୋନା ମହାମାରୀ ଯୋଗୁଁ ମୃଗବିହାରରେ ପର୍ଯ୍ୟଟକଙ୍କ ପ୍ରବେଶ ଉପରେ କଟକଣା ଜାରି କରାଯାଇଥିବା ଯୋଗୁଁ ମୃଗବିହାର ପରିବେଶ ଏବେ ଶାନ୍ତ ହୋଇପଡିଛି । ଏହି ଲକଡାଉନ ସମୟରେ ମୃଗବିହାର ପରିସର ଭିତରେ ଏବଂ ବାହାରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ବନବିଭାଗ ତରଫରୁ ମୃଗ ବିହାରର ପାଚେରୀ ଗୁଡିକରେ ସୁନ୍ଦର ସୁନ୍ଦର ଜଙ୍ଗଲ ସମେତ ପଶୁମାନଙ୍କ ଚିତ୍ରମାନ ଅଙ୍କାଯାଉଛି ।
କଳାକାର ତାର ତୂଳୀରେ ଜୀବନ୍ତ ଚିତ୍ର ମାନ ଆଙ୍କିଥିବା ଦେଖିବାକୁ ମିଳିଛି । ରାସ୍ତାରେ ଯାଉଥିବା ଯାତ୍ରୀମାନେ ଏହି ଚିତ୍ରମାନଙ୍କୁ ଦେଖିବାକୁ କିଛି ସମୟ ରାସ୍ତାରେ ଅଟକି ଯାଇ ସୁନ୍ଦର ସୁନ୍ଦର ଚିତ୍ର ଗୁଡିକୁ ଦେଖିଥାନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ