କୋରାପୁଟ : କୋରାପୁଟ ବନାଞ୍ଚଳ ଅନ୍ତର୍ଗତ ବାରିଗୁଡ଼ା ଗ୍ରାମରୁ ଚନ୍ଦନ କାଠ ଜବତ । ଜବତ କାଠର ଓଜନ ପ୍ରାୟ 10କେଜି ହେବା ନେଇ ସୂଚନା । ଏ ସଂକ୍ରାନ୍ତରେ ବନବିଭାଗ କର୍ମଚାରୀ ଦୁଇଜଣ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ଦୁଇ ଅଭିଯୁକ୍ତ ହେଲେ ବୁଦୁ ମୁଦୁଲି ଓ ରଥ ମାଝୀ ଏନେଇ ବନାଞ୍ଚଳର ରେଞ୍ଜର ରୋହିତ କୁମାର ସୂଚନା ଦେଇଛନ୍ତି । ମଙ୍ଗଳବାର ସକାଳେ ବନ ଅଧିକାରୀମାନେ ପେଟ୍ରୋଲିଂ କରୁଥିବା ବେଳେ କୋରାପୁଟ ବାରୀଗୁଡ଼ା ଗ୍ରାମରେ ଚନ୍ଦନ କାଠ ଚାଲାଣ ହେଉଥିବା ନେଇ ଖବରପାଇଥିଲେ ବନକର୍ମଚାରୀ ।
ବନକର୍ମଚାରୀ ସେଠାରେ ପହଞ୍ଚି ଚଢ଼ଉ କରିଥିଲେ । ଚଢ଼ଉ ସମୟରେ ସେହି ଗ୍ରାମର ବୁଦୁ ମୁଦୁଲି ଓ ମାଛରା ଗ୍ରାମର ରଥ ମାଝୀଙ୍କୁ ଏକ ମଟର ସାଇକେଲ ଯୋଗେ ଏହି ଚନ୍ଦନ କାଠ ଚାଲାଣ କରୁଥିବା ଦେଖି ତାଙ୍କୁ ଅଟକାଇଥିଲେ । ପରେ ସେମାନଙ୍କୁ ପଚରାଉଚୁରା କରିବାସହ ତଦନ୍ତ ଆରମ୍ଭ କରିଥିଲେ । ତଦନ୍ତ ବେଳେ ସେମାନଙ୍କ ଠାରୁ ଗୁଳି ଭର୍ତ୍ତିଥିବା ଦେଶୀ ବନ୍ଧୁକ, ଚନ୍ଦନ ଗଛ କାଟିବା ପାଇଁ ବ୍ୟବହୃତ ହେଉଥିବା ଯନ୍ତ୍ରପାତି ଓ ଚନ୍ଦନକାଠ ଜବତ କରିଥିଲେ ।
ଏହି ଘଟଣାରେ ସମ୍ପୃକ୍ତ ଥିବା ଆଉ ତିନିଜଣ ସହଯୋଗୀ ଘଟଣାସ୍ଥଳରୁ ଫେରାର ମାରିଛନ୍ତି । ସେମାନଙ୍କୁ ଖୋଜା ଚାଲିଥିବା ବନ ବିଭାଗ ରେଞ୍ଜର ସୂଚନା ଦେଇଛନ୍ତି । ଅନ୍ୟପକ୍ଷରେ ଜବତ ହୋଇଥିବା କାଠର ମୂଲ୍ୟ ସରକାରୀ ଭାବେ ୨୦ ହଜାର ଟଙ୍କା । ଏହାର ବଜାର ଦର ଲକ୍ଷାଧିକ ଟଙ୍କା ହେବ ବୋଲି ଜଣାପଡିଛି ।
ଇଟିଭି ଭାରତ, କୋରାପୁଟ
