କୋରାପୁଟ: ସମ୍ବାଇ ନିକଟରେ ଆନ୍ତରାଜ୍ୟ ସୀମା ବିବାଦ ପୁଣି ଝୁଲିଲା । କୋରାପୁଟ ଜିଲ୍ଲାର ପଟ୍ଟାଙ୍ଗି ତହସିଲ ଅନ୍ତର୍ଗତ ସୁନାବେଡା ଠାରେ ଓଡିଶା -ଆନ୍ଧ୍ର ସୀମା ବିବାଦ ପୁଣିଥରେ ଝୁଲି ରହିଲା ।
ବୁଧବାର ସୀମା ବିବାଦ ସମାଧାନ ନିମନ୍ତେ କୋରାପୁଟ ଜିଲ୍ଲାପାଳଙ୍କ ସହ ଅନ୍ୟାନ୍ୟ ଅଧିକାରୀମାନେ ସୁନାବେଡା ଠାରେ ଆନ୍ଧ୍ରପ୍ରଦେଶର ଉଚ୍ଚପଦସ୍ଥ ଅଧିକାରୀମାନଙ୍କ ସହିତ ଆଲୋଚନା କରିଥିଲେ । କିନ୍ତୁ ଦିନ ତମାମ ଚର୍ଚ୍ଚା ଓ ମାପଚୁପ ହେବା ପରେ ମଧ୍ୟ ସୀମା ବିବାଦର ସମାଧାନ ହୋଇ ପାରିଲା ନାହିଁ । ତେବେ ଆସନ୍ତା ବର୍ଷ ଜାନୁଆରୀ ମାସ ପ୍ରଥମ ସପ୍ତାହରେ ଯୁଗ୍ମ ସୀମା ଚିହ୍ନଟ କରାଯିବା ସହ ଜାନୁଆରୀ ମାସ ଶେଷ ସପ୍ତାହରେ ସୀମା ବିବାଦ ସମାଧାନ କରିବା ନିମନ୍ତେ ଉଭୟ ପକ୍ଷ ସହମତି ପ୍ରକାଶ କରିଛନ୍ତି ।
ଗ୍ରାମବାସୀମାନେ ସୀମା ବିବାଦ ସମାଧାନ ହୋଇଯିବ ବୋଲି ଆଶା ବାନ୍ଧିଥିବା ବେଳେ ସମସ୍ୟା ପୁଣିଥରେ ଝୁଲି ରହିବା ଯୋଗୁଁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ତଥାପି ଜାନୁଆରୀ ମାସରେ ସମସ୍ୟାର ସମାଧାନ ହୋଇଯିବ ବୋଲି ସେମାନେ ଆଶା ବାନ୍ଧିଛନ୍ତି । ସୂଚନାଥାଉକି ଓଡିଶା ଓ ଆନ୍ଧ୍ରପ୍ରଦେଶ ସୀମାକୁ ନେଇ ସବୁବେଳେ ବିବାଦୀୟ ପରିସ୍ଥିତି ସୃଷ୍ଟି ହେଉଛି । ଅନ୍ଧ୍ରପ୍ରଦେଶ ଓଡିଶା ସୀମାକୁ ବେଆଇନ ପ୍ରବେଶ କରି ଗ୍ରାମ ଗୁଡିକରେ ନିଜ ରାଜ୍ୟର ସମସ୍ତ ପ୍ରକାରର ସେବା ପ୍ରଦାନ କରୁଛି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
