କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପରିସରରେ ଜାତୀୟ ଶିକ୍ଷାନୀତି ସମ୍ପର୍କରେ ଦୁଇ ଦିନିଆ ଅନ୍ତର୍ଜାତୀୟ ସେମିନାର ଉଦଘାଟିତ ହୋଇଯାଇଛି । ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଓ ଅଖିଳ ଭାରତୀୟ ରାଷ୍ଟ୍ରୀୟ ଶୈକ୍ଷିକ ମହାସଂଘ ମିଳିତ ଭାବେ ଏହି ସେମିନାରର ଆୟୋଜନ କରିଥିବା ବେଳେ ଏଥିରେ ବହୁ ଶିକ୍ଷାବିତ ଓ ଛାତ୍ରଛାତ୍ରୀ ଯୋଗ ଦେଇଥିଲେ ।
ଏହି ଅବସରରେ ବିଶ୍ୱବିଦ୍ୟାଳୟର କୁଳପତି ଚକ୍ରଧର ତ୍ରିପାଠୀ କହିଛନ୍ତି ଯେ,"ଜାତୀୟ ଶିକ୍ଷାନୀତିର ପୌରାଣିକ ମହତ୍ତ୍ୱ ଓ ପ୍ରାକୃତିକ ସୌନ୍ଦର୍ଯ୍ୟ ହେତୁ କୋରାପୁଟ ହେଉଛି ଶ୍ରେଷ୍ଠ ସ୍ଥାନ । ଏହାବ୍ୟତୀତ ମାଟିର ବିଶିଷ୍ଟ ବ୍ୟକ୍ତି ଉତ୍କଳମଣି ଗୋପବନ୍ଧୁ ଦାସ ଓ ସନ୍ଥ କବି ଭୀମ ଭୋଇଙ୍କ ପାଇଁ ମଧ୍ୟ ଓଡ଼ିଶା ରାଜ୍ୟ ଏହାର ଗୁରୁତ୍ୱ ବହନ କରୁଛି । ଭାରତ ଏତେ ବର୍ଷ ଧରି ଇଂରେଜମାନଙ୍କ ଅଧୀନରେ ଉପନିବେଶ ହୋଇରହିଥିଲେ ଏବଂ ଇଂରେଜମାନେ ଆମ ଭୂମିକୁ ନିୟନ୍ତ୍ରଣ କରିପାରିଥିଲେ, କିନ୍ତୁ ଆମ ହୃଦୟ ଏବଂ ମନକୁ ନିୟନ୍ତ୍ରଣ କରିପାରିନଥିଲେ । ସମୟ ଆସିଛି ଯେ ଆମେ ଆମର ସମୃଦ୍ଧ ଜ୍ଞାନର ପୁରୁଣା ଗୌରବକୁ ପୁନରୁଦ୍ଧାର କରିବା ଏବଂ ଭାରତୀୟ ନୀତିକୁ କାର୍ଯ୍ୟକାରୀ କରି ଆମ ଶିକ୍ଷା ବ୍ୟବସ୍ଥାକୁ ସୁଦୃଢ଼ କରିବା । ଦୃଢ଼ ଶିକ୍ଷା ବ୍ୟବସ୍ଥା ଗଠନରେ ମାନବ ବିଶ୍ୱାସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ପରସ୍ପର ଉପରେ ବିଶ୍ୱାସ କରିବା ଭାରତର ଏକ ସଂସ୍କୃତି ଯାହା ସାରା ବିଶ୍ୱରେ ଜଣାଶୁଣା ।"
ଏହାମଧ୍ୟ ପଢନ୍ତୁ.. ସଂକ୍ରମଣ ନିୟନ୍ତ୍ରଣ ଓ ପ୍ରାରମ୍ଭିକ ନିରାକରଣକୁ ନେଇ କୋରାପୁଟରେ ଜାତୀୟ କର୍ମଶାଳା
ଆଉମଧ୍ୟ ଶିକ୍ଷାବିତ ମହେନ୍ଦ୍ର କୁମାର କହିଛନ୍ତି, " ପାଶ୍ଚାତ୍ୟକରଣ ପଦ୍ଧତିକୁ ତ୍ୟାଗ କରି ଭାରତୀୟ ଶିକ୍ଷାରେ ମୂଲ୍ୟ ବ୍ୟବସ୍ଥାକୁ ଅନୁସରଣ କରିପାରିଲେ ଜାତୀୟ ଶିକ୍ଷା ନୀତି ସଫଳ ହେବ ।ଭାରତୀୟ ମୂଲ୍ୟ ବ୍ୟବସ୍ଥା ବିଶ୍ୱରେ ଅନନ୍ୟ ଏବଂ ପ୍ରତ୍ୟେକ ଦେଶ ବିଶ୍ୱରେ ଭାରତୀୟ ମୂଲ୍ୟ ବ୍ୟବସ୍ଥାକୁ ଅନୁସରଣ କରନ୍ତି | କିନ୍ତୁ ଏହା ଦୁର୍ଭାଗ୍ୟଜନକ ଯେ ଆମେ ଆମର ନୀତିକୁ ଭୁଲି ଯାଉଛୁ । ଆମର ପୁରୁଣା ଶିକ୍ଷା ବ୍ୟବସ୍ଥାର ପୁନରୁଦ୍ଧାର ଏବଂ ଏହାକୁ ଅଭ୍ୟାସରେ ଅନୁସରଣ କରିବା ଉଚିତ ।" ଏଥିସହିତ ପ୍ରାଥମିକ ଶିକ୍ଷାରେ ମାତୃଭାଷାର କାର୍ଯ୍ୟକାରିତା ଉପରେ ମଧ୍ୟ ଗୁରୁତ୍ବାରୋପ କରିଥିଲେ ଶିକ୍ଷାବିତ ମହେନ୍ଦ୍ର କୁମାର ।
ଅନ୍ୟପଟେ ନେପାଳର କାଠମାଣ୍ଡୁ ବିଶ୍ୱବିଦ୍ୟାଳୟର ଏସଇଏ (ସ୍କୁଲ ଅଫ୍ ଏଜୁକେସନର ଆସୋସିଏଟ୍) ଡିନ୍ ପ୍ରଫେସର ପ୍ରକାଶ ଚନ୍ଦ୍ର ଭଟ୍ଟରାୟ ମଧ୍ୟ ଏହି ସେମିନାରେ ସାମିଲ ହୋଇଥିଲେ । ଏହି ଅବସରରେ ଇ ନିଜ ବକ୍ତବ୍ୟରେ ଶିକ୍ଷା ବ୍ୟବସ୍ଥାରେ ନୈତିକ ବିଚାରକୁ ଗୁରୁତ୍ୱ ଦେଇଥିଲେ । ସେ କହିଥିଲେ," ଭାରତୀୟ ସଂସ୍କୃତି ଏବଂ ନେପାଳୀ ସଂସ୍କୃତି ପ୍ରାୟ ସମାନ ଏବଂ ନୈତିକ ବ୍ୟବସ୍ଥା ମଧ୍ୟ ସମାନ ।"
ତେବେ ଏହି ସେମିନାରରେ ବିଶ୍ୱବିଦ୍ୟାଳୟର ସମସ୍ତ ଅଧିକାରୀ ଓ ଅଧ୍ୟାପକ, ଭାରତ ତଥା ବିଦେଶର ବିଭିନ୍ନ ଅନୁଷ୍ଠାନର ବିଶିଷ୍ଟ ବ୍ୟକ୍ତି, ବିଶ୍ୱବିଦ୍ୟାଳୟର କର୍ମଚାରୀ ଓ ଛାତ୍ରଛାତ୍ରୀମାନେ ବହୁ ସଂଖ୍ୟାରେ ଯୋଗ ଦେଇଥିଲେ ।
ଇଟିଭି ଭାରତ, କୋରାପୁଟ
