ନବରଙ୍ଗପୁର: ସରକାରୀ ଜମିରେ ସ୍ବାସ୍ଥ୍ୟକେନ୍ଦ୍ର କରିବାକୁ ଗ୍ରାମବାସୀଙ୍କ ଦାବି । ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଡଙ୍ଗରଭେଜା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପାଇଁ ନୂତନ ଗୃହ ନିର୍ମାଣ ପାଇଁ ବେସରକାରୀ ଜମି ପରିବର୍ତ୍ତେ ସରକାରୀ ଜମିରେ କରାଯିବାକୁ ଦାବି କରି ସରୁଗୁଡା ଗ୍ରାମର ପ୍ରାୟ ୨୦୦ ଶହରୁ ଊର୍ଦ୍ଧ୍ବ ଗ୍ରାମବାସୀ ଏକାଠି ହୋଇଛନ୍ତି । ସରୁଗୁଡା ଠାରୁ ଏକ ବିଶାଳ ରାଲିରେ ବାହାରି ଜିଲ୍ଲାପାଳଙ୍କ ଉଦ୍ଦେଶ୍ୟରେ ନନ୍ଦାହାଣ୍ଡି ତହସିଲଦାର ଡ. ବନମାଳୀ ବେହେରା ଓ ନନ୍ଦାହାଣ୍ଡି ବିଡିଓ ଶିବଶଙ୍କର ମୁର୍ମୁଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି ।
ସୂଚନା ଥାଉକି, ଡଙ୍ଗରଭେଜା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଦୀର୍ଘ ବର୍ଷ ଧରି ଜଣେ ଅନସୂଚୀତ ଜାତି ବ୍ୟକ୍ତିଙ୍କ ନାମରେ ରହି ଥିବାବେଳେ ସେହି ଜମିର ଉତ୍ତରାଧିକାରୀମାନେ ଅନେକ ସମୟରେ ନିଜର ଅଧିକାର ସାବ୍ୟସ୍ତ କରୁଥିବା ନଜିର ରହିଛି । ତେଣୁ ବିଭିନ୍ନ ପ୍ରକାର ସମସ୍ୟା ଦେଖାଦେଇଥାଏ । ବର୍ତ୍ତମାନ ସରୁଗୁଡା ଗ୍ରାମବାସୀଙ୍କ ଦାବି ଅନୁଯାୟୀ ଡଙ୍ଗରଭେଜା ଠାରେ ବେସରକାରୀ ଜମିରେ ଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସରକାରୀ ଜମିକୁ ସ୍ଥାନାନ୍ତର କରାଯାଉ । ସରକାରଙ୍କ ନୂତନ ଗୃହ ପାଇଁ ନିର୍ଦ୍ଦେଶ ପରେ ସରକାରୀ ଜମି ଯୋଗାଇ ଦେବାକୁ ନନ୍ଦାହାଣ୍ଡି ତହସିଲଦାରଙ୍କୁ ନିର୍ଦ୍ଦେଶ ହୋଇଥିଲା । କିନ୍ତୁ ନୂତନ ତହସିଲଦାରଙ୍କ ଦାୟିତ୍ଵ ଗ୍ରହଣ କରିବା ଫଳରେ ସେହି କାର୍ଯ୍ୟ ବିଳମ୍ବ ହେଉଛି ।
ବେସରକାରୀ ଜମିରେ ସ୍ୱାସ୍ଥ୍ୟକେନ୍ଦ୍ର ଥିବାରୁ ବହୁତ ଅସୁବିଧା ହେଉଛି । ସରକାରୀ ଜମି ଚିହ୍ନଟ କରି ସେହି ଜମିରେ ଯଥାଶୀଘ୍ର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ନୂତନ ଗୃହ ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି । ଦାବି ପୂରଣ ନହେଲେ ରାଜରାସ୍ତାକୁ ଓହ୍ଲେଇବାକୁ ଚେତାବନୀ ଦେଇଛନ୍ତି ଗ୍ରାମବାସୀ । ଅନ୍ୟପଟେ ତହସିଲଦାର ବନମାଳୀ ମେହେର ଏବଂ BDO ଶିବ ଶଙ୍କର ମୁର୍ମୁ ଏହାର ଅନୁଧ୍ୟାନ କରି ପଦକ୍ଷେପ ନିଆଯିବ ବୋଲି କହିଛନ୍ତି ।
ଇଟିଭି ଭାରତ, ନବରଙ୍ଗପୁର