ଭୁବନେଶ୍ବର: ନବରଙ୍ଗପୁର ଉପଜିଲ୍ଲାପାଳଙ୍କ ଘରେ ଟଙ୍କା ଖଣି ! ଭିଜିଲାନ୍ସ ରେଡ୍ ବେଳେ ମିଳିଲା ବିଡା ବିଡା ନୋଟ । ଏତେ ଟଙ୍କା ଯେ, ଯେତେ ଗଣିଲେ ଗଣା ସରୁନି । ହାତରେ ଗଣି ଗଣି ଥକିଯିବା ପରେ ଟଙ୍କା ଗଣା ମେସିନ ମଗାଇଛି ଭିଜିଲାନ୍ସ ଟିମ୍ । ନବରଙ୍ଗପୁର ଉପଜିଲ୍ଲାପାଳ ପ୍ରଶାନ୍ତ ରାଉତଙ୍କ ଭୁବନେଶ୍ବର କାନନ ବିହାର ସ୍ଥିତ HIG-115 ଘରେ ଆଜି ଚଢାଉ ସମୟରେ ସରକାରୀ ବାବୁଙ୍କ ଟଙ୍କା ବିଡା ଦେଖି ତାଜୁବ ହୋଇଯାଇଛି ଭିଜିଲାନ୍ସ । ଭିଜିଲାନ୍ସକୁ ଦେଖି ଉପଜିଲ୍ଲାପାଳ ନିଜ ପଡୋଶୀ ଘରେ ୫ରୁ ୬ ପେଟି ଟଙ୍କା ଲୁଚାଇ ଦେଇଥିଲେ । ଏହାକୁ ଭିଜିଲାନ୍ସ ଅଧିକାରୀ ଠାବ କରିଛନ୍ତି । ବର୍ତ୍ତମାନ ଟଙ୍କା ଗଣା ଜାରି ରହିଛି ।
ସୂଚନାଯୋଗ୍ୟ, ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଟିମ୍ ଆଜି ନବରଙ୍ଗପୁର ଉପଜିଲ୍ଲାପାଳ ପ୍ରଶାନ୍ତ ରାଉତଙ୍କ ନବରଙ୍ଗପୁର, ଭଦ୍ରକ, ଭୁବନେଶ୍ବର ସମେତ ୯ଟି ସ୍ଥାନରେ ଚଢାଉ କରିଛି । ଏହି କ୍ରମରେ ଭୁବନେଶ୍ବର କାନନ ବିହାର ସ୍ଥିତ HIG-115 ଘରେ ରେଡ୍ ହୋଇଛି । ତେବେ ଉପଜିଲ୍ଲାପାଳ ଭିଜିଲାନ୍ସକୁ ଦେଖି ଭୟରେ ୪ରୁ ୫ ପେଟି ଟଙ୍କା ଓ ଡକ୍ୟୁମେଣ୍ଟ ଭର୍ତ୍ତି ପେଟି ନେଇ ପଡି଼ଶା ଘରେ ଲୁଚାଇ ଦେଇଥିଲେ । ହେଲେ ପଡିଶା ଘରେ ପଶି ଟଙ୍କା ପେଟି ଉଠାଇ ଆଣିଛି ଭିଜିଲାନ୍ସ । ଏହି ପେଟିରୁ ପୁଳା ପୁଳା ଟଙ୍କା ବଣ୍ଡଲ ସହ ଅନେକ ବ୍ୟାଙ୍କ ପାସବୁକ ଓ ଇନସୁରାନ୍ସ ବଣ୍ଡ ଠାବ ହୋଇଛି । ଭିଜିଲାନ୍ସ ଅଧିକାରୀ ପ୍ରଥମେ ହାତରେ ୨ କୋଟି ଟଙ୍କା ଯାଏଁ ଗଣିଥିବା ବେଳେ ଆହୁରି ନୋଟ ଥିବାରୁ ଟଙ୍କା ଗଣା ମେସିନ ମଗାଇଛନ୍ତି ।
ଏହାସହିତ ଉପଜିଲ୍ଲାପାଳଙ୍କ କିଛି ବ୍ୟାଙ୍କ ଲକର ମଧ୍ୟ ଠାବ କରିଛନ୍ତି ଭିଜିଲାନ୍ସ ଅଧିକାରୀ । ତେଣୁ ଟିମ୍ ବ୍ୟାଙ୍କକୁ ଯାଇ ଛାନଭିନ୍ ଜାରି ରଖିଛନ୍ତି । ତେବେ ଉପଜିଲ୍ଲାପାଳଙ୍କ ଏତେ ପରିମାଣର ଟଙ୍କା ଦେଖି ସେ ଡିଜିଟାଲ ମୁଦ୍ରା ବା କ୍ରିଫ୍ଟୋରେ ବିନିଯୋଗ କରିଥାଇ ପାରନ୍ତି ବୋଲି ଭିଜିଲାନ୍ସ ସନ୍ଦେହ କରୁଛି । ସେଥିପାଇଁ ସାଇବର ଏକ୍ସପର୍ଟ ଜରିଆରେ ଛାନଭିନ୍ କରାଯାଉଛି ।
ଏହାମଧ୍ୟ ପଢନ୍ତୁ: ନବରଙ୍ଗପୁର ଉପଜିଲ୍ଲାପାଳଙ୍କ ଘରେ ଭିଜିଲାନ୍ସ ରେଡ୍
ପ୍ରଶାନ୍ତ ରାଉତଙ୍କ କେବଳ ଭୁବନେଶ୍ଵର କାନନ ବିହାରରେ ଦୁଇ ମହଲା ବିଳାସମୟ କୋଠା ଠାବ ହୋଇଛି । ବର୍ତ୍ତମାନ ତାଙ୍କର ନବରଙ୍ଗପୁର ସ୍ଥିତ ବାସଭବନ ଓ ଅଫିସ, ଭଦ୍ରକରେ ଥିବା ପୈତୃକ ସମେତ ମୋଟ ୯ଟି ସ୍ଥାନରେ ରେଡ୍ ଚାଲିଛି । ଚଢାଉରେ ୨ ଜଣ ଅତିରିକ୍ତ ଏସପି, ୭ ଜଣ ଡିଏସପି, ୮ ଜଣ ଇନ୍ସପେକ୍ଟର ସାମିଲ ଅଛନ୍ତି । ଭିଜିଲାନ୍ସ ସୂଚନା ମୁତାବକ, ଏଯାବତ୍ ପ୍ରଶାନ୍ତଙ୍କ ଭୁବନେଶ୍ବର ସ୍ଥିତ ଘରୁ ୨କୋଟି ଟଙ୍କାର ନଗଦ ଟଙ୍କା ଠାବ ହୋଇଛି । ଆହୁରି ଟଙ୍କା ବାକି ଥିବାରୁ ଟଙ୍କା ଗଣା ମେସିନର ସାହାରା ନିଆଯାଇଛି । ନଗଦ ଟଙ୍କା ସହ ଘରୁ ଅନେକ ସୁନା ଅଳଙ୍କାର ମଧ୍ୟ ଠାବ କରାଯାଇଛି ।
ଇଟିଭି ଭାରତ, ଭୁବନେଶ୍ବର
