ଖୋର୍ଦ୍ଧା: ଠାକୁରପଡା ହତ୍ୟାକାଣ୍ଡ ଘଟଣାରେ ତିନି ଗିରଫ । ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ଠାକୁରପଡା ଗ୍ରାମରେ ମଙ୍ଗଳବାର ରାତିରେ ଉମାକାନ୍ତ ସାହୁ ନାମକ ଜଣେ ଯୁବକଙ୍କୁ ସଂଘବଦ୍ଧ ହତ୍ୟା କରାଯାଇଥିଲା । ବୁଧବାର ଏହି ଘଟଣାରେ ଆଦର୍ଶ ଥାନା ପୋଲିସ ମୁଖ୍ୟ ଅଭିଯୁକ୍ତଙ୍କ ସହ ତିନି ଜଣଙ୍କୁ ଗିରଫ କରିଛନ୍ତି ।
ଅଭିଯୁକ୍ତମାନେ ଉକ୍ତ ଗ୍ରାମର ଅମୂଲ୍ୟ ସାହୁ, ମା ସୁଲୋଚନା ସାହୁ ଏବଂ ଭଉଣୀ ମମତା ସାହୁ । ସେହିପରି ହତ୍ୟାକାଣ୍ଡରେ ବ୍ୟବହାର ହୋଇଥିବା କଟୁରି, ଲୁହା ପାଇପ ଏବଂ ଠେଙ୍ଗା ଜବତ କରିଛି ପୋଲିସ ।
ପ୍ରେମ ଜନିତ ପୂର୍ବ ଶତ୍ରୁତାକୁ କେନ୍ଦ୍ର କରି ହତ୍ୟାକାଣ୍ଡ ହୋଇଥିବା ବୁଧବାର ଏକ ସାମ୍ବାଦିକ ସମ୍ମିଳନୀରେ ଖୋର୍ଦ୍ଧା ଏସଡିପିଓ ସୁଶୀଲ ମିଶ୍ର ସୂଚନା ଦେଇଛନ୍ତି ।
ସେହିଭଳି ଏହି ଘଟଣାରେ ଅନ୍ୟଜଣେ ଅଭିଯୁକ୍ତକୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ରେଡ଼ କରୁଥିବା ଜଣାପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର, ପଣ୍ଡା, ଇଟିଭି ଭାରତ