ଭୁବନେଶ୍ବର: ଆରମ୍ଭ ହୋଇଛି ଶିଳ୍ପ ମହାକୁମ୍ଭ ମେକ ଇନ ଓଡିଶା କନକ୍ଲେଭ 2022 (Make In Odisha Conclave 2022) । ରାଜ୍ୟକୁ ଶିଳ୍ପ ସମୃଦ୍ଧି କରିବା ପାଇଁ ତୃତୀୟ ସଂସ୍କରଣରେ ଶିଳ୍ପ ନୀତି ୨୦୨୨ ଘୋଷଣା କରିଛନ୍ତି ସରକାର । ଆମ ଶିଳ୍ପନୀତି ଦେଶରେ ଶ୍ରେଷ୍ଠ ହୋଇଥିବାବେଳେ ଓଡ଼ିଶା ଟ୍ରିଲିୟନ୍ ଡଲାର ଇକୋନୋମି ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ମେକ ଇନ ଓଡ଼ିଶା କନକ୍ଲେଭ ମଞ୍ଚରୁ ଓଡ଼ିଶାରେ ପୁଞ୍ଜିନିବେଶ ପାଇଁ ଶିଳ୍ପପତିଙ୍କୁ ଆହ୍ବାନ କରିଛନ୍ତି ମୁଖ୍ୟମନ୍ତ୍ରୀ । ଓଡ଼ିଶାରେ ଶିଳ୍ପ ସମୃଦ୍ଧ ଭିତ୍ତିଭୂମି ରହିଥିବାବେଳେ ଅଣାଯାଇଛି ନୂଆ ଶିଳ୍ପନୀତି । ଓଡ଼ିଶାରେ ପୁଞ୍ଜିନିବେଶ କଲେ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ ପ୍ରତିଶୃତି ଦେଇଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ କହିଛନ୍ତି, "ଓଡ଼ିଶା ଟ୍ରିଲିୟନ ଡଲାର ଇକୋନୋମି ହେବାକୁ ପ୍ରତିବଦ୍ଧ । ଓଡ଼ିଶାରେ ଶିଳ୍ପ ପ୍ରତିଷ୍ଠା ପାଇଁ କୌଣସି ବାଧା ରହିବ ନାହିଁ କାରଣ ରାଜ୍ୟ ସରକାର ସର୍ବୋତ୍ତମ ସୁବିଧା ଯୋଗାଇ ଦେବ । ଏହାସହ ବୈଦ୍ୟୁତିକ କ୍ଷେତ୍ରରେ ସଂସ୍କାର ଆଣିବାରେ ଅଗ୍ରଣୀ ସହ ଆମ ଶିଳ୍ପନୀତି ଦେଶରେ ଶ୍ରେଷ୍ଠ" ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ନିବେଶକ ସମୁଦାୟ ପାଇଁ ଓଡିଶା ହେବ ଡେଷ୍ଟିନେସନ ଅଫ ଚଏସ୍ । ଓଡିଶା ବିକାଶରେ ସାମିଲ ହେଲେ ନିବେଶକ । ମେକ ଇନ ଓଡିଶା କାର୍ଯ୍ୟକ୍ରମରେ ଲାଗୁ ହୋଇଛି ନୂଆ ଶିଳ୍ପ ନୀତି । ଅଧିକ ପୁଞ୍ଜି ଆଶାରେ ରାଜ୍ୟ ସରକାର । ଶିଳ୍ପ ଅଭିବୃଦ୍ଧିକୁ ତ୍ବରାନ୍ବୀତ, ନିଯୁକ୍ତି ସୃଷ୍ଟି ଏବଂ ଓଡିଶାକୁ ପୁଞ୍ଜି ନିବେଶର ଲକ୍ଷ୍ୟସ୍ଥଳ କରିବା ଲକ୍ଷ୍ୟରେ ମେକ ଇନ ଓଡିଶା କନକ୍ଳେଭରେ ତୃତୀୟ ସଂସ୍କରଣ ଆରମ୍ଭ ହୋଇଛି । ୭.୨ ଲକ୍ଷ କୋଟି ଟଙ୍କାର ହେବ ପୁଞ୍ଜିନିବେଶ । ଖୁବଶୀଘ୍ର ଓଡିଶା ଟ୍ରିଲିୟନ ଡଲାର ଅର୍ଥନୀତି ଛୁଇଁବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଯେଉଁ ଶିଳ୍ପ ସଂସ୍ଥା ରାଜ୍ୟକୁ ଆସିବ 'Better than best' ସୁବିଧା ସୁଯୋଗ ଯୋଗାଇ ଦିଆଯିବ ବୋଲି କହିଛନ୍ତି ।
ନୂଆ ଶିଳ୍ପ ନୀତି ଅନୁସାରେ, ଯେଉଁ କ୍ଷେତ୍ରରେ ୨୦୦ରୁ ଅଧିକ ଓଡ଼ିଆ ଲୋକେ ନିଯୁକ୍ତି ପାଇବେ ତାକୁ ପ୍ରାୟୋରିଟି ସେକ୍ଟର ଏବଂ ହଜାରେରୁ ଅଧିକ ଓଡ଼ିଆ ନିଯୁକ୍ତି ପାଉଥିବା ସେକ୍ଟରକୁ ଥ୍ରଷ୍ଟ ସେକ୍ଟର ଭାବେ ବିବେଚନା କରାଯିବ । ବିଜୁ ଇକୋନୋମି କରିଡ଼ରକୁ ଏହି ପଲିସିରେ ଥ୍ରଷ୍ଟ ସେକ୍ଟର ଭାବେ ବିବେଚନା କରାଯାଇଛି । ସେହିପରି ଜମି ଆବଣ୍ଟନକୁ ସୁଗମ କରିଛନ୍ତି ରାଜ୍ୟ ସରକାର । ୩୦ ଦିନ ଭିତରେ ୩୦ ଏକର, ୫୦ ଦିନରେ ୫୦ ଏକର ଓ ୧୦୦ ଦିନରେ ୧୦୦ ଏକର ଜମି ଯୋଗାଇ ଦିଆଯିବ । ପାଣି, ବିଜୁଳି ଓ ଗମନା ଗମନ ସୁବିଧା ସହ ଜମି ଯୋଗାଇ ଦିଆଯିବ ବୋଲି କହିଛନ୍ତି ଶିଳ୍ପ ସଚିବ ।
କାର୍ଯ୍ୟକ୍ରମରେ ଯୋଗ ଦେଇଛନ୍ତି ୧୦୦ରୁ ଊର୍ଦ୍ଧ୍ବ ଶିଳ୍ପ ସଂସ୍ଥା । ୨୧ଟି ଚୁକ୍ତି ସ୍ବାକ୍ଷର ହୋଇଛି । ଓଡ଼ିଶାରେ ବେଦାନ୍ତ ୨୫ ହଜାର କୋଟି ଟଙ୍କା ପୁଞ୍ଜି ନିବେଶ କରିବାକୁ ଆଗ୍ରହ କରିଛି । ଗତ ୨୨ ବର୍ଷ ମଧ୍ୟରେ ବେଦାନ୍ତ ରାଜ୍ୟରେ ୮୦ ହଜାର କୋଟି ଟଙ୍କା ନିବେଶ କରିସାରିଛି, ଯାହାକି କୌଣସି କମ୍ପାନୀ କରିନାହିଁ । ଏହା ସହ ଡିଜିଟାଲ ୟୁନଭରସିଟି ତିଆରି କାରିବାକୁ ଲକ୍ଷ୍ୟ ଥିବା କହିଛନ୍ତି ସଂସ୍ଥା ଅଧ୍ୟକ୍ଷ ଅନିଲ ଅଗ୍ରୱାଲ । ସେହିପରି ଜେଏସଡ଼ବ୍ଲୁ ଏକ ଲକ୍ଷ କୋଟି ପୁଞ୍ଜି ନିବେଶ କରିବ ବୋଲି କହିଛନ୍ତି । ଏହା ସହ ବିଶ୍ବର ସର୍ବ ବୃହତ ଷ୍ଟିଲ ପ୍ଲାଣ୍ଟ କରିବାକୁ ଲକ୍ଷ୍ୟ ରଖିଛି ଜେଏସପିଏଲ ।
ଇଟିଭି ଭାରତ, ଭୁବନେଶ୍ବର
