ଭୁବନେଶ୍ବର: ବରଗଡ଼ ଜିଲ୍ଲା ଅତାବିରା ଏବଂ ଢେଙ୍କାନାଳ ଜିଲ୍ଲା ହିନ୍ଦୋଳ ଏନଏସିର ନିର୍ବାଚନ ଫଳାଫଳ ଘୋଷଣା ହୋଇଛି । ଶାସକ ବିଜେଡି ସପକ୍ଷରେ ଯାଇଛି ଜନତାଙ୍କ ରାୟ । ଉଭୟ ଏନଏସିରେ ବିଜେଡି କ୍ଲିନ ସ୍ବିପ କରିଛି । ଅତାବିରାରେ ୧୨ଟି ୱାର୍ଡରୁ ବିଜେଡି ୧୧ଟି ୱାର୍ଡରେ ଜିତିଥିବା ବେଳେ କଂଗ୍ରେସ ଗୋଟିଏ ୱାର୍ଡରେ ହାତେଇଛି । ସେହିପରି ହିନ୍ଦୋଳରେ ମଧ୍ୟ ୧୬ଟି ୱାର୍ଡରୁ ବିଜେଡି ୧୧ଟି ୱାର୍ଡରେ ବାଜି ମାରିଛି । ବିଜେପିକୁ ୫ଟି ସିଟ୍ରେ ବିଜୟ ମିଳିଥିବା ବେଳେ କଂଗ୍ରେସ ଖାତା ମଧ୍ୟ ଖୋଲିପାରି ନାହିଁ । ତେବେ ଉଭୟ ସ୍ଥାନରେ ହାରକୁ ସ୍ବୀକାର କରିଛି କଂଗ୍ରେସ ।
ରାଜ୍ୟରେ ନିର୍ବାଚନ ଋତୁ ଜାରି ରହିଛି । ଧାମନଗର ପରେ ପଦ୍ମପୁର, ଆଉ ଏବେ ଝାରସୁଗୁଡ଼ାରେ ହେବାକୁ ଯାଉଛୁ ଉପନିର୍ବାଚନ । ତେବେ ଏହାରି ଭିତରେ ଆଜି ଆସିଛି ଏନଏସି ନିର୍ବାଚନ ଫଳାଫଳ । ଯାହାକି ଶାସକ ବିଜେଡି ସପକ୍ଷରେ ଯାଇଛି । ଉଭୟ ଅତାବିରା ଏବଂ ହିନ୍ଦୋଳରେ ବାଜିମାତ କରିଛି ବିଜେଡି । ବିଜେପି ଲୋକଙ୍କ ଆସ୍ଥାଭାଜନ ହେବାରେ ବିଫଳ ହୋଇଛି । କଂଗ୍ରେସର ଅବସ୍ଥା ମଧ୍ୟ ସମାନ । ତେବେ ଆଗକୁ ସାଧାରଣ ନିର୍ବାଚନ ଆସୁଥିବାରୁ ଛୋଟ ବଡ଼ ନିର୍ବାଚନ ସାଧାରଣ ନିର୍ବାଚନରେ ପ୍ରଭାବ ପକାଇବାର ଯଥେଷ୍ଟ ସମ୍ଭାବନା ରହିଛି । ତେବେ ଉଭୟ ସ୍ଥାନରେ ହାରକୁ ସ୍ବୀକାର କରିଥିଲେ ମଧ୍ୟ ଏହି ଫଳାଫଳ ଆସନ୍ତା ସାଧାରଣ ନିର୍ବାଚନରେ ପ୍ରଭାବ ପକାଇବାକୁ ଅସ୍ବୀକାର କରିଛି କଂଗ୍ରେସ । ଶାସକ ଦଳ ବିପୁଳ ଅର୍ଥ କାରବାର କରି ଭୋଟ ହାତେଇଥିବା ଅଭିଯୋଗ ଆଣିଛନ୍ତି କଂଗ୍ରେସ ବିଧାୟକ ସୁର ରାଉତରାୟ । ସେପଟେ ଉଭୟ କେନ୍ଦ୍ର ଓ ରାଜ୍ୟ ସରକାର ଉପରେ ଲୋକେ ବିଶ୍ବାସ ହରାଇଲେଣି, ତେଣୁ ସାଧାରଣ ନିର୍ବାଚନରେ କଂଗ୍ରେସ ଭଲ ପଦର୍ଶନ କରିବ ବୋଲି କହିଛନ୍ତି ପିସିସି ସଭାପତି ଶରତ ପଟ୍ଟନାୟକ ।
ଉଭୟ ଅତାବିରା ଓ ହିନ୍ଦୋଳ ଏନଏସି ନିର୍ବାଚନରେ କଂଗ୍ରେସର ପରାଜୟକୁ ସ୍ବୀକାର କରି ବିଧାୟକ ସୁର ରାଉତରାୟ କହିଛନ୍ତି, "ବିଜେଡି ଭୋଟକୁ କିଣିଛି । ପୁଳାପୁଳା ଟଙ୍କା ବ୍ୟୟ କରି ଭୋଟ ପ୍ରଭାବିତ କରିଛି । କଂଗ୍ରେସ ପାଖରେ ଅର୍ଥ ନାହିଁ । ତେଣୁ ଏନଏସି ନିର୍ବାଚନ ଆମେ ହାରିଲୁ । ହେଲେ ଏହାର କୌଣସି ପ୍ରଭାବ ଆଗାମୀ ସାଧାରଣ ନିର୍ବାଚନରେ ପଡିବ ନାହିଁ । ଲୋକେ କଂଗ୍ରେସକୁ ଭୋଟ ଦେଇ ୨୦୨୪ରେ କ୍ଷମତାକୁ ଆଣିବେ ।" ସେହିଭଳି ପିସିସି ସଭାପତି ଶରତ ପଟ୍ଟନାୟକ ମଧ୍ୟ ଜନତାଙ୍କ ରାୟକୁ ସ୍ବୀକାର କରିଛନ୍ତି । ସେ କହିଛନ୍ତି, "ଶାସକ ଦଳ ଅର୍ଥ ଦ୍ବାରା ଜନମତକୁ ପ୍ରଭାବିତ କରିଛି । ତଥାପି ଉଭୟ ସ୍ଥାନରେ କଂଗ୍ରେସର ଭୋଟ ହାର ପୂର୍ବ ଅପେକ୍ଷା ବୃଦ୍ଧି ପାଇଛି । ଆଗାମୀ ସାଧାରଣ ନିର୍ବାଚନରେ କଂଗ୍ରେସ ବହୁତ ଭଲ କରିବ ।"
ଇଟିଭି ଭାରତ, ଭୁବନେଶ୍ବର
