କେନ୍ଦ୍ରାପଡା: କୋଭିଡ ନିୟମ ଭାଙ୍ଗିବା ପୂଜକଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ଆଜି ( ବୁଧବାର) ମା'ଙ୍କ ମହାଷ୍ଟମୀ ପୂଜା ଚାଲିଥିବାବେଳେ ବ୍ରାହ୍ମଣଙ୍କୁ ଉଠାଇ ନେଇଛି କେନ୍ଦ୍ରାପଡ଼ା ଟାଉନ୍ ପୋଲିସ । ସୂଚନାନୁସାରେ କୋଭିଡ ନିୟମ ଉଲ୍ଲଙ୍ଘନ କରି ପୂଜା ଚାଲିଥିବା ଅଭିଯୋଗରେ ପୋଲିସ ପୂଜକଙ୍କୁ ଉଠାଇ ନେଇଥିବା ଜଣାପଡିଛି । ତେବେ ପୂଜା ସମୟରେ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡାକଡି କରାନଯିବା ସହ ପୋଲିସ ସହାୟତା ଯୋଗାଇ ଦିଆଯାଇ ନଥିବା ନେଇ ପୂଜା କମିଟିର ସମ୍ପାଦକ ଅଭିଯୋଗ ଆଣିଛନ୍ତି ।
ତେବେ ଏହି ଘଟଣାକୁ ନେଇ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇବା ଦୀର୍ଘ ସମୟ ଧରି କେନ୍ଦ୍ରାପଡ଼ା ସହରର ମଢିଆଳ ଛକରେ ଧାରଣା ଦେବା ସହ ପୋଲିସର ଏଭଳି ବର୍ବରତା ବିରୋଧରେ ଟାଉନ ଥାନାଧିକାରୀଙ୍କ ନିଲମ୍ବନ ଦାବି କରିଥିଲେ ।
ସେପଟେ ପୂଜା କମିଟିର ସଦସ୍ୟ ଓ ସାଧାରଣ ଭକ୍ତମାନଙ୍କ ଦ୍ବାରା ଉତ୍ତେଜନା ବୃଦ୍ଧି ପାଇଥିବାରୁ କେନ୍ଦ୍ରାପଡ଼ା ଟାଉନ୍ ଥାନା ଅଧିକାରୀ ଜ୍ୟୋତିରଞ୍ଜନ ସାମନ୍ତରାୟ ବ୍ରାହ୍ମଣଙ୍କୁ ଛାଡି ଦେଇଥିବାବେଳେ ରାସ୍ତା ଅବରୋଧ ହଟିଥିବା ଜଣାପଡିଛି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
