ଭବାନୀପାଟଣା : ନୂଆଁଖାଇ ପର୍ବ ଅତି ନିଆରା ଓ ସ୍ବତନ୍ତ୍ରତା । ଏହା ଆଜି ପୁଣିଥରେ ପ୍ରମାଣିତ ହୋଇଛି କଳାହାଣ୍ଡିର ପଥର୍ଲା ଗାଁର ପ୍ରତି ଘରେ ଓ ପରିବାରରେ । ସବୁ ମନୋମାଳିନ୍ୟ ଭୁଲି ଏକାଠି ନୂଆ ଖାଇଛନ୍ତି ପଥର୍ଲାଗାଁର ଆବାଳବୃଦ୍ଧ ବନିତା । ପଶ୍ଚିମ ଓଡିଶାରେ ଅନେକ ଅଞ୍ଚଳରେ ଗୋଟିଏ ଦିନରେ ନୂଆଁଖାଇ ପର୍ବ ପାଳନ ହେଉଥିବା ବେଳେ କଳାହାଣ୍ଡି ଜିଲ୍ଲାରେ ପର୍ଯ୍ୟାୟ କ୍ରମେ ଏ ପର୍ବ ପାଳନ କରାଯାଏ । ପର୍ବ ପାଳନରେ ବିଭିନ୍ନତା ଥିଲେ ମଧ୍ୟ ଏହି ପର୍ବ ସମସ୍ତଙ୍କୁ ଏକାଠି ବାନ୍ଧି ରଖେ । ଜିଲ୍ଲାରେ ମହାନ ଗଣପର୍ବ ନୂଆଖାଇ ସପ୍ତପୁରୀ ଅମାବାସ୍ୟା ଠାରୁ ଆରମ୍ଭ ହୋଇ ଦଶହରାର ଦଶମୀରେ ଶେଷ ହୋଇଥାଏ । ଏହା ପଛରେ ଏକ କିମ୍ବଦନ୍ତୀ ରହିଛି ।
ପ୍ରଥମେ ଗାଁରେ ସଭା ହୋଇ ନବାନ୍ନ ପାଇଁ ସମୟ ନିର୍ଘଣ୍ଟ ସ୍ଥିର ହୁଏ । ସପ୍ତପୁରୀ ଅମାବାସ୍ୟା ପର ଦିନ ଅର୍ଥାତ ଆଜି ଜିଲ୍ଲାର କେସିଙ୍ଗ ଅଞ୍ଚଳର ପଥର୍ଲା, ବାହାଦୁରପଦର, ପଲସାପଡା ଅଞ୍ଚଳର ଲୋକେ ନବାନ୍ନ ଭକ୍ଷଣ କରିଛନ୍ତି । ଗ୍ରାମବାସୀ ନୂଆ ଚୁଡା, ଗୁଡ, ଧାନ ସଂଗ୍ରହ କରି ସପ୍ତପୂରୀ ଅମାବାସ୍ୟା ପରଦିନ ନିଜ ଗ୍ରାମର ଇଷ୍ଟ ଦେବୀଙ୍କ ନିକଟରେ ପୂଜାପାଠ ପରେ ନବାନ୍ନ ଲାଗି କରାଯାଏ । ଏହାପରେ ଗାଁରେ ପାଳିତ ହୁଏ ନୂଆଁଖାଇ । ଗାଁର ପ୍ରତିଟି ଘରେ ପରିବାରର ସମସ୍ତଲୋକ ଏକାଠି ବସି ନୂଆଁଖାଇ ଥାନ୍ତି । ଏହାପରେ ଆରମ୍ଭ ହୋଇଥଏ ଜୁହାର ଭେଟର ପର୍ବ । ସାନମାନେ ମଣ୍ଡିଆମାରି ବଡ଼ମାନଙ୍କ ଠାରୁ ଆଶୀର୍ବାଦ ନେଇଥାନ୍ତି । ଏହାପରେ ଜମେ ଖେଳକୁଦ, ନାଚଗୀତର ଆସର । ଢୋଲ,ନିଶାନ ତାସା ସହ କଳାହାଣ୍ଡିର ବୀରବାଦ୍ୟ ଘୁମୁରାର ଘୁମ୍ ଘୁମ୍ ଶବ୍ଦରେ ଦୁଲୁକି ଉଠେ ଗାଁ ମାଟି । ବାଦ୍ୟର ତାଳେ ତାଳେ ପାଦରେ ପାଦ ମିଳାଇ ନାଚି ଥାନ୍ତି । ଆଉ ଗାଁ ଲୋକଙ୍କ ନାଚରେ ଦୁଲୁକି ଉଠିଥିଲା ଗାଁ ଦାଣ୍ତ । ପୂର୍ବରୁ ନୂଆଁଖାଇ ଆସିଲେ ଜିଲ୍ଲା ଓ ରାଜ୍ୟ ବାହାରେ ଥିବା ପ୍ରତ୍ୟେକ ଲୋକେ ନିଜ ଘରକୁ ବାହୁଡି ଥାନ୍ତି । ଆଉ ରୋଜଗାର କରିଥିବା ଅର୍ଥକୁ ଧରି ଗାଁକୁ ଫେରି ବନ୍ଧୁ ବାନ୍ଧବ ପରିବାର ବର୍ଗଙ୍କ ସହ ମିଶି ନୂଆଁଖାଇଥାନ୍ତି । ପରିବାର ପରିଜନଙ୍କ ସହ ଖୁସିରେ ଦିନଟି କଟିଥାଏ ।
ଏହାବି ପଢନ୍ତୁ: ଏକତାର ପର୍ବ ନୂଆଁଖାଇ, ପର୍ଯ୍ୟାୟକ୍ରମେ ନୂଆ ଖାଇବେ କଳାହାଣ୍ଡିବାସୀ
ସୂଚନା ଥାଉକି, ଶୁକ୍ଳପକ୍ଷ ପଞ୍ଚମୀ ତିଥିରେ କଳାହାଣ୍ଡି ଜିଲ୍ଲାର ଅନେକ ଅଞ୍ଚଳରେ ନୂଆଁଖାଇ ପାଳନ ହୁଏ । ପୁଣି ଦଶମୀ ତିଥିରେ ଅଧିଷ୍ଠାତ୍ରୀ ଦେବୀ ମା' ମାଣିକେଶ୍ବେରୀଙ୍କ ନିକଟରେ ନବାନ୍ନ ଲାଗି ହୋଇ ସମସ୍ତ ଗଡ଼ଜାତ ଅଞ୍ଚଳରେ ପାଳନ ହୋଇଥାଏ । ଅଧିଷ୍ଠାତ୍ରୀ ଦେବୀଙ୍କ ନିକଟରେ ନବାନ୍ନ ଲାଗି ନେଇ ଲଗ୍ନ ଧାର୍ଯ୍ୟ ହୋଇଛି । ଆସନ୍ତା ଭାଦ୍ରବ ମାସ ଶୁକ୍ଳପକ୍ଷ ଦଶମୀ ତିଥି ସକାଳ ୯ଟା ୧୫ ମିନିଟରୁ ୧୦ଟା ସମୟ ମଧ୍ୟରେ କଳାହାଣ୍ଡିର ଆରାଧ୍ୟଦେବୀ ମା' ମାଣିକେଶ୍ବେରୀଙ୍କ ଠାରେ ନବାନ୍ନ ଲାଗି ହେବ । ପରେ ଦିନ ୧୧ ଘଟିକା ରୁ ୧୨ ଘଟିକା ୪୮ ମିନିଟ ମଧ୍ୟରେ ସର୍ବସାଧାରଣ ନୂଆଁଖାଇ ପାଳନ କରିବା ନେଇ ଧାର୍ଯ୍ୟ ହୋଇଛି ସମୟ ।
ଇଟିଭି ଭାରତ, କଳାହାଣ୍ତି
