କଳାହାଣ୍ଡି: କୋକସରା ବ୍ଲକ ଆମପାଣି ଠାରେ ବୁଢ଼ାରଜାଙ୍କ ଶକ୍ତି ପୀଠରେ ଦଶହରା ପର୍ବ ପାଳିତ । ଜଙ୍ଗଲ ପାହାଡ ଘେରରେ ଏହି ମନ୍ଦିରଟି କଳାହାଣ୍ଡି ଓ ନବରଙ୍ଗପୁର ଏବଂ ଛତିଶଗଡ ସୀମାନ୍ତରେ ଅବସ୍ଥିତ । ବୁଢାରଜାଙ୍କ ଏହି ଯାତ୍ରା ଦେଖିବାକୁ ଜିଲ୍ଲା ତଥା ଜିଲ୍ଲା ବାହାରୁ ହଜାର ହଜାର ଭକ୍ତଙ୍କ ସମାଗମ ହୋଇଥାଏ ।
ପରମ୍ପରା ଅନୁଯାୟୀ, ମନ୍ଦିରର ମୁଖ୍ୟ ପୂଜକଙ୍କ ଘର ଠାରୁ ପୂଜା ହେବା ପରେ ଲାଠି ଧରି ବୁଢ଼ାରଜା ପୀଠରେ ପହଞ୍ଚି ନଗର ପରିକ୍ରମା କରିଥାନ୍ତି । ଏହି ପୂଜାରେ ମାନସିକଧାରୀମାନେ ମାନସିକ ପୂରଣ ପରେ ନଡ଼ିଆ, କଦଳୀ, ପାରା, କୁକୁଡା ଓ ବୋଦା ଆଦି ପଶୁବଳି ଦେଇଥାନ୍ତି । ଅପରାହ୍ନରେ ବୁଢ଼ାରଜା ମନ୍ଦିର ପାର୍ଶରେ ଥିବା ବଡ ଗଛ ଉପରେ ବୁଦାକୁ ବାନ୍ଧି ଦେଇ ଲାଖ ବିନ୍ଧିଥାନ୍ତି ।
ବୁଢ଼ାରଜାଙ୍କ ମନ୍ଦିର ନୀତିକାନ୍ତି ପରେ ଖୋଲାଯାଇଥାଏ । ପ୍ରତିଦିନ ମନ୍ଦିରରେ ପୂଜାର୍ଚ୍ଚନା ବିଧି ମୁତାବକ ହୋଇଥାଏ । ଏହି ବୁଢାରଜାଙ୍କ ପର୍ବରେ ସନ୍ଧ୍ୟାକାଳୀନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ହୋଇଛି । ଏଥିସହ କଳାହାଣ୍ଡି ବୀର ବାଦ୍ୟ ଘୁମୁରା, ଘୁଡୁକା, ଢେମସା, ବଜା ସାଲିଆ, ଲୋକନୃତ୍ୟ, ଲୋକବାଦ୍ୟ ଆଦି ପରିବେଷଣ ହୋଇଥାଏ । ଏଥିପାଇଁ ଓଡିଶା ତଥା ଓଡିଶା ବାହାରୁ ଶହ ଶହ କଳାକାର ଆସି ତାଙ୍କ କଳା ପ୍ରଦର୍ଶନ କରିଥାନ୍ତି ।
ସେପଟେ ବୁଢାରଜାଙ୍କ ପର୍ବରେ ଲୋକଙ୍କ ସୁରକ୍ଷାକୁ ଦୃଷ୍ଟିରୁ ରଖି ବ୍ୟାପକ ବ୍ୟବସ୍ଥା କରାଯାଇଥିବା ନେଇ ଧର୍ମଗଡ ଉପଖଣ୍ଡ ପୋଲିସ ଅଧିକାରୀ ସୂଚନା ଦେଇଛନ୍ତି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ