କଳାହାଣ୍ଡି: ମା’ର ପଣତକାନୀ ସବୁଠୁ ଶ୍ରେଷ୍ଠ ଆଶ୍ରୟ ସ୍ଥଳ । ଗୋଟେ ସନ୍ତାନ ପାଇଁ ତା ମା ହିଁ ସବୁଠାରୁ ବଡ ସୁରକ୍ଷା କବଚ । ମା ଥିଲେ ଦୁନିଆର କୌଣସି ଶକ୍ତି ତା ସନ୍ତାନକୁ କ୍ଷତି ପହଞ୍ଚାଇ ପାରିବ ନାହିଁ । ହେଲେ ଯେତେବେଳେ ସେହି ମା ମମତାମୟୀରୁ ପିଶାଚୀ ହୋଇଯାଏ, ତାହାଲେ ଦୁନିଆ ଓଲଟି ଯାଏ । ଏମିତି ଏକ ଘଟଣା କଳାହାଣ୍ଡିରେ ଆଲୋଡନ ସୃଷ୍ଟି କରିଛି ।
ଜଣେ ସାବତ ମା 3 ବର୍ଷର କଅଁଳ ଝିଅକୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି । ଏଭଳି ହୃଦୟ ବିଦାରକ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ନର୍ଲା ଥାନା ଅଧିନସ୍ଥ ଲାଖପଦର ଗାଁରେ । ମୃତ ଶିଶୁ ହେଲେ ସେହି ଗାଁର ଯୁଗେଶ୍ବର ସାହୁଙ୍କ ଏକମାତ୍ର ଅଲିଅଳ କନ୍ୟା ନନ୍ଦିନୀ ସାହୁ । ନନ୍ଦିନୀଙ୍କୁ ତାଙ୍କ ସାବତ ମା ଅତି ନିର୍ମମ ଭାବେ ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି ।
ସୂଚନା ଅନୁସାରେ, ଶନିବାର ସନ୍ଧ୍ୟାରେ ନିତିଦିନିଆ କାମ ସାରି ଘରକୁ ଫେରିଥିଲେ ନନ୍ଦିନୀଙ୍କ ବାପା ଯୁଗେଶ୍ବର । ଘରକୁ ଫେରି ଯାହା ଦେଖିଥିଲେ ତାଙ୍କ ପାଦତଳୁ ମାଟି ଖସିଯାଇଥିଲା । ଏକମାତ୍ର କନ୍ୟା ଚିର ନିଦ୍ରାରେ ଶୋଇପଡିଥିଲା । ଏନେଇ ନନ୍ଦିନୀଙ୍କ ମାମୁଁ ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୋଲିସ ନନ୍ଦିନୀ ବାପା ଓ ସାବତ ମାକୁ ଅଟକ ରଖି ପଚରାଉଚରା ଜାରି ରଖିଛି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
