ଯାଜପୁର: ଜିଲ୍ଲାର ବିଞ୍ଝାରପୁର ବିତନା ଗାଁର ରୁଦ୍ର ପ୍ରତାପ ଆଚାର୍ଯ୍ୟଙ୍କ ମୃତ୍ୟୁ ଘଟଣା । ଏ ଘଟଣାରେ ହସ୍ତକ୍ଷେପ କରିଛନ୍ତି ଜାତୀୟ ମାନବାଧିକାର କମିଶନ(NHRC) । ଏହି ମାମଲାକୁ ବିଚାର କରି ୮ ସପ୍ତାହ ଭିତରେ ଏକ ରିପୋର୍ଟ ଦେବାକୁ ଯାଜପୁର ଏସପିଙ୍କୁ ନିର୍ଦ୍ଦେଶ ଦେଇଛନ୍ତି । ରୁଦ୍ରଙ୍କ ମୃତ୍ୟୁକୁ ବର୍ଷେ ବିତିସାରିଥିଲେ ମଧ୍ୟ, ଆଜି ପର୍ଯ୍ୟନ୍ତ ଏହା ରହସ୍ୟ ଘେରରେ ରହିଛି ।
ସୂଚନା ଅନୁସାରେ, ଯାଜପୁର ବାଣପୁର ଜଗନ୍ନାଥ ମନ୍ଦିର ପୋଖରୀରୁ ରୁଦ୍ରଙ୍କ ମୃତଦେହ ଉଦ୍ଧାର କରାଯାଇଥିଲା । ଏହାକୁ ଏକ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଥିଲେ । କିନ୍ତୁ ଏ ପର୍ଯ୍ୟନ୍ତ ପୋଲିସ ଘଟଣା ସମ୍ପର୍କରେ କୌଣସି ସିଦ୍ଧାନ୍ତରେ ପହଞ୍ଚି ପାରିନାହିଁ । କିମ୍ବା ମୃତ୍ୟୁର ପ୍ରକୃତ କାରଣ ଖୋଜିପାରିନି । ଏହି ଘଟଣାରେ ମାନବାଧିକାର କର୍ମୀ ସୁବ୍ରତ କୁମାର ଦାସ ଜାତୀୟ ମାନବାଧିକାର କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ । ତଦନ୍ତ ପ୍ରକ୍ରିୟାକୁ ଗତିଶୀଳ କରିବାକୁ ମଧ୍ୟ ଦାବି କରିଥିଲେ । କମିଶନ ଏହି ମାମଲାକୁ ବିଚାର କରି ୮ ସପ୍ତାହ ଭିତରେ ଏକ ରିପୋର୍ଟ ଦେବାକୁ ଯାଜପୁର ଏସପିଙ୍କୁ ନିର୍ଦ୍ଦେଶ ଦେଇଛନ୍ତି ।
ଇଟିଭି ଭାରତ, ଯାଜପୁର
