ଭଞ୍ଜନଗର: ଲଘୁଚାପ ଜନିତ ଲଗାଣ ବର୍ଷାରେ ଭାଙ୍ଗିଛି ଚାଷୀର ମେରୁଦଣ୍ଡ । ଜିଲ୍ଲାର ଭଞ୍ଜନଗର ଅଞ୍ଚଳରେ ଚାଷ ଜମିରେ ଲହଡା ମାରୁଛି ବର୍ଷା ପାଣି । ଗାମୁଣ୍ଡି ଗ୍ରାମରେ ଥିବା ସନ୍ତରା ନାଳରେ ଠିକ ଭାବେ ପାଣି ନିଷ୍କାସିତ ହୋଇପାରୁ ନଥିବାରୁ ଶହ ଶହ ଏକର ଜମିରେ ବନ୍ୟା ପାଣି ଲହଡି ମାରୁଥିବା ବେଳେ ସୁନାର ଫସଲକୁ ହରାଇ ଏବେ ଚାଷୀମାନେ ସରକାରଙ୍କ ସାହାଯ୍ୟ ଲୋଡି଼ଛନ୍ତି ।
ଚଳିତ ବର୍ଷ ସ୍ବଳ୍ପ ବୃଷ୍ଟି ଯୋଗୁଁ ଚାଷୀ ବହୁ ଅସୁବିଧାର ସମ୍ମୁଖୀନ ହୋଇ ତଳି ପକାଇବା ସହିତ ଧାନ ରୋଇଥିଲା ଏବଂ ବହୁ କଷ୍ଟରେ ସାର ସଂଗ୍ରହ କରି ଜମିରେ ପକାଇଥିଲା କିନ୍ତୁ ଠିକ ଅମଳ ସମୟରେ ଦଇବ ସାଜିଲା ଦାଉ । କେହି ଧାନ କାଟି ଦେଇଥିଲା ତ କେହି ଧାନ କାଟିବା ପାଇଁ ସଜବାଜ ହେଉଥିଲା । ଠିକ ଏହି ଘଡ଼ିସନ୍ଧି ମୁହୂର୍ତ୍ତରେ ଲଘୁଚାପ ଜନିତ ଲଗାଣ ବର୍ଷାରେ କାହାର ଧାନ ଶୋଇପଡ଼ିଥିବା ବେଳେ କାହାର ବିଲରେ ଅଣ୍ଟେପାଣି ଲହଡି ମାରୁଥିବା ଦେଖିବାକୁ ମିଳିଛି ।
ସ୍ବଳ୍ପ ବୃଷ୍ଟିରେ ମଧ୍ୟ ଚାଷୀ ଆଶା ରଖିଥିଲା ଭଲ ଖନ୍ଦ ହୋଇଛି ୨ ପଇସା ରୋଜଗାର ହେବା ସାଙ୍ଗକୁ ବର୍ଷସାରା ଚଳିବାରେ କୌଣସି ଅସୁବିଧା ହେବ ନାହିଁ । କିନ୍ତୁ ସେହି ଆଶା ଆଶାରେ ହିଁ ରହିଗଲା । ଚାଷୀ ଏବେ ମୁଣ୍ଡରେ ହାତଦେଇ ବସିଛି ଧାର କରଜ କରିଥିବା ଟଙ୍କା କିପରି ସୁଜିବ ତା ସହିତ ସାହୁକାରଙ୍କ ଧାନ କିପରି ପୈଠ କରିବ। ସୁନାର ଫସଲକୁ ହରାଇ ଏବେ ସରକାରୀ ସାହାଯ୍ୟକୁ ଅନାଇ ବସିଛି ଚାଷୀ ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
